ភ្នំពេញ៖ បុរសជាជនជាតិចិនម្នាក់សង្ស័យស្រវឹងស្រាបើករថយន្តក្នុងល្បឿនលឿនក៏ជ្រុលទៅបុករ៉ឺម៉កកង់បីដឹកគ្រឿងសមុទ្រពីក្រោយពេញទំហឹង បណ្តាលឲ្យបុរសម្នាក់ស្លាប់ភ្លាមៗនៅកន្លែងកើតហេតុ កាលពីវេលាម៉ោង៣ និង៣០នាទី ទៀតភ្លឺថ្ងៃទី២១ ខែកុម្ភៈ ឆ្នាំ២០១៦ តាមបណ្តោយវិថីម៉ៅសេទុង កែងផ្លូវលេខ៦៣ ក្នុងសង្កាត់បឹងកេងកងទី២ ខណ្ឌចំការមន រាជធានីភ្នំពេញ។
ជនរងគ្រោះឈ្មោះ សួស នាត អាយុ៣៦ឆ្នាំ ជាអ្នកស៊ីឈ្នួលដឹកគ្រឿងសមុទ្រអោយគេ ស្នាក់នៅក្រុងតាខ្មៅ ខេត្តកណ្តាល មានស្រុកកំណើតខេត្តស្វាយរៀង។
បើតាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុ គេឃើញជនរងគ្រោះបើករ៉ឺម៉កកង់បីចេញពីក្រុងតាខ្មៅឆ្ពោះទៅផ្សារដើមគរ ធ្វើដំណើរតាមបណ្ដោយមហាវិថីម៉ៅសេទុងលុះមកដល់ស្តុបត្រសក់ផ្អែម ស្រាប់តែមានរថយន្តម៉ាកឡិចស៊ីុស ពណ៌ខ្មៅ មួយគ្រឿង បើកបរដោយបុរសជនជាតិចិនម្នាក់ ក្នុងសង្ស័យស្រវឹងស្រាបានបើករថយន្តយ៉ាងលឿនក្នុងទិសដៅស្របគ្នា ក៏ជ្រុលទៅបុករ៉ឺម៉កកង់បីពីក្រោយពេញទំហឹង បណ្តាលឲ្យរ៉ឺម៉កកង់បីផោ្លងឡើងទៅលើខឿនបុកបង្គោលស្លាកមហាវិថីម៉ៅសេទុងកែងផ្លូវលេខ៦៣ បណ្តាលឲ្យបាក់បង្គោល ចំណែកអ្នកបើករ៉ឺម៉កកង់បីបោកក្បាលស្លាប់ភ្លាមៗនៅនឹងកន្លែងកើតហេតុតែមង្ដ។ ភ្លាមៗនោះអ្នកបើករថយន្តបង្កក៏បានព្យាយាមបើករថយន្តរត់គេចតែត្រូវសមត្ថកិច្ចដេញតាមរហូតទៅដល់ស្តុបបូកគោទើបសមត្ថកិច្ចឃាត់ខ្លួនបានអ្នកបើកបរ និងរថយន្ត។
គួរបញ្ចាក់ថា នៅក្នុងហោប៉ាវរបស់ជនរងគ្រោះមានប្រាក់ខ្មែរចំនួន១.១៨៩.០០០រៀល ដែលទុកយកទៅឲ្យម៉ូយនៅផ្សារដើមគរ តែមិនទាន់យកទៅដល់ផងក៏ជួបគ្រោះថ្នាក់ចរាចរណ៍ស្លាប់នៅតាមផ្លូវយ៉ាងអាណោចអាធ័ម។
ក្រោយពេលកើតហេតុរថយន្តបង្កនិងរ៉ឺម៉កកង់បី ត្រូវសមត្ថកិច្ចវាស់វែងយកទៅរក្សាទុកនៅការិយាល័យនគរបាលចរាចរណ៍ជើងគោកដើម្បីដោះស្រាយគ្នាតាមផ្លូវច្បាប់ ចំណែកសពជនរងគ្រោះត្រូវបានសាច់ញាតិដឹកយកទៅធ្វើបុណ្យនៅឯស្រុកកំណើត៕
...
ដោយ៖ ស រស្មី
