ក្រុមបិសាចក្រហម Manchester United បានធ្លាក់ចេញពីក្របខ័ណ្ឌ Champions League ក្នុងវគ្គជម្រុះតាមពូល ដែលមិនមានឱកាសឡើងទៅកាន់វគ្គ១៦ក្រុមទៀតទេ ក្រោយពីក្រុមមួយនេះបានចាញ់ក្រុមម្ចាស់ផ្ទះRB Leipzig ៣ទល់២ ក្នុងការប្រកួតកាលពីរំលងអធ្រាត្រឈានចូលថ្ងៃទី៩ ខែធ្នូនេះ។ នេះបើយោងតាមការចុះផ្សាយរបស់ BBC Sport នៅព្រឹកថ្ងៃទី៩ ធ្នូ។
ដោយត្រូវការតែលទ្ធផលស្មើប៉ុណ្ណោះដើម្បីឈានទៅវគ្គ១៦ក្រុមចុងក្រោយរបស់ក្រុមលោក Ole Gunnar Solskjaer ប៉ុន្តែក្តីសង្ឃឹមនេះបានបាត់បង់ក្រោយពីការប្រកួតចប់ក្នុងលទ្ធផល៣ទល់២។ នៅតង់ទី១ក្រុមម្ចាស់ផ្ទះ RB Leipzig រកបាន២គ្រាប់នាំមុខគឺនៅនាទីទី២ ដោយកីឡាករAngeliño និងនៅនាទីទី១៣ ដោយកីឡាករ Haidara ។
ចូលដល់តង់ទី២ ក្រុមម្ចាស់ផ្ទះ RB Leipzig បន្តនាំមុខ១គ្រាប់ទៀតនៅនាទីទី៦៩ ដោយកីឡាករ Kluivert ប៉ុន្តែនៅនាទីទី៨០ បិសាចក្រហមទទួលបានបាល់ពិន័យ១១ម៉ែត្រ១គ្រាប់ស៊ុតដោយកីឡាករ Bruno Fernandes ហើយនៅនាទីទី៨២ ខ្សែបម្រើ Paul Pogbaរកបាន១គ្រាប់ទៀតធ្វើឲ្យចប់ការប្រកួតក្រុមម្ចាស់ផ្ទះ RB Leipzig យកឈ្នះក្រុម Man United ៣ទល់២។
ក្រុម RB Leipzig បានកក់កៅអីទៅកាន់វគ្គ១៦ក្រុមចុងក្រោយដែលមាន១២ពិន្ទុក្នុងពូលH ខណៈដែលក្រុមបិសាចក្រហម Manchester United បានធ្លាក់ទៅលេងនៅក្របខ័ណ្ឌ Europa League វគ្គ៣២ក្រុម។ វាជាការលួងលោមតូចមួយសម្រាប់ក្រុមបិសាចក្រហមដែលពេលនេះពួកគេបានធ្លាក់ចូលទៅក្នុងក្របខ័ណ្ឌ Europa League ដែលជាការប្រកួតមួយដែលពួកគេធ្លាប់ឈ្នះពានមួយនេះកាលពីឆ្នាំ២០១៧ ។ ចំណែកក្រុម RB Leipzig ឈានទៅវគ្គ១៦ក្រុមចុងក្រោយនៃក្របខ័ណ្ឌ Champions League ដោយក្រុមនេះធ្លាប់ឈានដល់វគ្គ៤ក្រុមចុងក្រោយកាលពីឆ្នាំ២០១៩-២០២០ ។
ដោយឡែកការប្រកួតរវាងក្រុម Paris St-Germain និងក្រុម Istanbul Basaksehir ត្រូវបានផ្អាក បន្ទាប់ពីមន្ត្រីនៃការប្រកួតមួយត្រូវបានគេចោទប្រកាន់ថា បានប្រើពាក្យប្រកាន់ជាតិសាសន៍ទៅលើបុគ្គលិករបស់ក្រុម Istanbul Basaksehir មកពីទួរគី។
ក្នុងសេចក្តីថ្លែងការណ៍របស់ UEFA បានសរសេរនៅក្នុងគេហទំព័រ និងផេកផ្លូវការរបស់ខ្លួនថា “UEFA ដឹងអំពីឧប្បត្តិហេតុមួយក្នុងកំឡុងពេលការប្រកួតក្របខ័ណ្ឌ Champions League កាលពីថ្ងៃអង្គាររវាងក្រុម Paris Saint-Germain និងក្រុម İstanbul Başakşehir ហើយនឹងធ្វើការស៊ើបអង្កេតយ៉ាងហ្មត់ចត់។ ការរើសអើងជាតិសាសន៍ និងការរើសអើងគ្រប់ទម្រង់ទាំងអស់មិនមាននៅក្នុងវិស័យបាល់ទាត់ទេ” ។
UEFA មិនទាន់ដឹងពីការប្រកាសការប្រកួតរវាងក្រុមទាំង២ដើម្បីបញ្ចប់វគ្គជម្រុះតាមពូលនេះនៅឡើយទេ ក្នុងពេលភ្លាមៗនោះ។ ប៉ុន្តែក្រុម Paris Saint-Germain មានសង្ឃឹមទៅកាន់វគ្គ១៦ក្រុមរួចស្រេចទៅហើយសម្រាប់ការប្រកួតក្នុងទឹកដីរបស់ខ្លួន ៕ដោយ៖ភារៈ
