ការប្រកួតក្របខ័ណ្ឌ Champions League វគ្គជម្រុះតាមពូលកាលពីយប់មិញក្រុមខ្លាំង២ បានទទួលបរាជ័យនៅក្រៅទឹកដីរបស់ខ្លួនគឺក្រុមខ្លាំងមកពីបារាំង PSG និងក្រុមខ្លាំងមកពីអង់គ្លេស Manchester United ។ ក្រុម PSG បានបរាជ័យក្រោមថ្វីជើងក្រុមម្ចាស់ផ្ទះមកពីអាល្លឺម៉ង់ RB Leipzig ក្នុងលទ្ធផល២ទល់១ ដោយមានកីឡាករ២នាក់របស់ PSG ទទួលបានកាតក្រហមទៀតផង។

ចំណែកក្រុមបិសាចក្រហម Man United បានបរាជ័យក្រោមថ្វីជើងក្រុមមកពីទួរគី Istanbul Basaksehir ដែរដោយក្រុមបិសាចក្រហមនៅតែឈរលេខ១ក្នុងពូលដដែល ដោយ៣ប្រកួត ឈ្នះ២ប្រកួត និងចាញ់១ប្រកួតមាន៦ពិន្ទុ ខណៈដែលក្រុមនៅលេខ២ មានតែ៤ពិន្ទុប៉ុណ្ណោះ។

ដោយឡែកក្រុមខ្លាំងៗចំនួន៥គឺ Juventus, Barcelona, Chelsea, Dortmund, Sevilla សុទ្ធតែទទួលបានលទ្ធផលល្អទាំងអស់ ដោយក្រុមJuventus បានយកឈ្នះក្រុមម្ចាស់ផ្ទះ Ferencvaros ក្នុងលទ្ធផល៤ទល់១, ក្រុម Barcelona បានយកឈ្នះក្រុមភ្ញៀវ Dynamo Kyiv ក្នុងលទ្ធផល ២ទល់១, ក្រុម Dortmund បានយកឈ្នះក្រុមម្ចាស់ផ្ទះ Club Brugge ក្នុងលទ្ធផល៣ទល់០, ក្រុម Chelsea បានយកឈ្នះក្រុមភ្ញៀវ Rennes ក្នុងលទ្ធផល៣ទល់០ និងក្រុម Sevilla បានយកឈ្នះក្រុមភ្ញៀវ Krasnodar ក្នុងលទ្ធផល៣ទល់២។

សូមបញ្ជាក់ថា ការប្រកួតវគ្គជម្រុះតាមពូលក្របខ័ណ្ឌ Champions League នៅសល់តែ៣ប្រកួតទៀតប៉ុណ្ណោះនឹងត្រូវបញ្ចប់ក្នុងនោះក្រុមដែលឈរលេខ១និងលេខ២ ក្នុងពូលនឹងមានកៅអីទៅកាន់វគ្គ១៦ក្រុមចុងក្រោយ។ សម្រាប់ការប្រកួតវគ្គជម្រុះបន្តនឹងធ្វើឡើងនៅថ្ងៃទី២៤-២៥ ខែវិច្ឆិកាខាងមុខ ៕

         

ដោយ៖ភារៈ