នៅថ្ងៃទី១២ខែវិច្ឆិកា ប្រធានាធិបតីអាមេរិក ដូណាល់ ត្រាំបានចុះហត្ថលេខាលើបទបញ្ជាហាមជនជាតិអាមេរិកវិនិយោគទៅលើក្រុមហ៊ុនចិន ដោយរដ្ឋាភិបាលលោកត្រាំចាត់ទុកថាជាក្រុមហ៊ុនមានកម្លាំងយោធានៅពីក្រោយ ។
ច្បាប់ខាងលើអនុវត្តទៅលើក្រុមហ៊ុនចិនចំនួន៣១ដែលមានទំនាក់ទំនងជាមួយយោធាចិន ជាការគំរាមកំហែងដល់សន្តិសុខរបស់អាមេរិក។
ក្រុមហ៊ុន ហួវៃ និង Hikvision ដែលជាក្រុមហ៊ុនផ្គត់ផ្គង់ឧបករណ៍តាមដានលំដាប់ពិភពលោកមានកាមេរ៉ាសុវត្ថិភាពជាដើម។ ក្រុមហ៊ុននោះស្ថិតនៅក្នុងបញ្ជីខ្មៅរបស់អាមេរិក ព្រមទាំងក្រុមហ៊ុនមួយចំនួនទៀតរបស់ចិន ដូចជា China Telecom និង China Mobile។
បទបញ្ជារបស់លោកត្រាំបានហាមប្រាមក្រុមវិនិយោគអាមេរិក ទិញភាគហ៊ុនណាមួយរបស់ក្រុមហ៊ុនចិនផងដែរ។ ជាមួយគ្នានោះដែរ ក្រុមហ៊ុនអាមេរិកមានរយៈពេលដល់ខែវិច្ឆិកាឆ្នាំ២០២១ ដើម្បីដកហ៊ុនចេញពីក្រុមហ៊ុនចិន។
បទបញ្ជារបស់លោកត្រាំ នឹងមានប្រសិទ្ធភាពចាប់ពីថ្ងៃទី១១ខែមករា ឆ្នាំ២០២១ ។ នេះជាសកម្មភាពថ្មីរបស់លោកត្រាំ
មុនពេលបញ្ចប់អាណត្តិនៅថ្ងៃទី២០ខែមករាឆ្នាំ២០២១។ ពាក់ព័ន្ធនឹងការបោះឆ្នោត ប្រធានាធិបតីដូណាល់ ត្រាំមិនទាន់ទទួលស្គាល់ពីការបរាជ័យរបស់ខ្លួននៅឡើយទេ ដោយកំពុងតែតស៊ូតាមផ្លូវច្បាប់៕ដោយ៖ធី រីណា
