សកម្មភាពប្រារព្ធខួបអតីតមេដឹកនាំ គីម ជុងអុីល​ឆ្នាំនេះ​​ មិនធ្វើធំដុំដូចឆ្នាំមុនៗឡើយ​ ដោយសារតែកូរ៉េខាងជើង​ស្ថិតនៅក្នុងដំណាក់កាល​ប្រយុទ្ធប្រឆាំងកូវីដ​-១៩​។
កាលពីថ្ងៃទី​១៧ខែធ្នូ ពលរដ្ឋនាំគ្នាទៅកាន់​តំបន់Mansu ក្នុងរដ្ឋធានីព្យុងយ៉ាង ដើម្បីដាក់កម្រងផ្កាគោរពវិញ្ញាណក្ខន្ធ​អតីតមេដឹកនាំ គីម ជុងអុីល​ ដែលបានស្លាប់រយៈពេល៩ឆ្នាំមកហើយ។
ជាមួយគ្នានោះដែរ​ មេដឹកនាំគីម ជុងអ៊ុន ក៏បានទៅចូលរួម​ពិធីបុណ្យនៅវិមាន Kumsusan (វិមានព្រះអាទិត្យរះ)ផងដែរ។ ពិធីបុណ្យខួបរបស់អតីតមេដឹកនាំ គឺជាបុណ្យជាតិនៅកូរ៉េខាងជើង ប៉ុន្តែដោយសារតែការទប់ស្កាត់ការឆ្លងកូវីដ​-១៩ ទើបរដ្ឋាភិបាលរៀបចំជាទ្រង់ទ្រាយតូច។
អតីតមេដឹកនាំ​គីម ជុងអុីល បានស្លាប់នៅថ្ងៃទី​១៧ខែធ្នូឆ្នាំ​២០១១ នៅរដ្ឋធានីព្យុងយ៉ាង ដោយជំងឺបេះដូង ។​ ក្រោយការស្លាប់លោក គីម ជុងអ៊ុន​ក៏បានឡើងដឹកនាំកូរ៉េខាងជើង​​ជំនួសឪពុក​ទាំងខ្លួននៅក្មេងវ័យ។
ពាក់ព័ន្ធនឹងកូវីដ​-១៩ មកទល់ពេលនេះកូរ៉េខាងជើងមិនទាន់មានករណីឆ្លងកូវីដ​-១៩ ម្នាក់ណាឡើយ ។ នៅពេលនេះដែរ មានព័ត៌មានជាច្រើនបានផ្សាយថា កូរ៉េខាងជើង បានទិញវ៉ាក់សាំងប្រឆាំងកូវីដ​-១៩ ពីប្រទេសចិននិងរុស្ស៊ី៕

https://youtu.be/OEA5gdpCJ_w

រូបភាព៖ vietnamplus