ប្រទេសថៃ: នាយកដ្ឋានប្រឆាំងបទលល្មើសគ្រឿងញៀនថៃ បានឲ្យដឹងថា, កម្លាំងប្រឆាំងគ្រឿងញៀនបាន ឃាត់ចាប់ខ្លួនលោក Lee Chung Chak មេជួញដូរគ្រឿងញៀនធំលំដាប់ទីពីរនៅក្នុងទ្វីបអាស៊ី។
លោកLee Chung Chakជាមេក្លោងជួញដូរគ្រឿងញៀនធំទីពីរមកពី Sam Gor ដែលជាក្រុមជួញដូរគ្រឿងញៀនធំបំផុតក្នុងទ្វីបអាស៊ី ប៉ាស៊ីហ្វិក ដោយមានប្រាក់រហូតដល់ទៅ៧០ពាន់លានដុល្លារអាមេរិក ។
សូមបញ្ជាក់ថាការ ឃាត់ចាប់ខ្លួនលោក Lee Chung Chak តាំងពីខែតុលាឆ្នាំ២០២០ គឺក្រោយពេលប៉ុន្មានខែដែលមេជួញដូរគ្រឿងញៀនលំដាប់ទីមួយគឺលោកTse Chi Lop ត្រូវប៉ូលិសហុល្លង់ចាប់ខ្លួន នៅអាកាសយានដ្ឋាន។ ប៉ូលិសហុល្លង់បានឲ្យដឹងថា, លោក Tse Chi Lop គឺជាមេក្លោងធំបំផុត របស់ក្រុមSam Gor ដោយមានឈ្មោះផ្សេងទៀតថា “The Company” ។ មេក្លោងទាំងពីរគឺជាមិត្តភក្តិ ហើយបានដំណើរការជួញដូរគ្រឿងញៀនរយៈពេល ជាង៤០ឆ្នាំកន្លងមក។
នៅក្នុងឯកសារឆ្នាំ២០១៨ ប៉ូលិសអូស្ត្រាលី បានឲ្យដឹងថា បានកំណត់គោលដៅក្រុមជួញដូរគ្រឿងញៀន ។ នៅក្នុងឯកសារ លោក Lee Chung Chak ជាអគ្គនាយក ទទួលបន្ទុក ការជួញដូរគ្រឿងញៀននៅតាមព្រំដែន។
ពាក់ព័ន្ធការចាប់ខ្លួនលោក Lee Chung Chak ឧត្តមសេនីយ៍Montri Yimyaem ប្រធាននាយករដ្ឋដ្ឋានប្រឆាំងបទល្មើសគ្រឿងញៀន ថៃបានឲ្យដឹងថា, «ជនសង្ស័យត្រូវបានប៉ូលិសថៃ ចាប់ខ្លួននៅថ្ងៃទី១ខែតុលាឆ្នាំ២០២០ តាមដីការចាប់ខ្លួនរបស់តុលាការថៃ តាមសំណើររបស់អូស្ត្រាលី ។ ពេលនេះការនាំខ្លួនទៅកាន់ អូស្ត្រាលី គឺស្ថិតនៅលើតុលាការថៃ »៕
ដោយ, ធី រីណា
