ភ្នំពេញ ៖ បុរសម្នាក់បានមកពីផឹកស៊ីស្រវឹងរួចជិះម៉ូតូត្រលប់មកផ្ទះដោយជិះម៉ូតូលឿនពេក និងបួងចង្កូតមិនកោងតាមផ្លូវ ក៏ជ្រុលទៅបុកខឿនសួនច្បារក្រោមស្ពានអាកាសក្បាលថ្នល់ បណ្តាលឲ្យដួលបែកមុខមាត់យ៉ាងតំណំ ។ កាលពីវេលាម៉ោង១និង១០នាទីរំលងអធ្រាត្រឈានចូលថ្ងៃទី២៦ ខែកុម្ភៈ ២០១៦ នៅតាមបណ្តោយផ្លូវជាតិលេខ២ ក្នុងភូមិព្រែកតានូ សង្កាត់ចាក់អង្រែលើ ខណ្ឌមានជ័យ។
តាមសំដីមិត្តភក្រ័របស់ជនរងគ្រោះបានឲ្យដឹងថា ជនរងគ្រោះជាអ្នករត់ម៉ូតូឌុបនៅមុខខារ៉ាអូខេ168 ចាក់អង្រែលើ ផ្លូវជាតិ២ មុនពេលកើតហេតុបានផឹកស្រាស្រវឹងហើយបានជិះម៉ូតូមួយគ្រឿងម៉ាកហុងដាឌ្រីម ពណ៌ខ្មៅពាក់ស្លាកលេខភ្នំពេញ1FF-7001បើកពីត្បូងទៅជើងជិះតែម្នាក់ឯងលុះមកដល់ក្រោមស្ពានអាកាសក្បាលថ្នល់ មានផ្លូវកោងហើយអ្នកបើកបរស្រវឹងខ្លាំងពេកបួងចង្កូតមិនទាន់ជ្រុលទៅបុកខឿនសួនច្បារបណ្តាលអោយដួលរងរបួសបែកមុខមាត់ ចំណែកឯម៉ូតូខូចចង្កឹះលេខ។
ក្រោយពេលកើតហេតុ ជនរងគ្រោះរួមនិងម៉ូតូ ត្រូវបានមិត្តភក្តិនាំទៅកាន់និងព្យាបាល នៅគ្លីនិកឯកជនច្បារអំពៅដោយមិនរំខានដល់សមត្ថកិច្ចឡើយ ៕
ដោយ៖ជីម ភារ៉ា ដង្កោ
