សូមរំឮកថា,  កាលពីថ្ងៃទី២៦ ខែមករា ឆ្នាំ២០២១កន្លងទៅ លោក ខៃ សម្ផស្ស ព្រះរាជអាជ្ញារងអមសាលាដំបូងខេត្តកំពង់ស្ពឺ បានចេញដីកាកោះហៅជនសង្ស័យឈ្មោះ សូយ ចាន់សឿន ជាឧត្តមសេនីយ៍ទោ និង មានតួនាទី ជានាយរងទីចាត់ការអភិវឌ្ឍន៍ អគ្គបញ្ជាការដ្ឋាន នៃក្រសួងការពារជាតិ អោយចូលបំភ្លឺ នាព្រឹកថ្ងៃទី១៥ ខែកុម្ភៈ ឆ្នាំ២០២១ ខាងមុខនេះ ដើម្បីសាកសួរពីដំណើររឿង «ប្រើហិង្សាដោយមានស្ថានទម្ងន់ទោស និង បង្ខាំងមនុស្សដោយខុសច្បាប់» ។

រីឯបក្សពួកម្នាក់ទៀតឈ្មោះ ស្រី សម្បត្តិ ភេទប្រុស មានតួនាទីជានាយស្តីទីការិយាល័យអភិវឌ្ឈន៍ អគ្គបញ្ជាការដ្ឋាន នៃក្រសួងការពារជាតិ ក៍ត្រូវបានតុលាការចេញដីកាកោះហៅអោយចូលបំភ្លឺ នារសៀលថ្ងៃទី៨ ខែកុម្ភៈ ឆ្នាំ២០២១ ខាងមុខនេះផងដែរ។

ដីកាកោះហៅនេះ អយ្យការអមសាលាដំបូងខេត្តកំពង់ស្ពឺ បានចេញកាលពីថ្ងៃទី២៦ ខែមករា ឆ្នាំ២០២១កន្លងទៅនេះ ក្រោយស្ត្រីម្នាក់ឈ្មោះ ឌួង ហេម៉ាលីស បានពាក្យបណ្ដឹងចូលនៅថ្ងៃទី២៥ ខែមករា ឆ្នាំ២០២១។ រីឯដីកាកោះហៅលោកស្រី សម្បត្តិ បានចេញកាលពីថ្ងៃទី២៧ ខែមករា ឆ្នាំ២០២១ ។

ស្ត្រីរងគ្រោះបានបញ្ជាក់ក្នុងពាក្យបណ្តឹងថា,  «កាលពីវេលាម៉ោង១០ ព្រឹកថ្ងៃទី២២ ខែមករា ឆ្នាំ២០២១ នៅក្នុងរថយន្តដែលកំពុងជិះតែពីរនាក់ នៅលើដងផ្លូវស្ថិតនៅរង្វង់មូលតាខ្មៅ ទីរួមខេត្តកណ្ដាល ឈ្មោះ សូយ ចាន់សឿន បានវាយដំមកលើនាងខ្ញុំ និងបានដកកាំភ្លើងខ្លីភ្ជង់មកលើនាងខ្ញុំមិនអោយខ្ញុំស្រែក និងគម្រាមបាញ់បំបាក់ជើងនិងបាញ់សម្លាប់ តាមផ្លូវរហូតទៅដល់ខេត្តកំពង់ស្ពឺ ស្ថិតនៅភូមិចំការចេក ឃុំត្រែងត្រយឹង ស្រុកភ្នំស្រួចខេត្តកំពង់ស្ពឺ ព្រមទាំងចាប់បង្ខាំងនាងខ្ញុំនៅក្នុងផ្ទះកូនចៅរបស់គាត់ ឈ្មោះស្រីសម្បត្តិ ដែលមានតួនាទីជានាយស្ដីទីការិយាល័យអភិវឌ្ឍន៍ នៃអគ្គបញ្ជាការក្រសួងការពារជាតិ រហូតដល់ម៉ោង ៧ យប់ថ្ងៃខែឆ្នាំដដែល ទើបមានសមត្ថកិច្ចនគរបាលចុះមកអន្តរាគមន៍ រំដោះនាងខ្ញុំចេញពីផ្ទះដែលបានបង្ខាំងយកទៅសង្គ្រោះនៅមន្ទីរពេទ្យ»។

ដោយឡែកខាងក្រោមនេះជាពាក្យបណ្តឹងរបស់មេធាវីតំណាងស្ត្រីរងគ្រោះប្ដឹងចូលក្រសួងយុត្តិធម៍, ក្រសួងមហាផ្ទៃ និងក្រសួងកិច្ចការនារី ដើម្បីទាមទាររកយុត្តិធម៌ ទៅតាមផ្លូវច្បាប់ ខណ:ជនបង្កជានាយទាហាន ៕

ដោយ: សិលា