អន្តរជាតិ៖ បន្ទាប់ពីអគ្គមេបញ្ជាការយោធាមីយ៉ាន់ម៉ា លោកឧត្តមសេនីយ៍ មីន អ៊ុងឡាំង បានប្រកាសកាលពីពេលថ្មីៗនេះថា ដែលបានរិះគន់គណៈកម្មការរៀបចំការបោះឆ្នោតមីយ៉ាន់ម៉ា ព្រោះលោក ចង់ឲ្យមានការបោះឆ្នោតសេរី និងយុត្តិធម៍ ។ ជាការឆ្លើយតបវិញភ្លាមៗអ្នកនាំពាក្យរដ្ឋាភិបាលមីយ៉ាន់ម៉ា កាលពីថ្ងៃទី៤ ខែវិច្ឆិកា បានអះអាងថា៖ ការលើកឡើងរបស់អគ្គមេបញ្ជាការយោធា មិនមានមូលដ្ឋានច្បាស់លាស់ និងមិនគោរពតាមរដ្ឋធម្មនុញ្ញ។ សារឆ្លើយឆ្លងរវាងយោធា និងរដ្ឋាភិបាលស៊ីវិលមីយ៉ាន់ម៉ាបែបនេះ ធ្វើឡើងមុនការបោះឆ្នោតថ្នាក់ជាតិនៅមីយ៉ាន់ម៉ា តែប៉ុន្មានថ្ងៃប៉ុណ្ណោះ។
បើសារព័ត៌មាន Irrawaddy ដកស្រង់សម្តីអ្នកនាំពាក្យរដ្ឋាភិបាលស៊ីវិលមីយ៉ាន់ម៉ា លោក U Zaw Htay បានបញ្ជាក់ថា កិច្ចសម្ភាសរបស់លោកឧត្តមសេនីយ៍ មីន អ៊ុងឡាំង មិនគោរពតាមរដ្ឋធម្មនុញ្ញ និងច្បាប់មីយ៉ាន់ម៉ាឡើយ។ អ្នកនាំពាក្យរដ្ឋាភិបាលរូបនេះ បញ្ជាក់បន្ថែមថាមាត្រា ២៦ នៃរដ្ឋធម្មនុញ្ញ បានចែងថា មន្ត្រីស៊ីវិល យោធា និងប៉ូលិស មិនត្រូវពាក់ព័ន្ធជាមួយនយោបាយឡើយ។
ជាមួយគ្នានេះ រដ្ឋាភិបាលមីយ៉ាន់ម៉ា អះអាងថា ខ្លួនមានការទទួលខុសត្រូវពេញលេញលើកំហុសរបស់គណៈកម្មការរៀបចំការបោះឆ្នោតទាំងចេតនា និងអចេតនា នៅក្នុងកម្រិតខុសៗគ្នា។
សូមជម្រាបថាលោក ឧត្តមសេនីយ៍ មីន អ៊ុងឡាំង អគ្គមេបញ្ជាការកងទ័ពមីយ៉ាន់ម៉ា នាពេលថ្មីៗនេះ បានរិះគន់គណៈកម្មការរៀបចំការបោះឆ្នោតថា បានប្រព្រឹត្តកំហុសមួយចំនួន ដែលមិនអាចទទួលយកបានដូចជាបញ្ហាបញ្ជីឈ្មោះបោះឆ្នោត បញ្ហាចម្រូងចម្រាសនៅមុនការបោះឆ្នោត និងការគ្រប់គ្រងខ្សោយលើការឃោសនាយុទ្ធនារកសម្លេងឆ្នោតរបស់គណបក្សនយោបាយក្នុងអំឡុងជំងឺរាតត្បាតសកលកូវីដ-១៩ ជាដើម។ លោកឧត្តមសេនីយ៍ បញ្ជាក់បន្ថែមថា មីយ៉ាន់ម៉ា ត្រូវការការបោះឆ្នោតដោយសេរី និងយុត្តិធម៌។
ដោយឡែកលោកស្រី អ៊ុងសាន ស៊ូជី ដែលជារដ្ឋមន្ត្រីការបរទេស កាលពីថ្ងៃទី៣ ខែវិច្ឆិកាកន្លងទៅ ក៏បានតបទៅសេចក្តីថ្លែងការណ៍របស់យោធាមីយ៉ាន់ម៉ា ដែលបានចេញកាលពីថ្ងៃទី២ ខែវិច្ឆិកា ជុំវិញគណៈកម្មការរៀបចំការបោះឆ្នោតនេះ។ លោកស្រី ស៊ូជី បញ្ជាក់ថា ពេលនេះមីយ៉ាន់ម៉ា កំពុងជួបរឿង ដែលអាចបង្កទៅជាបញ្ហា ដោយក្រុមយោធា មានបំណងញុះញង់ឲ្យផ្ទុះកំហឹងជាសាធារណៈ។
គួរបញ្ជាក់ថា មីយ៉ាន់ម៉ា នឹងរៀបចំការបោះឆ្នោតនៅថ្ងៃទី៨ ខែវិច្ឆិកា ឆ្នាំ២០២០ ហើយការបោះឆ្នោតនេះ គឺជាការជ្រើសរើសសមាជិកសភាជាន់ខ្ពស់, សភាតំណាងរាស្ត្រ និងសភាតំបន់ឬរដ្ឋ។ វាក៏កំណត់វាសនាប្រធានាធិបតីផងដែរ ព្រោះបក្សដែលមានសមាជិកសភាថ្នាក់ជាតិច្រើនមានសិទ្ធិតែងតាំងប្រធានាធិបតី ដែលជាតំណែងកំពូលរបស់ប្រទេស៕ដោយ៖ស តារា
