អន្តរជាតិ៖ ក្រុមមន្ត្រី របស់សហរដ្ឋអាមេរិករៀបចំគម្រោងការចែកចាយវ៉ាក់សាំងកូវីដ១៩ កាលពីថ្ងៃព្រហស្បតិ៍សប្ដាហ៍មុនបានព្រមានថាក្រុមចោរព័ត៌មានវិទ្យា ឬហេកគ័រ (hackers) កំពុងដាក់គោលដៅទៅលើក្រុមហ៊ុនឱសថសំខាន់ៗដែលរៀបនឹងបញ្ចេញវ៉ាក់សាំងនេះ។
ជាក់ស្តែងកាលពីថ្ងៃព្រហស្បតិ៍ទី៣ ខែធ្នូ ឆ្នាំ២០២០ថ្មីៗនេះ នៅក្នុងអត្ថបទ blog មួយបានចេញផ្សាយថា ក្រុមហ៊ុន IBM អះអាងថា ខ្លួនបានរកឃើញគ្រោងការលួចបន្លំដែលសំដៅលើ «បណ្តាអង្គការដែលជាប់ទាក់ទងនឹងការស្តុកទុកវ៉ាក់សាំងកូវីដ១៩» ដែលនេះសំដៅលើក្រុមមនុស្ស ឬអាជីវកម្មដែលទទួលខុសត្រូវចំពោះការស្តុកទុកវ៉ាក់សាំងក្នុងកម្រិតសីតុណ្ហភាពត្រជាក់ ដើម្បីរក្សាគុណភាពវ៉ាក់សាំង។
ដោយឡែកទីភ្នាក់ងារសន្តិសុខតាមអ៉ីនធឺណេតនិងសន្តិសុខហេដ្ឋារចនាសម្ព័ន្ធ (CISA) របស់សហរដ្ឋអាមេរិក បានចែករំលែករបាយការណ៍នេះកាលពីថ្ងៃព្រហស្បតិ៍នេះដែលថា ជាមួយនឹងការព្រមានទៅកាន់អ្នកទាំងឡាយដែលពាក់ព័ន្ធក្នុងប្រតិបត្តិការវ៉ាក់សាំងកូវីដ១៩។
គួរបញ្ជាក់ថា លើសពីនេះទីភ្នាក់ងារសន្តិសុខតាមអ៉ីនធឺណេត CISA បានសង្កត់ធ្ងន់ថា ខ្លួន«លើកទឹកចិត្តឲ្យអង្គការប្រតិបត្តិការ Operation Warp Speed និងអង្គការផ្សេងៗទៀតដែលពាក់ព័ន្ធនឹងការស្តុកទុក និងដឹកជញ្ជូនវ៉ាក់សាំង ពិនិត្យមើលរបាយការណ៍ IBM X-Force»៕ដោយ៖ស តារា
