រដ្ឋមន្ត្រីក្រសួងរតនាគារជាតិអាមេរិក ថា៖ អាមេរិកនៅតែរក្សាពន្ធនាំចូលលើទំនិញរបស់ចិនដដែល

ចែករំលែក៖

អន្តរជាតិ៖ តាមការលេីកឡេីងរបស់រដ្ឋមន្ត្រីក្រសួងរតនាគារជាតិអាមេរិកលោកស្រី Janet Yellen បាននិយាយនៅថ្ងៃទី១៨ ខែកុម្ភៈថា រដ្ឋបាលលោកប្រធានាធិបតី ចូ បៃឌិន អនុវត្តគោលនយោបាយពាណិជ្ជកម្មដាក់ពន្ធលើទំនិញចិន ដែលដាក់ចេញដោយអតីតប្រធានាធិបតី ដូណាល់ ត្រាំ មួយរយៈសិន។ រដ្ឋមន្ត្រីរូបនេះ បន្តថា បច្ចុប្បន្នរដ្ឋបាលលោក ចូ បៃឌិន នឹងពិនិត្យគោលនយោបាយទាំងនោះសារជាថ្មី មុននឹងត្រូវពិចារណាថានឹងត្រូវកែប្រែ ឬលុបចោល។

លោកស្រី Janet Yellen ក្នុងកិច្ចសម្ភាសន៍ជាមួយទូរទស្សន៍អាមេរិក CNBC នៅថ្ងៃទី១៨ ខែកុម្ភៈ បានបញ្ជាក់យ៉ាងដូច្នេះថា៖«នាពេលនេះ យើងនឹងរក្សាពន្ធដែលរដ្ឋបាលត្រាំបានដាក់ទៅលើចិន ហើយយើងនឹងវាយតម្លៃចំពោះសកម្មភាពណាដែលសក្តិសម»។ លោកស្រី Janet Yellen ដែលរំពឹងថា ប៉េកាំងនឹងបន្តគោរពការសន្យានាពេលចរចាពាណិជ្ជកម្ម។ ចិនសន្យាទិញទំនិញ និងសេវាកម្មបន្ថែមពីអាមេរិកក្នុងតម្លៃ២០០ពាន់លានដុល្លារ សម្រាប់រយៈពេលពីរឆ្នាំ ប៉ុន្តែចិនទិញបានតែ៦០ភាគរយនៃការសន្យាប៉ុណ្ណោះ។

លោកស្រី Yellen នៅពេលចោទជាសំណួរថាតើ ការបង្កើនពន្ធទំនិញសម្រេចបានអ្វីខ្លះ បានផ្ដល់ចម្លើយស្ទាក់ស្ទើរ និងថា នឹងពិនិត្យមើលរឿងនេះ។ លោកស្រីលើកឡើងថា ក្រសួងរតនាគារកំពុងស្ថិតក្នុងដំណាក់កាលពិនិត្យលើវិធីសាស្ត្រដើម្បីទប់ទល់ជាមួយនឹងចិនដូចជាការការអនុវត្តគោលនយោបាយពាណិជ្ជកម្មមិនស្មើភាព ការផ្ទេរបច្ចេកវិទ្យាដោយបង្ខំ និងឧបត្ថម្ភធនក្នុងឧស្សាហកម្មបច្ចេកវិទ្យាកម្រិតខ្ពស់។

សូមជម្រាបថា ជម្លោះពាណិជ្ជកម្មរវាងចិន និងអាមេរិកលើការតម្លើងពន្ធទំនិញនាំចូលពីគ្នាទៅវិញទៅមក ប្រហែលជាមិនទាន់ដល់ទីបញ្ចប់ឡើយបើទោះបីជាអាមេរិកមានប្រធានាធិបតីថ្មីក៏ដោយ។ បន្ទាប់ពីលោក ដូណាល់ ត្រាំ បង្កើនពន្ធនាំចូលលើទំនិញចិនដោយអះអាងថា ចិនរំលោភកម្មសិទ្ធិបញ្ញា និងទិញទំនិញតិចពេកពីអាមេរិក។

ដោយឡែកសេតវិមាន កាលពីខែមុនបញ្ជាក់ថា រដ្ឋបាលលោក ចូ បៃឌិន នឹងពិនិត្យឡើងវិញលើគោលនយោបាយសន្តិសុខដែលដាក់ចេញដោយអតីតប្រធានាធិបតី ត្រាំ រួមទាំងកិច្ចព្រមព្រៀងពាណិជ្ជកម្មបណ្តោះអាសន្នដែលមានជាមួយចិន។ កិច្ចព្រមព្រៀងបណ្តោះអាសន្នបានបន្ធូរបន្ថយភាពតានតឹងរវាងមហាអំណាចសេដ្ឋកិច្ចទាំងពីរ។ ជម្លោះពាណិជ្ជកម្ម បណ្តាលឱ្យពលរដ្ឋអាមេរិកជា ២៤៥,០០០នាក់ បាត់បង់ការងារ។

ចំណែករបាយការណ៍នៅថ្ងៃទី១៨ កុម្ភៈ របស់ក្រសួងពាណិជ្ជកម្មអាមេរិក បានបង្ហាញថា ទំហំនៃការនាំចេញផលិតផលកសិកម្មកើនឡើងដល់៣១,៥ពាន់លានដុល្លារក្នុងឆ្នាំ២០២០ ដែលជាចំនួនច្រើនបំផុតមិនធ្លាប់មាន។ ចិនជាប្រទេសដែលទិញផលិតផលកសិកម្មច្រើនបំផុតពីអាមេរិករួមមានពោត និងសណ្តែកសៀងដើម្បីធ្វើជាចំណីសត្វ។ ក្នុងឆ្នាំ២០២០ តម្លៃផលិតផលកសិកម្មទាំងនោះ ឡើងថ្លៃក្នុងកម្រិតមួយមិនធ្លាប់មាន។ ចិនក៏ត្រូវបានរំពឹងថានឹង បន្តនៅជាទីផ្សាកសិកម្មធំបំផុតរបស់អាមេរិកសម្រាប់ឆ្នាំ២០២១ផងដែរ។ ក្រៅពីចិន ម៉ិកស៊ិក និងកាណាដា ជាប្រទេសដែលទិញទំនិញកសិកម្មលំដាប់ទីពីរ និងទីបី។

គួរបញ្ជាក់ថា លោកស្រី Yallen ក្រៅតែពីបញ្ហាពាណិជ្ជកម្ម ក៏បានលើកឡើងផងដែរថា ប្រទេសទាំងពីរត្រូវធ្វើការជាមួយគ្នា និងសហការគ្នាលើបញ្ហាបម្រែបម្រួលអាកាសធាតុ ជំងឺឆ្លង និងការស្រោចស្រង់សេដ្ឋកិច្ចឡើងវិញ៕ដោយ៖ស តារា