អន្តរជាតិ៖ មន្ត្រីចារកម្មយោធាកូរ៉េខាងជើង ០៣រូប ត្រូវបានក្រសួងយុត្តិធម៌អាមេរិក ចោទប្រកាន់ជាផ្លូវការលើពីបទដឹកនាំយុទ្ធនាការវាយប្រហារផ្នែកព័ត៌មានវិទ្យា (Hack) លួចលុយអេឡិចត្រូនិកគ្រីបតូ (crypto) និងលុយពីធនាគារជាច្រើន នៅជុំវិញពិភពលោកប្រមាណជា ១.៣ពាន់លានដុល្លារអាមេរិក។
បើតាមសារព័ត៌មាន CNA បានចុះផ្សាយនៅព្រឹកថ្ងៃព្រហស្បតិ៍ ទី១៨ ខែកុម្ភៈ ឆ្នាំ២០២១នេះថា៖ នេះគឺជាការចោទប្រកាន់ប្រឆាំងនឹង ក្រុមមន្ត្រីកូរ៉េខាងជើងជាលើកដំបូងបំផុត ដោយរដ្ឋបាលប្រធានាធិបតីអាមេរិក លោក ចូ បៃដិន។
ជាក់ស្ដែងក្រសួងយុត្តិធម៌អាមេរិក បានបញ្ជាក់ថា បុរសទាំង ០៣រូបខាងលើនេះ គឺជាមន្ត្រីចារកម្មយោធាកូរ៉េខាងជើង ត្រូវបានគេបញ្ជាក់អត្តសញ្ញាណទី១,មានឈ្មោះ ចុន ឆាងយ៉ុក (Jon Chang Hyok), ទី២ឈ្មោះ គីម អ៉ីល (Kim Il) និងទី៣ឈ្មោះ ផាក ជីនយ៉ុក (Park Jin Hyok)។ ហើយមន្ត្រីទាំងបីនាក់នេះបម្រើការឲ្យការិយាល័យស៊ើបការណ៍សម្ងាត់ទូទៅកូរ៉េខាងជើង ដែលជាក្រុមការងារព័ត៌មានវិទ្យា ត្រូវបានអ្នកជំនាញសន្តិសុខស្គាល់ថា ជាក្រុមវាយប្រហារឡាហ្សារឹស (Hacker Lazarus Group) ឬ APT 38។
គួរជម្រាបថា កូរ៉េខាងជើង មិនទាន់ប្រតិកម្មអ្វីទៅនឹងការចោទប្រកាន់ របស់ក្រសួងយុត្តិធម៌អាមេរិកឡើយ។ ទោះជាយ៉ាងណា ជារឿយៗទីក្រុងព្យុងយ៉ាងតែងតែច្រានចោល រាល់ការចោទប្រកាន់បែបនេះ៕ដោយ៖ស តារា
រូបភាព៖ឯកសារ(Hack)
