ខេត្តស្វាយរៀង៖ បុរសពីរនាក់បានរងរបួសធ្ងន់និងស្រាលដោយសារគ្រោះថ្នាក់ចរាចរណ៍រវាងម៉ូតូគុបមូលពីរគ្រឿងបើកបញ្ច្រាសគ្នាហើយបុកគ្នាលាន់សូរដូចរន្ទះបង្កការភ្ញាក់ផ្អើលដល់អ្នកភូមិនិងសមត្ថកិច្ចទាំងយប់។
ហេតុការណ៍នេះបានកើតឡើងកាលពីវេលាម៉ោង៦និង៥០នាទីព្រលប់
ថ្ងៃទី១៥ ខែវិច្ឆិកា ឆ្នាំ២០២០នៅត្រង់ចំណុចភូមិរមាសហែក ឃំុឣំពិល ស្រុករមាសហែក។
បើតាមសមត្ថកិច្ចនគរបាលស្រុករមាសហែកបានឲ្យដឹងថា បុរសរងគ្រោះមានឈ្មោះរស់ វ៉ន អាយុ៣២ឆ្នាំ មុខរបរកសិករ រស់នៅភូមិរមាសហែក ឃំុអំពិលស្រុករមាសហែក ជិះម៉ូតូម៉ាកហុងដាគុបសេ៥០ ពណ៌ទឹកប៊ិក គ្មានស្លាកលេខ (និងគ្មានភ្លើង)រងការខូចខាតយ៉ាងដំណំ។
ចំណែកភាគីរងគ្រោះម្ខាងទៀតមានឈ្មោះមុំ សារឿន អាយុ៤៦ឆ្នាំ មុខរបរកសិករ រស់នៅភូមិម្រាក់ទាប ឃុំត្រស់ ស្រុករមាសហែក ជិះម៉ូតូម៉ាកហុងដាគុប សេ៥០ ពណ៌ស្លែ គ្មានស្លាកលេខ (និងគ្មានភ្លើង)។
សមត្ថកិច្ចនគរបាលស្រុកបានឱ្យដឹងទៀតថា មុនកើតហេតុមានបុរសម្នាក់បានជិះម៉ូតូមួយគ្រឿងម៉ាកហុងដាគុបសេ៥០ ពណ៌ទឹកប៊ិក គ្មានស្លាកលេខ និងគ្មានភ្លើងបំភ្លឺផ្លូវក្នុងទិសដៅពីលិចទៅកើតស្រាប់តែទៅបុកជាមួយនិឹងម៉ូតូម្ខាងទៀតម៉ាកហុងដាគុប សេ៥០ ពណ៌ស្លែ គ្មានស្លាកលេខនិងគ្មានភ្លើងបំភ្លឺផ្លូវដូចគ្នាក្នុងទិសដៅបញ្ច្រាសគ្នាពេញទំហឹងបង្កការភ្ញាក់ផ្អើលដល់អ្នកភូមិចេញមកមើលនិងរាយការណ៍ទៅសមត្ថកិច្ចចុះមកធ្វើអន្តរាគមន៍ដឹកភាគីរងរបួសទាំងសងខាងទៅសង្គ្រោះនៅមន្ទីរពេទ្យស្រុករមាសហែក។
ចំណែកវត្ថុតាងម៉ូតូទាំង២គ្រឿងសមត្ថកិច្ចវាស់វែងរកខុសត្រូវនិងអូសយកទៅអធិការដ្ឋាននគរបាលស្រុករមាសហែកដើម្បីចាត់ការបន្តតាមច្បាប់៕ ដោយ៖ យឹម សុថាន
