ប្រភពព័ត៌មានពីមន្ត្រីអាមេរិកបានបង្ហើបឲ្យដឹងកាលពីថ្ងៃទី២៣ ខែកុម្ភៈ ឆ្នាំ២០១៦ថា ប្រទេសចិនបានចាប់ផ្តើមដាក់ពង្រាយយន្តហោះចម្បាំងច្រើនគ្រឿង ស្ថិតនៅលើដែនកោះដែលកំពុងមានជម្លោះនៅសមុទ្រចិនខាងត្បូង បន្ទាប់ពីប្រទេសនេះ ទើបតែបានដាក់ពង្រាយប្រព័ន្ធមីស៊ីលបាញ់ចេញពីផ្ទាល់ដីទៅលើលំហរអាកាសកាលពីពេលថ្មីៗកន្លងមកនេះ នៅលើដែនកោះដដែលនោះ ។
ប្រភពព័ត៌មានដែលគេដងស្រង់ចេញពីមន្ត្រីយោធាអាមេរិក ដែលសុំមិនឲ្យបញ្ចេញឈ្មោះបានបញ្ជាក់ប្រាប់ប្រភពព័ត៌មាន Fox News ថា ក្រុមស៊ើបការណ៍សម្ងាត់របស់អាមេរិកបានទទួលព័ត៌មានថា កងកម្លាំងយោធាប្រទេសចិនបានដាក់ពង្រាយយន្តហោះចម្បាំងធុនទំនើបៗ ដូចជាយន្តហោះចម្បាំងប្រភេទ Shenyang J-11 និងយន្តហោះចម្បាំង ប្រភេទ Xian JH-7 ផងដែរ ស្ថិតនៅលើដែនកោះ Woody ក្នុងប្រជុំដែនកោះ Paracel ហើយជាកោះដែលកំពុងមានជម្លោះជាមួយប្រទេសជិតខាង ។ ការដាក់ពង្រាយយន្តហោះចម្បាំងនេះ ទើបតែកើតមានកាលពីពីរ បីថ្ងៃកន្លងមកប៉ុណ្ណោះ ។
អ្នកនាំពាក្យកងកម្លាំងទាហានអាមេរិកឈរជើងនៅមហាសមុទ្រប៉ាស៊ីហ្វិក លោក Darryn James បានថ្លែងបញ្ជាក់ទទួលស្គាល់ពាក់ព័ន្ធព័ត៌មានខាងលើនេះថា ពិតជាមានការចល័តយន្តហោះចម្បាំងនៅលើដែនកោះដែលកំពុងមានជម្លោះនោះមែន ។
ដែនកោះ Woody ត្រូវប្រទេសតៃវ៉ាន់ និងវៀតណាមទាមទារថា ស្ថិតនៅក្នុងដែនអធិបតេយ្យរបស់ខ្លួនផងដែរ និងទាមទារជាតំបន់ត្រួតស៊ីគ្នាជាមួយប្រទេសចិន ។ កាលពីអំឡុងឆ្នាំ១៩៩០ ដែនកោះ Woody ត្រូវគេប្រើប្រាស់ធ្វើជាបន្ទាយកងទ័ពជើងអាកាស ។ ប៉ុន្តែទោះបីយ៉ាងណា កាលពីឆ្នាំមុននេះ ចិនបានកែលម្អ សម្រាប់ជាទីតាំងរបស់យន្តហោះចម្បាំង J-11 ។ លោក James បានបញ្ជាក់ថា អាមេរិកនៅតែមានការព្រួយបារម្ភជាពន់ពេកចំពោះសកម្មភាពរបស់ចិនដែលចេះតែបន្តដាក់អាវុធធុនទំនើបៗនៅលើដែនកោះដែលកំពុងមានជម្លោះខាងលើនេះ ។
ព័ត៌មានខាងលើនេះបានលេចឮឡើង ខណៈដែលរដ្ឋមន្ត្រីការបរទេសចិន លោក Wang Yi បាននិងកំពុងជួបពិភាក្សាជាមួយរដ្ឋមន្ត្រីការបរទេសអាមេរិក លោកចន ឃើរី នៅក្នុងទីក្រុងវ៉ាស៊ីនតោន ។
កាលពីសប្តាហ៍កន្លងមកនេះ ប្រទេសចិនបានទទួលស្គាល់ថា ខ្លួនពិតជាបានដាក់ពង្រាយអាវុធនៅលើដែនកោះ Woody ដែលការដាក់ពង្រាយកាំជ្រួចមីស៊ីលនោះគឺដើម្បីការពារសិទ្ធិនៅក្នុងការពារខ្លួន លើដែនអធិបតេយ្យរបស់ខ្លួន។ មន្ត្រីអាមេរិកបានប្រាប់ប្រភព AFP ថា ទីក្រុងប៉េកាំងបានដាក់ពង្រាយប្រព័ន្ធមីស៊ីលបាញ់ផ្ទាល់ដីទៅលើលំហរអាកាសនៅលើដែនកោះ Woody ។ កាំជ្រួចមីស៊ីលនោះជាប្រភេទមីស៊ីល HQ-9s ដែលមានសមត្ថភាពហោះហើរក្នុងរយៈចម្ងាយ២០០គីឡូម៉ែត្រ ។
រដ្ឋមន្ត្រីការបរទេសចិនលោក Wang Yi មានគម្រោងបំពេញទស្សនកិច្ចទៅកាន់ទីក្រុងវ៉ាស៊ីនតោនតាំងពីមុនមកម្ល៉េះ ប៉ុន្តេគម្រោងត្រូវលុបចោលដោយសារតែរបៀបវារៈមានការខ្វែងគំនិតគ្នា ។ នេះបើតាមការបញ្ជាក់ឲ្យដឹងពីមន្ត្រី ។
កាលពីពេលថ្មីៗកន្លងមកនេះ មជ្ឈមណ្ឌលសិក្សាស្រាវជ្រាវយុទ្ធសាស្ត្រអន្តរជាតិ មានមូលដ្ឋាននៅទីក្រុងវ៉ាស៊ីនតោនបានបញ្ចេញរូបភាពចាប់បានពីផ្កាយរណបបង្ហាញឲ្យឃើញថា នៅលើដែនថ្មប៉ប្រះទឺក Cuarteron ស្ថិតនៅប្រជុំដែនកោះស្ព្រាតលី មានការដំឡើងសាងសង់ប្រព័ន្ធរ៉ាដានៅទីនោះយ៉ាងឆាប់រហ័ស ។
ការប្រកាសទាមទារដែនដីនៅសមុទ្រចិនខាងត្បូងពីសំណាក់ប្រទេសចិន ក៏ដូចជាសកម្មភាពពង្រឹងសមត្ថភាពកងកម្លាំងយោធា និងការដាក់ពង្រាយអាវុធនៅទីនោះជាដើមធ្វើឲ្យពិភពលោកមានការព្រួយបារម្ភ ហើយប្រទេសខ្លះបានថ្កោលទោសចំពោះសកម្មភាពនេះ ជាពិសេសអាមេរិកតែម្តង ។ អាមេរិកបានបញ្ជាក់ថា ខ្លួននឹងបន្តបញ្ជូននាវាចម្បាំងទៅកាន់ដែនទឹកដែលទីក្រុងប៉េកាំងប្រកាសទាមទារអះអាងថា ជារបស់ខ្លួននោះ ៕
ប្រែសម្រួល៖ ថាច់ យ៉ាត
