ខេត្តព្រះសីហនុ៖ ដើម្បីចូលរួមចំណែកលើវិស័យការពារជាតិ ជាមួយរាជរដ្ឋាភិបាល នៅរសៀលថ្ងៃទី៣០ ខែ ធ្នូ ឆ្នាំ ២០២០ កន្លងមកនេះលោក លឹម ហ៊ុយឡេង.លោក ហេង សុវណ្ណា ហៅ (ហ៊ិន ត្រឹង) សមាជិកគណៈកម្មាធិការកណ្តាលថ្នាក់ជាតិ ចុះជួយស្រុកព្រៃនប់ និងលោកស្រី ហួត ស៊ីថា ជាភរិយា បានអញ្ជើញជួបសំណេះសំណាលសាកសួរសុខទុក្ខដល់នាយនាវីនិងពលនាវិកកងទព័មូលដ្ឋានសមុទ្ររាម នៅក្នុងឱកាសបុណ្យចូលឆ្នាំថ្មីឆ្នាំសកល២០២១និងបាននាំយករថយន្តភីអាប់ ម៉ាកCharlet ស៊េរីឆ្នាំ២០១៩ មួយគ្រឿង បំពាក់ភ្លើងស៊ីរ៉ែន មានតម្លៃ ១៨,០០០ ដុល្លារអាមេរិក រួមជាមួយគ្រឿងឧបភោគ បរិភោគ និងថវិកាមួយចំនួន ឧបត្ថម្ភដល់កងទ័ពជើងទឹកមូលដ្ឋានសមុទ្រ ដើម្បីប្រើប្រាស់ក្នុងអង្គភាព ។ 

        ពិធីប្រគល់ និងទទួលរថយន្តសារ៉ែន ធ្វើឡើងនៅទី បញ្ជាការដ្ឋានមូលដ្ឋានសមុទ្រ ស្ថិតនៅឃុំរាម ស្រុកព្រៃនប់ ខេត្តព្រះសីហនុ  ដោយមានវត្តមាន លោក ឧត្តមនាវីឯក អ៊ុក សីហា មេបញ្ជាការរងកងទ័ពជើងទឹកនិងជាមេបញ្ជាការមូលដ្ឋានសមុទ្រ បានទទួលស្វាគមន៍ និងថ្លែងអំណរគុណលោក លឹម ហ៊ុយឡេង និងក្រុមគ្រួសារ ដែលបានចំណាយថវិកាទាំងពេលវេលាដ៏មានតម្លៃទិញរថយន្ត ភីអាប់ម៉ាកCharletមួយគ្រឿងបំពាក់ដោយភ្លើងស៊ីរ៉ែនព្រមទាំងគ្រឿងឧបភោគបរិភោគ និងថវិកាមួយចំនួនយកមកប្រគល់ជូនដល់កងទ័ពមូលដ្ឋានសមុទ្ររាម នេះជាសកម្មភាពមនុស្សធម៌រួមចំណែកនៅក្នុងវិសយ័ការពារជាតិជួយដល់កងទ័ពមូលដ្ឋានសមុទ្ររាមនាពេលនេះ ។ លោក ឧត្តមនាវីឯក អ៊ុក សីហា នាយនាវី,នាយនាវីរង និងពលនាវិកមូលដ្ឋានសមុទ្រទាំងអស់បានថ្លែងអំណរគុណយ៉ាងជ្រាលជ្រៅចំពោះទឹកចិត្តសប្បុរសធម៌របស់លោក និងក្រុមគ្រួសារ ស្របពេលដែលមូល ដ្ឋានសមុទ្រកំពុងខ្វះរថយន្តស៊ីរ៉ែនសម្រាប់នាំផ្លូវ និងចូលរួមអន្តរាគមន៍  ហើយរថយន្តនេះ អង្គភាពយកមកប្រើប្រាស់ក្នុងការអន្តរាគមន៍ជួយ សង្គ្រោះ ក្នុងគ្រោះមហន្តរាយនានា ក៏ដូចជាមធ្យោបាយនាំផ្លូវជាដើម ។ 

         លោក ឧត្តមនាវីឯក អ៊ុក សីហា បន្តថា កន្លងមកអង្គភាពមូលដ្ឋានសមុទ្របានចូលរួមការងារសង្គមជាច្រើន ដូចជា ការងារកាកបាទក្រហម Covid-១៩ និងមូលនិធិគន្ធបុប្ផាជាដើម ពិសេសគ្រួសារកងទ័ពដែលមានជីវភាពខ្វះខាត ម្យ៉ាងទៀតមូលដ្ឋានសមុទ្របានពង្រឹងវិន័យចំពោះនាយទាហាន ពលទាហានមិនត្រូវប្រើប្រាស់គ្រឿងញៀន ប្រសិន បើរកឃើញប្រព្រឹត្តគ្រឿងញៀនលេងល្បែងស៊ីសងគ្រប់ប្រភេទនិងត្រូវបណ្តេញចេញពីអង្គភាព ។ 

         លោក លឹម ហ៊ុយឡេង មានប្រសាសន៍ថា ដោយមើលឃើញនូវការខ្វះខាតរថយន្តស៊ីរ៉ែននាំផ្លូវ ទើបលោកបានឧបត្ថម្ភរថយន្តនេះ ដើម្បីឱ្យអង្គភាពមូលដ្ឋានសមុទ្រមានរថយន្តស៊ីរ៉ែននាំផ្លូវ ដើម្បីប្រើជាប្រយោជន៍ក្នុងមូលដ្ឋានសមុទ្រ ក៏ដូចជាប្រយោជន៍សម្រាប់ការពារសន្តិសុខ សុវត្ថិភាពសង្គមជូនប្រជាពលរដ្ឋ ភ្ញៀវទេសចរជាតិ និងអន្តរជាតិ ព្រោះតំបន់រាម ជាតំបន់មានសក្តានុពលខាងវិស័យទេសចរណ៍និងវិនិយោគនៅពេលខាងមុខ ។

      ក្នុងឱកាសនោះលោក ហេង សុវណ្ណា ហៅ(ហ៊ិន ត្រឹង )ក្រុមការងាររាជរដ្ឋាភិបាលចុះជួយពង្រឹង១៥ឃុំនៅស្រុកព្រៃនប់ និងលោកស្រី ហួត ស៊ីថា ជាភរិយា បាននាំយកម៉ាស៊ីនស្កេនកំដៅមួយគ្រឿង និងថវិកា ចំនួន៥០០,០០០រៀល មានមីចំនួន២០កេស ទឹកសុទ្ធចំនួន២០កេសនិងទឹកក្រូចចំនួន២០កេសជូនដល់កងអន្តរាគមន៍ កងទ័ពជើងទឹកមូលដ្ឋានសមុទ្រផងដែរ ៕ 

        

ដោយ៖ឆ្លាម សមុទ្រ