អន្តរជាតិ៖ អាមេរិក ខណៈអ្នកស្លាប់ដោយសារកូវីដ-១៩ក្នុងប្រទេសនេះឡើងដល់ ៣០ម៉ឺននាក់ ពេលនេះខ្លួនបានចាប់ផ្ដើមដឹកជញ្ជូនវ៉ាក់សាំងកូវីដ-១៩លើកដំបូង ទៅចែកចាយនៅមណ្ឌលសុខភាពនៅទូទាំងប្រទេស កាលពីថ្ងៃទី១៣ ខែធ្នូ ខណៈដែលការចាក់វ៉ាក់សាំងដល់មនុស្សទីមួយ រំពឹងចាប់ផ្ដើមនៅថ្ងៃទី១៤ ខែធ្នូម្សិលមិញនេះ។
ជាក់ស្តែងការចាក់វ៉ាក់សាំង រំពឹងចាប់ផ្ដើមនៅព្រឹកថ្ងៃទី ១៤ ខែធ្នូ (ម៉ោងនៅអាមេរិក) ដោយបុគ្គលិកសុខាភិបាលនិងមនុស្សចាស់ជាក្រុមមនុស្សអាទិភាព។ បន្ទាប់ពីរយៈពេល ៤៨ម៉ោងក្រោយទទួលបានការអនុញ្ញាតឲ្យប្រើប្រាស់វ៉ាក់សាំងរបស់ក្រុមហ៊ុន Pfizer អាមេរិក កំពុងរៀបចំយុទ្ធនាការចាក់វ៉ាក់សាំងទ្រង់ទ្រាយធំក្នុងប្រវត្តិសាស្ត្រអាមេរិក ដោយចាប់ផ្ដើមពីការដឹកចែកចាយពួកវានៅតាមបណ្ដាមណ្ឌលសុខភាពនៅជុំវិញសហរដ្ឋអាមេរិក។
លោក Richard W. Smith ដែលជាអ្នកគ្រប់គ្រងប្រតិបត្តិការដឹកជញ្ជូនវ៉ាក់សាំងកូវីដ-១៩ក្នុងសហរដ្ឋអាមេរិកសម្រាប់ក្រុមហ៊ុនដឹកជញ្ជូនFedEx Express បានបញ្ជាក់ថា៖ «នេះគឺថ្ងៃជាប្រវត្តិសាស្ត្រមួយ»។ បើតាមចុះទីភ្នាក់ងារព័ត៌មាន AP ក្រុមហ៊ុន FedEx Express ទទួលខុសត្រូវដឹកវ៉ាក់សាំងដំបូងប្រមាណ៦៣០ប្រអប់ពីរដ្ឋ Tennessee, Michigan និង Kentucky ទៅចែកចាយទូទាំងប្រទេស។ ក្រុមហ៊ុនដឹកជញ្ជូន United Parcel Service ក៏មានចំណែកខ្លះផងដែរ។
សូមជម្រាបថា ចំពោះការដឹកជញ្ជូនវ៉ាក់សាំងតាមរយៈរថយន្តធុនធំនិងយន្តហោះនេះ គឺបំពាក់បច្ចេកវិទ្យា GPS តាមដាន ដើម្បីធានាសុវត្ថិភាព ហើយការដឹកជញ្ជូនជើងទីមួយនេះ ប៉ាន់ស្មានថា ដឹកវ៉ាក់សាំងសរុប៣លានដូស។ បើតាមសម្ដីមន្ត្រីសហព័ន្ធអាមេរិក ការដឹកជញ្ជូនវ៉ាក់សាំង Pfizer ជើងដំបូងនេះ នឹងត្រូវបែងចែកតាមដំណាក់កាល ពោលគឺដឹកទៅដល់មណ្ឌលចែកចាយ១៤៥ទីតាំងនៅថ្ងៃទី ១៤ ខែធ្នូ, មណ្ឌលចែកចាយ៤២៥ទីតាំងផ្សេងទៀតនៅថ្ងៃទីបន្ទាប់ និងសេសសល់៦៦ទីតាំងនាថ្ងៃទី១៦ខែធ្នូ។
ខណៈវ៉ាក់សាំងនេះ ត្រូវរក្សានៅសីតុណ្ហភាពទាបខ្លាំង រហូតដល់ ៧០ អង្សាសេក្រោមសូន្យនោះ ល្បឿននៃការដឹកជញ្ជូន គឺមានសារសំខាន់សម្រាប់វ៉ាក់សាំងនេះ។ គេសង្កេតឃើញ បុគ្គលិកនៅក្រុមហ៊ុន Pfizer ញាប់ដៃញាប់ជើងរៀបចំទុកដាក់វ៉ាក់សាំងទាំងនេះដោយប្រុងប្រយ័ត្នបំផុតនៅក្នុងប្រអប់។ ក្រោយវិចខ្ចប់រួច ពួកគេ ប្រើឧបករណ៍ស្កេន និងដាក់ប្រអប់វ៉ាក់សាំងទាំងនេះក្នុងប្រអប់ត្រជាក់មួយទៀត ដែលដាក់ពេញទៅដោយទឹកកកស្ងួត។
គួរបញ្ជាក់ថា វ៉ាក់សាំងរបស់ក្រុមហ៊ុន Pfizer សហការជាមួយក្រុមហ៊ុនអាល្លឺម៉ង់ BioNTech ដែលបង្ហាញថា មានប្រសិទ្ធភាព ៩៥ភាគរយបង្ការជំងឺកូវីដ-១៩។ រដ្ឋាភិបាលអាមេរិក បានបញ្ជាទិញវ៉ាក់សាំង Pfizer ១០០លានដូស គ្រប់គ្រាន់សម្រាប់ចាក់មនុស្ស៥០លាននាក់ ហើយពិចារណាទិញបន្ថែមទៀត។ ពលរដ្ឋអាមេរិក១០០លាននាក់ ឬ៣០ភាគរយនៃប្រជាជនសរុប រំពឹងចាក់វ៉ាក់សាំងបង្ការកូវីដ-១៩រួចរាល់ត្រឹមចុងខែមីនា ឆ្នាំ២០២១ខាងមុខ៕ដោយ៖ស តារា
