ខេត្តស្វាយរៀង ៖ ជនសង្ស័យម្នាក់ក្នុងចំណោម២នាក់ត្រូវបាន
សមត្ថកិច្ចឃាត់ខ្លួនពីបទលួចមានស្ថានទម្ងន់ទោស (ឆក់ទូរស័ព្ទ) និងប្រើប្រាស់ដោយខុសច្បាប់នូវសារធាតុញៀន ។
ហេតុការណ៍ឃាត់ខ្លួនជនសង្ស័យនេះបានធ្វើឡើងកាលពីវេលាម៉ោង៦និង៤០នាទីព្រលប់ថ្ងៃទី១១ ខែវិច្ឆិកា ឆ្នាំ២០២០ នៅចំណុចភូមិព្រៃឆ្លាក់ សង្កាត់ព្រៃឆ្លាក់ ក្រុងស្វាយរៀង ខេត្តស្វាយរៀង។
សមត្ថកិច្ចនគរបាលក្រុងស្វាយរៀងបានឱ្យដឹងថា ជនសង្ស័យមានឈ្មោះ
ហួន បញ្ញា (អ្នកឆក់) អាយុ១៦ឆ្នាំ មុខរបរមិនពិតប្រាកដ មានទីលំនៅភូមិថ្មី ឃុំចំបក់ ស្រុកស្វាយជ្រំ ខេត្តស្វាយរៀង។
សមត្ថកិច្ចបានបញ្ជាក់ថា មុនកើតហេតុជនសង្ស័យនិងម្នាក់ទៀតមានឈ្មោះ ស្វិត (អ្នកឌុប) បានធ្វើសកម្មភាពជិះម៉ូតូមួយគ្រឿងឌុបគ្នាតាមពីក្រោយសិស្សសាលាម្នាក់ឈ្មោះ សែម សក្ខិណា ភេទស្រី អាយុ១៦ឆ្នាំ មុខរបរសិស្ស មានទីលំនៅភូមិអណ្តូងតាសី សង្កាត់ព្រៃឆ្លាក់ ក្រុងស្វាយរៀង រហូតមកដល់ចំណុចភូមិព្រៃឆ្លាក់ សង្កាត់ព្រៃឆ្លាក់ ក៏បានធ្វើសកម្មភាពឆក់យកទូរស័ព្ទតែមិនបានសម្រេច ហើយជនសង្ស័យបានធាក់ម៉ូតូនារីរងគ្រោះផ្តួល ហើយជិះរត់គេចខ្លួនមកទិសខាងត្បួង។
ប្រភពបន្តថា ក្រោយមកប្រជាពលរដ្ឋនៅក្បែរនោះបានឃើញសកម្មភាពខាងលើក៏ជិះម៉ូតូដេញតាមពីក្រោយ ហើយចៃដន្យក៏ជួបសមត្ថកិច្ចកំពុងល្បាតចល័ត ក៏ជួយដេញតាមរហូតមកដល់ខាងជើងផ្សារវាលយន្ត ជនសង្ស័យទាំងពីរបានជិះម៉ូតូទៅបុកម៉ូតូប្រជាពលរដ្ឋធ្វើឱ្យដួលម៉ូតូ ហើយក៏ត្រូវបានសមត្ថកិច្ចឃាត់ខ្លួនបានឈ្មោះ ហួន បញ្ញា ចំណែកឯឈ្មោះ ស្វិត បានលើកម៉ូតូជិះរត់គេចខ្លួនបាត់ស្រមោល។
បន្ទាប់មកសមត្ថកិច្ចក៏បាននាំខ្លួនជនសង្ស័យមកអធិការដ្ឋាននគរបាលក្រុងស្វាយរៀង ដើម្បីធ្វើការសាកសួរនិងកសាងសំណុំរឿងបញ្ជូនទៅការិយាល័យជំនាញចាត់ការបន្តតាមច្បាប់៕ ដោយ៖ យឹម សុថាន
