អន្តរជាតិ៖ បន្ទាប់ពីរោងចក្រជាង២០កន្លែង នៅក្នុងសួនឧស្សាហកម្ម នៃទីក្រុងយ៉ាំងហ្គោនប្រទេសមីយ៉ាន់ម៉ា ត្រូវបានដុតបំផ្លាញ និងវាយកំទេច កាលពីថ្ងៃទី១៤ ខែមីនា ឆ្នាំ២០២១ ហើយសហគ្រាសដែលពាក់ព័ន្ធសុទ្ធសឹងជាសហគ្រាសចិន ឬសហគ្រាសវិនិយោគរួមគ្នារវាងចិនមីយ៉ាន់ម៉ាភាគច្រើនជារោងចក្រកែច្នៃសំលៀកបំពាក់រោងចក្រផ្គត់ផ្គង់សំភារៈសំលៀកបំពាក់ និងរោងចក្រផលិតគ្រឿងបរិក្ខារសំលៀកបំពាក់ ។
ដោយឡែកអ្នកដុតភ្លើងភាគច្រើន គឺជិះម៉ូតូមានអាវុធដូចជា៖ ដំបងដែក ពូថៅ និងធុងសាំង បានសំរុកចូលរោងចក្រវាយកំទេចសំភារៈ និងគំរាមដល់អ្នកធ្វើការងារ រួចបានចាក់សាំងដុតបំផ្លាញតែម្តង។ បច្ចុប្បន្នសមត្ថកិច្ចពុំទាន់អាចកំណត់បានអត្តសញ្ញាណអ្នកដុតភ្លើងនោះឡើយ ចំណែកឯក្រុមការងារជាជនជាតិចិនមួយចំនួនក្រោយហេតុការណ៍នេះ ក៏បានបាត់ខ្លួន ហើយសមត្ថកិច្ចគ្រប់មជ្ឈដ្ឋានកំពុងតែធ្វើការស្វែងរក ។
សូមជម្រាបថា រហូតមកទល់បច្ចុប្បន្នរោងសិប្បកម្ម ឃ្លាំង បន្ទប់ស្នាក់នៅ និងរថយន្ត របស់រោងចក្រចំនួនជាង២០កន្លែង ត្រូវបានដុតបំផ្លាញហើយហាងដែលនៅតាមបណ្តោយផ្លូវក៏ត្រូវបានវាយកំទេច បណ្ដាលឲ្យអ្នកធ្វេីការជាច្រើននាក់រងរបួសស្រាល ចំណែករោងចក្រមួយកន្លែងត្រូវបានក្រុមអ្នកដុតភ្លើងកាន់កាប់។ ដោយហេតុនេះអ្នកដុតភ្លើងមានអាវុធក្នុងដៃ ហើយតាមបណ្តោយផ្លូវចូល ក៏មានមនុស្សបានរៀបចំរបាំងផ្លូវ ធ្វើឱ្យក្រុមពន្លត់អគ្គីភ័យក្នុងស្រុកមិនអាចធ្វើការចូលជួយសង្គ្រោះបាន។ បច្ចុប្បន្ន អ្នកសង្គ្រោះសុទ្ធសឹងតែជាអ្នកធ្វេីការងារឲ្យរោងចក្រទាំងអស់នេះ។
ជាក់ស្ដែងនៅរសៀលថ្ងៃទី១៤ ខែមីនាដដែលនោះ រោងចក្រចិន នៅក្នុងសួនឧស្សាហកម្មឡាយ ដាយ៉ា នៃទីក្រុងយ៉ាំងហ្គោនប្រទេសមីយ៉ាន់ម៉ា ត្រូវបានកុបករ(អ្នកបះបោរ)វាយកំទេច និងដុតបំផ្លាញ បណ្តាលឱ្យមានជនជាតិចិនជាច្រើនរងរងបួសនិងត្រូវជាប់នៅក្នុងនោះផងដែរ។
