អន្តរជាតិ៖ ខណៈពេលដែលប្រទេសក្រិក បានប្រកាសហាមប្រាមការប្រមូលផ្តុំថ្មី ហើយប្រទេសម៉ិចស៊ិកូ បានឆ្លងលើសពីមួយលាននាក់ ។ស្រាប់តែកាលពីពេលថ្មីៗនេះ រដ្ឋាភិបាលអាល្លឺម៉ង់​ បានព្រមានថា ខ្លួនអាចនឹងបិទប្រទេសមួយនេះ ក្នុងវិធានការណ៍ប្រឆាំងនឹងជំងឺ Covid-19 ទំនងជាមានរយៈពេល ៤ ទៅ ៥ ខែទៀត។

សូមជម្រាបថា ប្រទេសអាល្លឺម៉ង់​ គឺជាប្រទេសមានសេដ្ឋកិច្ចធំជាងគេនៅអឺរ៉ុប បានបិទប្រទេសមួយផ្នែក កាលពីដើមខែវិច្ឆិកានេះរួមមាន៖បិទបារ ភោជនីយដ្ឋាន និងកន្លែងកំសាន្តផ្សេងៗទៀត ប៉ុន្តែសាលារៀន និងហាងនានានៅបើកដំណើរការជាធម្មតា​។ 

បើតាមរដ្ឋមន្រ្តីក្រសួងសេដ្ឋកិច្ចអាល្លឺមង់លោក Peter Altmaier បានមានប្រសាសន៍ថា៖« យើងនឹងត្រូវរស់នៅដោយមានការប្រុងប្រយ័ត្ននិងការហាមឃាត់យ៉ាងហោចណាស់ក្នុងរយៈពេល ៤ ទៅ ៥ ខែទៀត »។ ការអត្ថាធិប្បាយរបស់លោកបានធ្វើឡើងមុនកិច្ចប្រជុំរដ្ឋាភិបាលកាលពីថ្ងៃចន្ទ ដើមសប្ដាហ៍នេះ ដើម្បីសម្រេចថា តើត្រូវបន្តវិធានការណ៍ថ្មីដែលនឹងត្រូវដាក់ឲ្យអនុវត្តជាបណ្តោះអាសន្នរហូតដល់ចុងខែវិច្ឆិកា។

ជាមួយគ្នានេះ នៅក្នុងប្រទេសក្រិកប៉ូលីស ក៏បានប្រកាសហាមប្រាមការប្រមូលផ្តុំជាសាធារណៈនៃមនុស្ស ៤ នាក់ ឬច្រើនជាងនេះដោយបានប្រកាសថាព្រឹត្តិការណ៍ និងការហែក្បួននានានឹងមិនកើតឡើងនៅឆ្នាំនេះទេ។

គួរបញ្ជាក់ថា បច្ចុប្បន្នចំនួនអ្នកឆ្លងជំងឺ Covid-19 នៅប្រទេសអាល្លឺម៉ង់​បានកើនឡើងពីជាង ៣៦០ នាក់នៅដើមខែតុលា ដល់ជាង ៣,៣០០នាក់ ខណៈពេលដែលប្រទេសនេះកំពុងប្រយុទ្ធប្រឆាំងនឹងរលកទី២ រួមជាមួយប្រទេសដទៃទៀតនៅអឺរ៉ុប៕ដោយ៖ស តារា