ឥណ្ឌូនេស៊ីរកឃើញជំរំហ្វឹកហាត់របស់ក្រុមភេរវកម្មនៅភាគកណ្តាលកោះជ្វា

ចែករំលែក៖

នៅក្នុងជំរំហ្វឹកហាត់ ក្រុមភេរវករ បានរៀបពីវិធីសាស្ត្រការពារខ្លួនដោយដៃទទេ និងវិធីប្រើកាំបិតបង្កៃគ្រាប់បែក និង រៀនក្បាច់គុន។
កាលពីថ្ងៃទី២៨ខែធ្នូ មន្ត្រីឥណ្ឌូនេស៊ីបានបញ្ជាក់ថា កម្លាំងភេរវកម្មពិសេស (Densus 88) របស់ប្រទេសនេះបានរកឃើញទីតាំងហ្វឹកហាត់របស់ក្រុមភេរវកម្មJemaah Islamiyah ១២កន្លែង នៅភាគកណ្តាលខេត្តជ្វា។
ស្នងការប៉ូលិសជាតិឥណ្ឌូនេស៊ី លោកRaden Prabowo Argo Yuwono បានឲ្យដឹងថា ទីតាំងហ្វឹកហាត់ក្រុមភេរវកម្មមួយក្នុងចំណោម១២ដែលបានរកឃើញគឺជាភូមិគ្រឹះមានកម្ពស់ពីរជាន់ ស្ថិតនៅក្នុងតំបន់ Ungaran ក្នុងស្រុកSemarang កោះជ្វា។
លោកYuwono បានបញ្ជាក់ថា នៅតាមជំរំហ្វឹកហាត់ ក្រុមភេរវករបានរៀនពីវិធីសាស្រ្តការពារខ្លួន និងប្រើអាវុធ ព្រមទាំងបង្កៃគ្រាប់បែក…។ គ្រូបង្រៀនក្បាច់គុនឈ្មោះJoko Priyono មានរហស្សនាមថា Karso ត្រូវបានកម្លាំងប្រឆាំងភេរវកម្ម(Densus 88)ចាប់ខ្លួនកាលពីឆ្នាំ២០១៩ ហើយត្រូវកាត់ទោសជាប់គុក៣ឆ្នាំ។
ក្រុមភេរវកម្ម Jemaah Islamiyah រងការចោទប្រកាន់នៅពីក្រោយការវាយប្រហារភេរវកម្ម នៅឥណ្ឌូនេស៊ីននាពេលកន្លងមក ។ ការវាយប្រហារភេរវកម្មធំបំផុតគឺនៅលើកោះបាលី សម្លាប់មនុស្ស២០២នាក់ និងរបួសជាង២០០នាក់នៅឆ្នាំ២០០២៕