ភ្នំពេញ៖ អំណោយជាគ្រឿងឧបភោគបរិភោគមួយចំនួនដែលមានទឹកប្រាក់សរុបចំនួនជាង១ម៉ឺនដុល្លារត្រូវបានសប្បុរសជននៅរាជធានីប្រគល់ជូនរដ្ឋបាលរាជធានីភ្នំពេញ ដើម្បីឲ្យរដ្ឋបាលរាជធានី បានចាត់ចែងបន្ត ជូនទៅបងប្អូនប្រជាពលរដ្ឋរងគ្រោះ និងងាយរង គ្រោះដោយទឹកជំនន់នៅក្នុងរាជធានីភ្នំពេញ ខណៈ ទឹកជំនន់បាននិងកំពុងជន់លិចលំនៅឋានរបស់ពួកគាត់នូវឡើយ។
ពិធីប្រគល់និងទទួលអំណោយ ខាងលើនេះបានធ្វើឡើងនាព្រឹកថ្ងៃទី១៩ ខែតុលា ឆ្នាំ២០២០នេះនៅសាលារាជធានីភ្នំពេញ លោក ឃួង ស្រេង អភិបាលរាជធានីភ្នំពេញ ។
មន្ត្រីរដ្ឋបាលរាជធានីភ្នំពេញ បានបញ្ជាក់ឲ្យដឹងថាអំណោយដែលបានប្រគល់ជូនរដ្ឋបាលរាជធានីភ្នំពេញខាងលើនេះរួមមាន៖ មី ១.៥០០កេស នំធុង៧២០ប្រអប់ដែលមានទឹកប្រាក់ស្មើនឹង១១.៩៦៤ដុល្លារអាមេរិក ។
លោកឃួង ស្រេង ក្នុងឱកាសនោះបានថ្លែងអំណរអរគុណយ៉ាងជ្រាលជ្រៅចំពោះសប្បុរសជននានា ដែលតែងតែគិតគូរ និងរួមសុខរួមទុក្ខជាមួយបងប្អូនប្រជាពលរដ្ឋដែលរងគ្រោះនិងងាយរងគ្រោះនៅក្នុងរាជធានីភ្នំពេញ ខណៈដែលទឹកជំនន់ទឹកភ្លៀងបាននិងកំពុងជន់លិច លំនៅឋានរបស់ពួកគាត់ដែលមកដល់ពេលនេះ សម្រាប់ប្រជាពលរដ្ឋនៅភ្នំពេញមានប្រមាណជាង ១ម៉ឺនគ្រួសារហើយ ដែលទទួលរងនូវការលិចលង់ដោយជំនន់ទឹកភ្លៀង ពិសេស នៅក្នុងខណ្ឌដង្កោ ខណ្ឌពោធិសែនជ័យនិងខណ្ឌកំបូល។
លោកបានបញ្ជាក់ផងដែរថា រាល់អំណោយរបស់សប្បុរសជនដែលប្រគល់ជូនមករដ្ឋបាលរាជធានីភ្នំពេញ រដ្ឋបាលរាជធានីភ្នំពេញ នឹងបន្តយកទៅបែងចែក ជូនដល់ដៃប្រជាពលរដ្ឋដែលរងគ្រោះនិងងាយរងគ្រោះពិតប្រាកដ ៕ដោយ៖សំរិត
