ខេត្តក្រចេះ៖ពលរដ្ឋចំនួន៦នាក់ តំណាងឱ្យពលរដ្ឋ៥៤៦គ្រួសារ រស់នៅក្នុងឃុំឬស្សីកែវ ស្រុកព្រែកប្រសព្វ ខេត្តក្រចេះ ត្រូវបានតំណាងអយ្យការសាលាដំបូងខេត្ត កោះហោះឱ្យចូលខ្លួនមកបំភ្លឺ នៅថ្ងៃទី២៤ខែកុម្ភៈនេះ ក្រោយពីពួកគាត់បាននាំគ្នាផ្តិតមេដៃប្តឹងឧកញ៉ា២រូប និងអ្នកមានអំណាចមួយចំនួនពីបទកាប់រានដីព្រៃសាធារណៈរបស់រដ្ឋធ្វើជាកម្មសិទ្ឋឯកជនទៅសាលាដំបូងខែត្រក្រចេះ។
ចំណែកពលរដ្ឋបានអះអាងថា ពួកគាត់និងចូលខ្លួនទៅបំភ្លឺនៅមុខតំណាងអយ្យការ ម្នាក់ដងៗ ព្រោះពួកគាត់មានភស្តុតាងជាក់លាក់ ក្នុងការចោទប្រកាន់លោកឧកញ៉ាទាំងពីររូបនោះ ទាក់ទិនការកាប់ឆ្ការដីព្រៃជាតំបន់ព្រៃស្រោងឋិតនៅឃុំឫស្សីកែវស្រុកព្រែកប្រសព្វ។
យ៉ាងណាក៏ដោយ ពលរដ្ឋទាំងនោះបានទាមទារឲ្យឧកញ៉ាទាំងពីរនិងអ្នកពាក់ព័ន្ធមួយចំនួនទៀត ត្រូវចេញមុខទទួលខុសត្រូវការបាត់បង់តំបន់ព្រៃស្រោងជាង៣ពាន់ហិកតារហើយបច្ចុប្បន្នបានក្លាយជាទីដីវាលនិងគ្រប់គ្រងជាកម្មសិទ្ធិឯកជន។លើសពីនេះពួកគាត់អះអាងថាអ្នកភូមិមានភស្តុតាងជាក់លាក់ទាក់ទិនការកាប់ឆ្ការដីព្រៃជាតំបន់ព្រៃស្រោងឋិតនៅឃុំឫស្សីកែវ ស្រុកព្រែកប្រសព្វដោយចោទប្រកាន់ឧកញ៉ាចំនួនពីររូប១ឈ្មោះប៊ុតប៊ុនអេងហៅអេងនិង២ឧកញ៉ាលឹមប៊ុនណ្ណាហៅខ្នានិងអ្នកពាក់ព័ន្ធមួយចំនួនទៀត។
តំណាងពលរដ្ឋម្នាក់ គឺអ្នកស្រី គឹម យ៉េង បានអះអាងថា នៅក្នុងអំឡុងឆ្នាំ២០១៥ មានអ្នកភូមិចំនួន៥៤៥គ្រួសារ មកពី៤ភូមិ គឺភូមិស្វាយជ្រុំ ភូមិបឹងរៃ ភូមិឬស្សីកែវ និងភូមិស្រឡៅតំណាក់ ក្នុងឃុំឬស្សីកែវ ស្រុកព្រែកប្រសព្វ បាននាំគ្នាផ្តិតមេដៃប្តឹងឧកញ៉ា២រូប មួយគឺឧកញ៉ា លឹម ប៊ុនណ្ណា ហៅខ្នា រស់នៅស្រុកដំបែរ ខេត្តត្បូងឃ្មុំ និងឧកញ៉ាម្នាក់ទៀតឈ្មោះ ប៊ុត ប៊ុនអេង ហៅអេង រស់នៅស្រុកស្ទឹងត្រង់ ខេត្តតំពង់ចាម ។ ពលរដ្ឋទាំងនោះ បានចោទលោកឧកញ៉ាទាំងពីរ និងអ្នកពាក់ពន្ឋមួយចំនួនទៀត ថាបានយកគ្រឿងចក្រមកឈូសឆាយដីព្រៃសហគមន៍ និងដីសម្បទានសង្កមកិច្ច របស់ប្រជាពលរដ្ឋក្នុងឃុំឬស្សីកែវ ធ្វើជាកម្មសិទ្ឋរបស់ខ្លួន ។
