ក្លិប Real Madrid មានទំនាក់ទំនងយ៉ាងខ្លាំងជាមួយនឹងការផ្លាស់ប្តូរសម្រាប់កីឡាករ David Alaba ក្នុងរយៈពេល២-៣សប្តាហ៍ចុងក្រោយនេះ ប៉ុន្តែ Pau Torres ក៏ត្រូវការតម្លៃខ្លួនច្រើននៅឯក្លិបផងដែរ។ នេះបើយោងតាមការចុះផ្សាយរបស់សារព័ត៌មាន Marca កាលពីថ្ងៃទី៥ មករា ២០២១។

កីឡាករ Pau Torres ត្រូវបានគេមើលឃើញថា ជាជម្រើសមួយសម្រាប់ទាំងពេលបច្ចុប្បន្ន និងអនាគតនៅឯ Real Madrid ដោយមិនគិតពីអ្វីដែលកើតឡើងចំពោះកិច្ចសន្យារបស់ Sergio Ramos ឡើយ។ ទម្រង់លេងរបស់កីឡាករវ័យ២៣ឆ្នាំជាមួយក្លិប Villarreal ពិតជាល្អមែនទែន ខណៈដែលរូបគេបានបង្កើតភាពជាដៃគូយ៉ាងល្អជាមួយ Sergio Ramos ក្នុងនាមជាខ្សែការពារពេលលេងឲ្យជម្រើសជាតិអេស្ប៉ាញកន្លងទៅ។

ក្លិប Villarreal បានដាក់តម្លៃខ្លួនប្រមាណ៥០លានអឺរ៉ូនៅក្នុងកិច្ចសន្យារបស់ Pau Torres ប៉ុន្តែតួលេខនេះអាចត្រូវបានចរចាដោយសារតែទំនាក់ទំនងល្អរវាងក្លិបទាំង២ ដូចដែលបានបង្ហាញដោយកីឡាករTakefusa Kubo ពេលផ្លាស់ទៅ Villarreal ក្នុងលក្ខខណ្ឌជើងកាលពីរដូវក្តៅមុន។

ទោះយ៉ាងណា Real Madrid មិនមែនជាក្លិបតែមួយគត់ដែលចាប់អារម្មណ៍នឹងខ្សែការពារកណ្តាលរូបនេះនោះទេ។ ក្លិបកាំភ្លើងធំរបស់លោក Mikel Arteta ក៏បានបង្ហាញចំណាប់អារម្មណ៍ផងដែរ ប៉ុន្តែ Pau Torres កាន់តែចាប់អារម្មណ៍ក្នុងការធ្វើដំណើរទៅកាន់ទឹកដីអេស្ប៉ាញ។

មានភាពមិនច្បាស់លាស់ជាច្រើនកំពុងមាននៅក្នុងកីឡាករការពាររបស់ Real Madrid ប៉ុន្តែក្លិបបានដឹងច្បាស់ថា នេះគឺជាតំបន់មួយដែលត្រូវការពង្រឹង។ Ramos ដែលកិច្ចសន្យារបស់គាត់នឹងផុតកំណត់នៅថ្ងៃទី៣០ ខែមិថុនាមិនទាន់យល់ព្រមលើកិច្ចព្រមព្រៀងថ្មីនៅឡើយទេ ប៉ុន្តែមានក្តីសង្ឃឹមថាគាត់នឹងនៅតែបន្តនៅជាមួយក្លិបដដែល។

Eder Militao និង Nacho Fernandez បានអង្គុយកៅអីបម្រុង ក្នុងប៉ុន្មានឆ្នាំថ្មីៗនេះ ប៉ុន្តែមិនមានសម្ពាធគ្រប់គ្រាន់លើពួកគេដើម្បីឱ្យគ្រូបង្វឹកពិចារណាការផ្លាស់ប្តូរជាអចិន្រ្តៃយ៍ទេ។ ចំណែកកីឡាករ Raphael Varane វិញទោះបីមានក្លិបនៅ Premier League នៅតែចាប់អារម្មណ៍ក៏ដោយក៏គាត់គ្មានចេតនាចង់ចាកចេញពី Real Madrid ដែរ ៕

 

ដោយ៖ភារៈ