ខេត្តកណ្តាល៖ ក្រុមគ្រូពេទ្យជំនាញ នៅល្ងាចថ្ងៃទី២៤ ខែកុម្ភៈ ឆ្នាំ២០២១ បានបញ្ជូនជនជាតិចិនចំនួន២០នាក់ ដែលរកឃេីញមានផ្ទុកជំងឺកូវីដ-១៩ ពីរាជធានីភ្នំពេញ ទៅសម្រាកព្យាបាលនៅមន្ទីរពេទ្យជ័យជំនះ ក្រុងតាខ្មៅ ខេត្តកណ្ដាល ។
ជាមួយគ្នានេះ លោក គង់ សោភ័ណ្ឌ អភិបាល នៃគណៈអភិបាលខេត្តកណ្ដាល នារសៀលថ្ងៃទី២៤ ខែកុម្ភៈនេះដែរ បានដឹកនាំមន្ត្រីជំនាញ ជួយសម្របសម្រួលដោះស្រាយនូវបញ្ហាមួយចំនួនជាមួយជនជាតិទាំងនេះផងដែរ ។
មិនតែប៉ុណ្ណោះ លោក គង់ សោភ័ណ្ឌ ក៏បានណែនាំដល់ក្រុមគ្រូពេទ្យ ត្រូវយកចិត្តទុកដាក់ពិនិត្យសុខភាព និងតាមដានជាប្រចាំ ពិសេសត្រូវយកសំណាកដើម្បីធ្វើតេស្តរកកូវីដ១៩។ លេីសពីនេះទៅទៀត អាជ្ញាធរក្រុងតាខ្មៅ ត្រូវរៀបចំនូវម្ហូបអាហារឲ្យបានសមរម្យជាប្រចាំថ្ងៃជូនពួកគាត់ ដែលកំពុងធ្វេីចក្តាឡីស័ក។
គួរបញ្ជាក់ថា រហូតដល់ម៉ោង៩និង០០នាទីព្រឹក ថ្ងៃទី២៤ ខែកុម្ភ: ឆ្នាំ២០២១ កម្ពុជាយេីងរកឃេីញករណីជំងឺកូវីដ-១៩ សរុបចំនួន ៤០នាក់ (ឆ្លងសហគមន៍៣៨នាក់ នៅរាជធានីភ្នំពេញ ខេត្តកណ្តាល និងក្រុងព្រះសីហនុ ២នាក់) និងមានជាសះស្បេីយ ១នាក់។ ដូច្នេះចំនួនករណីជំងឺកូវីដ-១៩សរុប កេីន៦៣៣នាក់ ចំនួនសំរាកពេទ្យកេីន ១៥៧នាក់ និងចំនួនជាសះស្បេីយសរុបកេីន ៤៧៦នាក់ និង ស្លាប់គ្មាន ។
ដោយឡែកបេីទោះបីជាជំងឺកូវីដ-១៩ នៅតែបន្តគម្រាមកំហែងយេីងជាប់ជានិច្ច ប៉ុន្តែសូមបងប្អូនបន្តប្រយ័ត្នជាប់ជានិច្ច ដោយអនុវត្តអនាម័យ នៅឃ្លាតឆ្ងាយពីគ្នា មិនចេញក្រៅផ្ទះបេីមិនចាំបាច់ ព្រោះប្រទេសយេីងកំពុងរាតត្បាតក្នុងសហគមន៍ និងប្រទេសជិតខាងយេីងនិងពិភពលោកកំពុងបន្តរាតត្បាតជំងឺកូវីដ-១៩ ដ៏ខ្លាំងក្លានៅឡេីយ។ យេីងត្រូវបន្តគម្លាតបុគ្គលបន្តទៀត ដូចជាអង្គុយគម្លាតពីគ្នា ឈររងចាំគម្លាតពីគ្នា ឈរជជែកគ្នាគម្លាតពីគ្នា ។ ល។ យេីងត្រូវបន្តពាក់ម៉ាស់ជាប់ជានិច្ច និងឧស្សាហ៍លាងដៃជាមួយសាប៊ូ អាល់កុល ឬជែល៕ដោយ៖សហការី
