កីឡាករ Ousmane Dembele បានរងរបួសស្មាអំឡុងពេល Barcelona ប្រកួតចាញ់ក្រុម Atletico Madrid កាលពីថ្ងៃសៅរ៍នៅឯកីឡដ្ឋានEstadio Wanda Metropolitano ។ កីឡាករសញ្ជាតិបារាំងរូបនេះបានរងរបួសបន្ទាប់ពីការដួលនៅពាក់កណ្តាលតង់ទី១ ទោះបីជាគាត់អាចបន្តលេងរហូតចប់ការប្រកួតក៏ដោយ។ ខ្សែបម្រើប្រយុទ្ធស្លាបរូបនេះកំពុងស្ថិតនៅក្រោមការយកចិត្តទុកដាក់បន្ទាប់ពីមានការប៉ះទង្គិចជាមួយកីឡាករYannick Carrasco ប៉ុន្តែលោក Ronald Koeman បានសំរេចចិត្តបន្តឲ្យគាត់លេង។

ភាពធ្ងន់ធ្ងរនៃការរងរបួសនៅតែត្រូវបានគេមើលឃើញដោយសារព័ត៌មាន Mundo Deportivo បានរាយការណ៍ថា Dembele បានឆ្លងកាត់ការធ្វើតេស្តកាលពីព្រឹកថ្ងៃអាទិត្យ។ សម្រាប់ពេលនេះក្រុម Barcelona មិនបានធ្វើអត្ថាធិប្បាយអំពីស្ថានភាពរបួសរបស់ Dembele នោះទេ ប៉ុន្តែពួកគេបានអះអាងពីបញ្ហារបួសរបស់កីឡាករ Sergi Roberto និង Gerard Pique ថានឹងមិនអាចចូលលេងក្នុងវគ្គជម្រុះ Champion League នៅថ្ងៃអង្គារនេះបានទេ។

ដោយសារតែ Dembele អាចលេងបានគេសង្ឃឹមថា របួសរបស់គាត់នឹងមិនធ្ងន់ធ្ងរនោះទេ ប៉ុន្តែប្រសិនបើគាត់ត្រូវខកខានការប្រកួតបន្ទាប់ជាមួយក្រុម Dynamo Kyiv នៅយប់ថ្ងៃអង្គារ នោះនឹងធ្វើលោក Koemanព្រួយបារម្ភ និងឈឺក្បាលដោយសារបច្ចុប្បន្នខ្សែប្រយុទ្ធ Ansu Fati ក៏មានបញ្ហារបួសដែរ ។

គួរបញ្ជាក់ថា ក្រុម Barcelona កំពុងឈរលេខ១ក្នុងពូលG មាន៩ពិន្ទុ ក្នុងវគ្គជម្រុះ Champion League តាមពូល នឹងត្រូវតតាំងជាមួយក្រុមម្ចាស់ផ្ទះ Dynamo Kyiv នៅថ្ងៃរាត្រីថ្ងៃអង្គារឈានចូលថ្ងៃពុធនេះ ដោយកាលពីប្រកួតក្នុងជើងទី១ ក្រុម Barcelona បានយកឈ្នះក្រុម Dynamo Kyiv ក្នុងលទ្ធផល ២ទល់១។ ប៉ុន្តែសម្រាប់ការប្រកួតយប់នេះក្រុម Barcelona កំពុងព្រួយបារម្ភ ដោយសារកីឡាករសំខាន់ៗមួយចំនួនត្រូវញុំាញីដោយសាររបួស ៕ដោយ៖ធី រីណា