🔴 ក្រសួងសុខាភិបាលអំពាវនាវដល់អ្នកបានទៅហាង Zendo ត្រូវមកធ្វើតេស្តរកមេរោគកូវីដជាបន្ទាន់ ខណៈពីរនាក់បងប្អូនកើតកូវីដ១៩ បានទៅហាង Zendo សាខាបឹងកេងកង ព្រលប់ថ្ងៃទី២៧ វិច្ឆិកា(មានវីដេអូ)

ចែករំលែក៖

ភ្នំពេញ៖ លោក ម៉ម ប៊ុនហេង រដ្ឋមន្រ្តីក្រសួងសុខាភិបាល សូមប្រកាសតាមបណ្តាញសារព័ត៌មាន សូមអំពាវនាវដល់ភ្ញៀវទាំងឡាយណាដែលបានចូលទៅទិញសម្លៀកបំពាក់ នៅហាង Zendo សាខាបឹងកេងកង នៅអំឡុងចាប់ពីម៉ោង៥ល្ងាច ដល់ម៉ោង៩យប់ ថ្ងៃទី២៧ ខែវិច្ឆិកា ឆ្នាំ២០២០ ត្រូវមកធ្វើតេស្តជាបន្ទាន់វិទ្យាស្ថានជាតិសុខភាពសាធារណៈ ដើម្បីស្វែងរកមេរោគកូវីដ១៩។

សូមជម្រាបថា៖ ពីរនាក់បងប្អូនបង្កើតនឹងគ្នា ម្នាក់ធ្វើការនៅធនាគារកាថេ និងម្នាក់ធ្វើការនៅធនាគារចិន ដែលរកឃើញថា បានឆ្លងជំងឺកូវីដ-១៩ ពីព្រឹត្តិការណ៍ «សហគមន៍ ២៨វិច្ឆិកា» នោះបានទៅទិញខោអាវនៅហាង Zendo តាមផ្លូវត្រសក់ផ្អែម (សាខាបឹងកេងកង រាជធានីភ្នំពេញ) កាលពីម៉ោង៨យប់ ថ្ងៃទី២៧ ខែវិច្ឆិកា ឆ្នាំ២០២០កន្លងទៅ។ ពីរនាក់បងប្អូនបង្កើតនឹងគ្នានោះ
ទី១-ឈ្មោះ ឡាយ សេងលី បុគ្គលិកធនាគារចិន (Bank of China) នៅអគារកាណាឌីយ៉ា ។
និងទី-ឈ្មោះ ឡាយ សេងលីន បុគ្គលិកធនាគារកាថេ យូណាធិន ហើយពួកគេត្រូវបានរកឃើញមានជំងឺកូវីដ-១៩ ដែលឆ្លងពីអ្នកពាក់ព័ន្ធព្រឹត្តិការណ៍ «សហគមន៍ ២៨វិច្ឆិកា» ហើយក៏ធ្លាប់បានចម្លងទៅបុគ្គលិកនៅហាង Pedro ចំនួន៧នាក់ផងដែរ។
តាមរយៈវីដេអូដែលបានបង្ហាញពីកាមេរ៉ាសុវត្ថិភាព គឺបង្ហាញឲ្យឃើញថា ឈ្មោះ ឡាយ សេងលី និងឈ្មោះ ឡាយ សេងលីន ពេលកំពុងដើរមើលសម្លៀកបំពាក់នោះ មិនបានពាក់ម៉ាស់នោះទេ ដូច្នេះហើយជាក្ដីព្រួយបារម្ភ សម្រាប់អ្នកដែលបានចូលទៅហាង Zendo អំឡុងពេលដូចគ្នានេះ។
សូមបញ្ជាក់ថា៖ ក្រសួងសុខាភិបាលក៏បាន បង្ហាញពីឈ្មោះ និងរូបបុគ្គល២នាក់ ដែលជាប្រភពនៃការចម្លងមេរោគកូវីដ១៩ ពាក់ព័ន្ធនឹងព្រឹត្តិការណ៍សហគមន៍ ២៨វិច្ឆិកា គឺឈ្មោះ ឆែម សុនីតា និងឈ្មោះ តាំង សេវិនអាប់ ត្រូវបានក្រសួងសុខាភិបាលបង្ហាញរូបភាពហើយក្រសួងបានអំពាវនាវដល់អ្នកប៉ះពាល់ពួកគេ ទៅធ្វើតេស្តរកមេរោគកូវីដ១៩ ជាបន្ទាន់៕