ខេត្តកំពង់ស្ពឺ៖ ហេតុការណ៍ដែលមិនគួរអោយកើតមានឡើងមួយនៅក្នុងរង្វង់ពិធីមង្គលការអំឡុងពេលដែលកូនក្រមុំនិងកូនកំលោះកំពុងតែកាត់នំស្រាប់តែសាច់ញាតិទាំងសងខាងបើកឆាកប្រយុទ្ធគ្នាយ៉ាងស៊ីសាច់ហុតឈាមចុងក្រោយជនរងគ្រោះម្នាក់ត្រូវបានស្លាប់ពេលបញ្ជូនដល់មន្ទីរពេទ្យរីឯក្រុមជនបង្កបានរត់គេចខ្លួន។ពេលនេះសមត្ថកិច្ចកំពុងតែធ្វើការស្រាវជ្រាវនិងតាមចាប់ខ្លួនក្រុមជនបង្កយកមកផ្ដន្ទាទោស។
ហេតុការណ៍ប្រយុទ្ធគ្នានេះបានកើតឡើងនៅថ្ងៃទី ២៤ខែមករាឆ្នាំ២០២១ វេលាម៉ោង ២២៖៤៥នាទីយប់ មានករណីហិង្សាដោយចេតនា (ស្លាប់ និងរបួស ) នៅក្នុងកម្មវិធីរៀបអាពារហ៍ពិពារហ៍ ស្ថិតនៅភូមិធ្លកយល់ ឃុំអង្គពពេល ស្រុកគងពិសី ខេត្តកំពង់ស្ពឺ បង្កឡេីង រវាងក្រុមខាងកូនកំលោះ មកពីភូមិ សាលាគ្រួស ឃុំព្រះនិព្វាន និង ក្រុមកូនក្រមុំ បានធ្វេីសកម្មភាពវាយប្រតាយប្រតប់គ្នាយកកែវគប់គ្នាទៅវិញទៅមក និងបានចាក់ បណ្តាលអោយរងរបួស ស្រាល៥ នាក់ និងស្លាប់០១នាក់។
-ភាគីខាងកូនក្រមុំ ៖
១.ឈ្មោះ ជួន នរាជ ភេទប្រុស អាយុ៣០ឆ្នាំ (រងរបួសធ្ងន់ធ្លាយពោះវៀន)ស្លាប់ពេលទៅដល់ពេទ្យកាល់ម៉ែត ភ្នំពេញ
២.ឈ្មោះ សំ ពិសិដ្ឋ ហៅប៉ង់ ភេទប្រុស អាយុ២៩ឆ្នាំ (រងរបួសស្រាល)
៣. ឈ្មោះ ម៉ាច វណ្ណៈ ហៅឆក ភេទប្រុស អាយុ២២ឆ្នាំ( របួសស្រាល)
៤. ឈ្មោះ មុត ណាំឈាវ ភេទប្រុស អាយុ២៣ឆ្នាំ (របួសស្រាល)
ទាំងបួននាក់ នៅភូមិធ្លកយល់ ឃុំ អង្គពពេល ស្រុកគងពិសី ខេត្តកំពង់ស្ពឺ ។
-ចំណែកភាគីខាងខាងកូនកំលោះ ៖
១. ឈ្មោះ ឡែន ភេទប្រុស រស់នៅភូមិ សាលាគ្រួស ឃុំព្រះនិព្វាន (របួសស្រាល)
២. ឈ្មោះ កប តាក់ ភេទប្រុស អាយុ៣១ ឆ្នាំ នៅភូមិសាលាគ្រួស ឃុំព្រះនិព្វាន (របួសស្រាល)។
ប្រភពបានឱ្យដឹងថាករណីខាងលើកំពុងស្រាវជ្រាវបន្តដើម្បីចាប់ខ្លួនក្រុមជនបង្កយកមកផ្ដន្ទាទោសតាមផ្លូវច្បាប់៕
ដោយ៖សេនាស័ក្តិ
