ភ្នំពេញ៖ ក្រោមការបញ្ជាផ្ទាល់ពីលោក សុខ ពេញវុធ អភិបាល នៃគណៈអភិបាលខណ្ឌដូនពេញ នៅយប់ថ្ងៃសុក្រ ០៦កើត ខែចេត្រ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី១៩ ខែមីនា ឆ្នាំ២០២១ វេលាម៉ោង២២ និង០០នាទី លោកស្រី នូ ថាវរី អភិបាលរងខណ្ឌដូនពេញ បានដឹកនាំកម្លាំង គណៈបញ្ជាការឯកភាពរដ្ឋបាលខណ្ឌដូនពេញ ចុះត្រួតពិនិត្យ និងបានណែនាំដល់ ម្ចាស់ទីតាំងភោជនីយដ្ឋានមួយកន្លែងយីហោ “ក្រាហ្វបៀរហ្គាឌិន និងភោជនីយដ្ឋាន” មានទីតាំង ស្ថិតនៅផ្លូវលេខ២២៨ ភូមិ៣ សង្កាត់បឹងរាំង ខណ្ឌដូនពេញ រាជធានីភ្នំពេញ។ ខណៈដែលម្ចាស់ហាងពុំបានអនុវត្តតាមសេចក្តីណែនាំរបស់ក្រសួងសុខាភិបាល ដោយមានភ្ញៀវចូលពិសារគ្រឿងស្រវឹង មិនរក្សាគម្លាតសុវត្ថិភាព មានលក្ខណៈប្រមូលផ្តុំក្នុងហាង។
ក្នុងប្រតិបត្តិការនេះជាលទ្ធផល នៃការចុះត្រួតពិនិត្យជាក់ស្តែង គណៈបញ្ជាការឯកភាពរដ្ឋបាលខណ្ឌដូនពេញ បានឲ្យតំណាងម្ចាស់ហាងធ្វើកិច្ចសន្យារួមមានដូចខាងក្រោម៖
១; ម្ចាស់ទីតាំងត្រូវអនុវត្តវិធានការ ៣កុំ និង ៣ការពារ ជាមួយរាជរដ្ឋាភិបាលកម្ពុជា ។
២; ត្រូវអនុវត្តន៍ ជាមួយក្រសួងសុខាភិបាល ដោយ រក្សាគម្លាតសុវត្ថិភាព ជាចាំបាច់ ។
៣; ម្ចាស់ទីតាំង ត្រូវចូលរួមសហការជាមួយអជ្ញាធរខណ្ឌ ក្នុងការប្រយុទ្ធប្រឆាំង ជម្ងឺកូវីដ-១៩។
ដោយឡែកក្នុងករណីម្ចាស់ទីតាំង មិនអនុវត្តតាមការណែនាំរបស់ក្រុមការងារខាងលើ រដ្ឋបាលខណ្ឌដូនពេញ និងអនុវត្តវិធានការយ៉ាងម៉ឹងម៉ាត់ និង ឈានដល់ការ បិទទីតាំង និង ដកហូតអាជ្ញាប័ណ្ណផងដែរ៕ដោយ៖ស តារា
