ក្នុងនាមប្រជាពលរដ្ឋម្នាក់ ខ្ញុំបាទសង្កេតឃើញថា បញ្ហាគ្រូពេទ្យនៅក្នុងសង្គមកម្ពុជាបានរុញច្រានការដឹកនាំរបស់រាជរដ្ឋាភិបាលឲ្យធ្លាក់ចុះប្រជាប្រិយភាពមួយចំណែកធំ ។ កាលមុនមានតែពលរដ្ឋប៉ុណ្ណោះ ដែលរអ៊ូរទាំបញ្ហាវិស័យសុខាភិបាលនេះ ។ ឥឡូវនេះ មន្ត្រីរដ្ឋាភិបាល អ្នកមុខ អ្នកការ ឧកញ៉ាមួយចំនួនក៏មានប្រតិកម្មចំពោះបញ្ហាវិស័យសុខាភិបាល ពោលគឺបញ្ហាគ្រូពេទ្យនៅតាមមន្ទីរពេទ្យនានានេះដែរ ។ ការទម្លាយចេញរឿងរ៉ាវទាំងឡាយដើម្បីឲ្យមានកំណែទម្រង់ ។ ប៉ុន្តែមិនឃើញមានអ្វីផ្លាស់ប្តូរជាវិជ្ជមាននោះទេ ។
កាលពីខែមុន លោកបណ្ឌិត គួច ម៉េងលី បានលើកយកមួយករណីនៃបញ្ហាសីលធម៌គ្រូពេទ្យមកនិយាយ ដែលធ្វើឲ្យគណៈគ្រូពេទ្យកម្ពុជាមានប្រតិកម្ម ដោយស្នើឲ្យលោក គួច ម៉េងលី សុំទោសជាសាធារណៈ ។ លោកគួច ម៉េងលី ដាច់ខាតមិនសុំទោសទេ ។ គណៈគ្រូពេទ្យកម្ពុជាបន្តទទូចស្នើឲ្យលោក គួច ម៉េងលី សុំទោស ។ លោកគួច ម៉េងលី នៅតែមិនសុំទោស ក្នុងហេតុផលថា លោកគ្មានកំហុសនោះទេ ព្រោះអ្វីដែលលោកបានលើកឡើងជាការពិត ។ យ៉ាងដូច្នេះ គណៈគ្រូពេទ្យកម្ពុជាស្ងាត់ឈឹង ធ្វើដូចជាមិនដឹងរឿងទៅ ។
រឿងនេះនរណាក៏ដឹងនៅកម្ពុជា! គឺរឿងគ្រូពេទ្យខ្វះសីលធម៌ ឬមិនយកចិត្តទុកដាក់ក្នុងវិជ្ជាជីវៈដើម្បីសង្គ្រោះអ្នកជំងឺ ។ បើឲ្យគេធ្វើប្រជាមតិ នោះគឺគណៈគ្រូពេទ្យកម្ពុជាត្រូវរងនូវភាពអាម៉ាស់ខ្លាំងជាមិនខាន ។ បើទោះបីជាវាមិនទាំងស្រុង ចំពោះចំណុចអវិជ្ជមាននៃក្រុមគ្រូពេទ្យយ៉ាងណាក៏ដោយ ប៉ុន្តែកំហុសលេចធ្លោបានលេចឡើងនៅពេលដែលមានបញ្ហាមួយ ដោយសារតែការខ្វះការយកចិត្តទុកដាក់ពីគ្រូពេទ្យ ។
ថ្មីៗនេះទៀត លោករដ្ឋមន្ត្រីក្រសួងព័ត៌មាន ខៀវ កាញារីទ្ធ និងជាអ្នកនាំពាក្យរដ្ឋាភិបាលកម្ពុជាបានបង្ហោះសារ នៅលើបណ្តាញសង្គមហ្វេសប៊ុករបស់លោកថា «ហួសចិត្តមិនដឹងនិយាយយ៉ាងម៉េចនោះទេចំពោះការវិនិច្ឆ័យរបស់ពេទ្យនៅមន្ទីរពេទ្យព្រះកុសុមៈ ហៅពេទ្យលោកសង្ឃ» ។ លោករដ្ឋមន្ត្រីបានសរសេរថា «មិនដឹងនិយាយយ៉ាងម៉េច មន្ត្រីខ្ញុំ ទៅពេទ្យលោកសង្ឃ គេ(ពេទ្យ)ប្រាប់ថា កើតមហារីក តែទៅដល់វៀតណាម គេប្រាប់ថា អត់មានអីទេ! តើគួរមានសវនកម្មវិជ្ជាជីវៈគ្រូពេទ្យឬទេ» ។
ខ្ញុំបាទបានតាមដានព័ត៌មាននេះមិនឃើញមានប្រតិកម្មពីខាងក្រសួងសុខាភិបាល ឬគណៈគ្រូពេទ្យនៅឡើយ ។ ឬមួយថា ការលើកឡើងរបស់រដ្ឋមន្ត្រីក្រសួងព័ត៌មានជារឿងបុគ្គល? ប៉ុន្តែយ៉ាងណាក៏ដោយ ខ្ញុំបាទយល់ថា វិស័យសុខាភិបាលហាក់ដូចជារងនូវភាពអាម៉ាស់កាន់តែខ្លាំងឡើង ៕
ដោយ៖ ប្រជាពលរដ្ឋម្នាក់