តំណាងពលរដ្ឋគឺអ្នកស្រីគឹមយ៉េងបានរៀបរាប់ថាតំបន់ព្រៃស្រោងមានទំហំជាង៣ពាន់ហិកតារឋិតនៅតំបន់អូរស្ទឹងឡានៃឃុំឫស្សីកែវត្រូវបានឧកញ៉ាប៊ុត ប៊ុនអេងនិងឧកញ៉ាលឹម ប៊ុនណ្ណា ព្រមទាំងអ្នកពាក់ព័ន្ធផ្សេងទៀតសម្រុកកាប់ឆ្ការរានយកដីជាសកម្មសិទ្ធិតាំងពីឆ្នាំ២០០៩ដោយគ្មានការទទួលខុសត្រូវ។ លោកស្រីបញ្ចាក់ថា ការកាប់ឈូសឆាយដី និងការទិញដីលក់ដី ពីសំណាក់ឧកញ៉ទាំង២ គឺមានការឃុបឃិតគ្នា ជាមួយអាជ្ញាធរមូលដ្ឋាននិងមន្ត្រីជំនាញ ហើយក្រុមមន្ត្រីទាំងនេះ អាចទទួលបានផលប្រយោជន៍ ពីឧកញ៉ាទាំងពីរនាក់នេះ បានជាមិនយកចិត្តទុកដាក់ទប់ស្កាត់ការឆ្ការដីព្រៃសាធារណៈរបស់រដ្ឋ ពីសំណាក់ក្រុមឈ្មួញមានអំណាចទាំងនេះ ។ លោកស្រីថា អ្នកភូមិមានភស្តុតាងគ្រប់គ្រាន់ដើម្បីឆ្លើយបំភ្លឺនៅមុខតំណាងអយ្យកា ទាក់ទិនការកាប់ឆ្ការដីព្រៃជាតំបន់ព្រៃស្រោងឋិតនៅឃុំឫស្សីកែវស្រុកព្រែកប្រសព្វ ខេត្តក្រចេះ ។
ព្រះរាជអាជ្ញារងសាលាដំបូងខេត្តក្រចេះ លោកហាក់ហ៊ាន់បានឱ្យដឹងតាមទួរសព្ទ័ថា ពិតជាមានការកោះហៅតំណាងពលរដ្ឋឱ្យចូលមកបំភ្លឺ នៅមុខតំណាងអយ្យការពិតមែន ហើយការកោះហៅនេះគឺសាកសួរពាក់ពន្ឋរឿងដីធ្លី ដោយពលរដ្ឋបានចោទឧកញា ខ្នា និងឧកញ៉ា អេង ថាបានរំលោភដីពួកគាត់ និងកាប់ឆ្កាដីព្រៃរបស់រដ្ឋធ្វើជាកម្មសិទ្ឋ ។ លោកថាក្រោយពីសាកសួរពលរដ្ឋហើយនោះ នៅក្នុងអំឡុងខែមិនា ខាងមុខនេះ តំណាងអយ្យកានិងកោះហៅឧកញ៉ាចំនួនពីររូបឱ្យចូលខ្លួនមកបំភ្លឺផងដែរ ។ លោកថា ប្រសិនបើតំណាងអយ្យការរកឃើញថាមានឧកញ៉ានិងអ្នកពាក់ព័ន្ធមួយចំនួនជាប់ពាក់ព័ន្ធកាប់រានដីព្រៃឈើខុសច្បាប់ត្រូវទទូលខុសត្រូវចំពោះមុខច្បាប់ ។
តំណាងពលរដ្ឋម្នាក់ទៀតគឺលោកស្រី ជិត ច្រឹប អាយុ៥៥ឆ្នាំ បានឱ្យដឹងថា ពួកគាត់ឡើងមកតុលាការថ្ងៃនេះ គឺមកបំភ្លឺរឿងពួកគាត់ប្តឹងឧកញ៉ា ខ្នា និងឧកញ៉ា អេង ព្រោះឧកញ៉ាទាំងពីរនេះគាត់មានលុយ មានអំណាច គាត់បានយកគ្រឿងចក្រឈូសឆាយដីព្រៃសាធារណៈរបស់រដ្ឋ ។ លោកស្រីបន្តថា ដីព្រៃចំនួន៣២១០ហិកតារ ត្រូវបានក្រុមឧកញ៉ាទាំង២រូប កាប់ឆូសឆាយដីព្រៃស្រោងឋិតនៅឃុំឬស្សីកែវ ស្រុកព្រែកប្រសព្វ ធ្វើជាកម្មសិទ្ឋ និងមួយចំនួនទៀតត្រូវក្រុមឧកញ៉ាទាំងពីរនេះ បន្តលក់ទៅឱ្យក្រុមឈ្មួញបន្តទៀត ហើយពួកគាត់ទាមទារឲ្យឧកញ៉ាទាំងពីរនេះនិងអ្នកពាក់ព័ន្ធមួយចំនួនទៀតត្រូវចេញមុខទទួលខុសត្រូវការបាត់បង់តំបន់ព្រៃស្រោងជាង៣ពាន់ហិកតារនេះ ៕
ដោយ៖ កោះទ្រុង
