ភ្នំពេញ៖ នៅព្រឹកថ្ងៃទី២៥ ខែមីនា ឆ្នាំ២០២១នេះ អនុគណៈកម្មការស្រាវជ្រាវជំងឺកូវីដ១៩ បានឲ្យដឹងថា ហានិភ័យខ្ពស់ សូមអំពាវនាវដល់ប្រជាពលរដ្ឋ ដែលធ្លាប់បានទៅប្រើប្រាស់សេវា ឬ ធ្លាប់មានការពាក់ព័ន្ធជាមួយអ្នកធ្វើការនៅគ្លីនិកឯកជនមួយកន្លែងយីហោ «បន្ទប់ពិគ្រោះព្យាបាលជំងឺ សាន ភីរ៉ូ» ទល់មុខស្ថានីយទូរទស្សន៍ CTN ខាងមុខផ្សារឆេកូ (ផ្សារគីឡូម៉ែត្រលេខ៦)ភូមិក្រោលគោ សង្កាត់គីឡូម៉ែត្រ៦ ខណ្ឌឫស្សីកែវ រាជធានីភ្នំពេញ ចាប់ពីថ្ងៃទី១៤ ខែមីនា ឆ្នាំ២០២១ តទៅសូមដាក់ខ្លួនឲ្យនៅដាច់ដោយឡែក ឬ ប្រសិនបើមានអាការៈមិនស្រួលខ្លួន ឬ សង្ស័យសូមមេត្តាប្រញាប់ ទៅធ្វើតេស្តរកមេរោគកូវីដ១៩ ។
សូមជម្រាបថា ទីតាំងធ្វើតេស្តរកមេរោគកូវីដ-១៩ រួមមាន៖ វិទ្យាល័យបាក់ទូក , វិទ្យាល័យបឹងត្របែក , មណ្ឌលសុខភាពចាក់អង្រែក្រោម , មន្ទីរពេទ្យខ្មែរ-សូវៀត , មន្ទីរពេទ្យបង្អែកនៅតាមបណ្តា ខេត្តនានា ។
គួរបញ្ជាក់ថា ក្រុមគ្រូពេទ្យ បានទៅយកអ្នកជំងឺកូវីដ-១៩ ចំនួន២នាក់ ដែលជាបុគ្គលិក «បន្ទប់ពិគ្រោះព្យាបាលជំងឺ សាន ភីរ៉ូ» កាលពីល្ងាចថ្ងៃទី២៤ ខែមីនា ឆ្នាំ២០២១ម្សិលមិញនេះ៕ដោយ៖ស តារា