ចំណែកស្ថានទូតចិនប្រចាំប្រទេសមីយ៉ាន់ម៉ា បានទំនាក់ទំនងជាមួយសភាពាណិជ្ជកម្មចិននៅមីយ៉ាន់ម៉ា និងក្រុមហ៊ុនពាក់ព័ន្ធព្រមទាំងសំណូមពរដល់សមត្ថកិច្ចក្នុងតំបន់ចាត់វិធានការ ដើម្បីរក្សាសុវត្ថិភាពនិង សុខសន្តិភាព របស់សហគ្រាសក្រុមហ៊ុនចិន និងប្រជាជនចិន។ មិនតែប៉ុណ្ណោះ ស្ថានទូតចិន ក៏បានចេញសេចក្តីក្រើនរំលឹកអំពីសុវត្ថិភាពដល់សហគ្រាស និងបងប្អូនជនជាតិចិនដែលកំពុងប្រកបរបរនៅប្រទេសមីយ៉ាន់ម៉ា ។
បេីតាមមន្រ្តីស្ថានទូត បានឱ្យដឹងថា៖ គោលនយោបាយមិត្តភាពចំពោះមីយ៉ាន់ម៉ារបស់ចិន គឺផ្តោតសំខាន់លើប្រជាជនមីយ៉ាន់ម៉ា។ហើយកិច្ចសហប្រតិបត្តិការសេដ្ឋកិច្ចពាណិជ្ជកម្មរវាងចិន និងមីយ៉ាន់ម៉ាតែងតែឈរលើគោលការណ៍នៃការទទួលបានផលប្រយោជន៍ទៅវិញទៅមក ដោយសង្កត់ធ្ងន់ជាពិសេសទៅលើផលប្រយោជន៍ប្រជាជនក្នុងប្រទេសមីយ៉ាន់ម៉ា។ រីឯអ្នករងគ្រោះភាគច្រើនសុទ្ធសឹងជាសហគ្រាសក្នុងវិស័យវាយនភ័ណ្ឌ។ ក្នុងវិស័យនេះ សហគ្រាសចិនបានបង្កើតឳកាសការងារជាង ៤០ម៉ឺនដល់ប្រជាជនមីយ៉ាន់ម៉ា។ ដោយឡែកអំពើរបស់ជនល្មើសច្បាប់ ធ្វើឱ្យខូចខាតដល់អត្ថប្រយោជន៍របស់ប្រជានជនមីយ៉ាន់ម៉ា ។
មន្រ្តីស្ថានទូតចិនប្រចាំប្រទេសមីយ៉ាន់ម៉ា បានលើកឡើងទៀតថា៖ ជុំវិញករណីដុតបំផ្លាញ និងវាយកំទេចលើកនេះជាករណីដែលអាក្រក់បំផុត ហេីយភាគីចិន ក៏បានសំណូមពរដល់ភាគីមីយ៉ាន់ម៉ា ត្រូវមានចំណាត់ការយ៉ាងឲ្យមានប្រសិទ្ធភាពលើករណីនេះ ដើម្បីទប់ស្កាត់អំពីហិង្សានានាកើតឡើងនិងបើកការស៊ើបអង្កេតលើបុគ្គលដែលពាក់ព័ន្ធក្នុងករណីនេះ នឹងធានាឲ្យបាននូវសុវត្តិភាពអាយុជីវិតនិងទ្រព្យសម្បត្តិរបស់សហគ្រាសចិននិងប្រជាជនចិនដែលកំពុងប្រកបរបរនៅប្រទេសមីយ៉ាន់ម៉ា។ ដូច្នេះយើងសូមអំពាវនាវដល់ប្រជានជនមីយ៉ាន់ម៉ា ត្រូវសម្តែងនូវការទាមទារដោយវិធានស្របច្បាប់ មិនត្រូវញុះញង់ ធ្វើឱ្យប៉ះពាល់ដល់កិច្ចសហប្រតិបត្តិការមិត្តភាពរវាងចិននិងមីយ៉ាន់ម៉ា៕ដោយ៖ស តារា
