ភ្នំពេញ៖ បើយោងតាមរបាយការណ៍ បច្ចុប្បន្នភាព សេដ្ឋកិច្ច ចុងក្រោយ សម្រាប់តំបន់អាស៊ីបូព៌ា និងប៉ាស៊ីហ្វិក របស់ធនាគារ ពិភព ចេញផ្សាយចុងខែមីនានេះថា សេដ្ឋកិច្ចកម្ពុជា ត្រូវបានព្យាករថា នឹងមានកំណើនឡើងវិញ ក្នុងរង្វង់ ៤ ភាគរយ ក្នុងឆ្នាំ២០២១ នេះ ហើយនឹងបន្តរីកលូតលាស់បាន ប្រមាណ ៥,២ ភាគរយ ក្នុងឆ្នាំ២០២២។
តាមការលើកឡើងរបស់ធនាគារពិភពលោក បានបញ្ជាក់ថា កម្ពុជា គឺជាប្រទេសមួយ ស្ថិតនៅចំណោម បណ្តាប្រទេស ក្នុងតំបន់អាស៊ីបូព៌ា និងប៉ាស៊ីហ្វិក ដែលត្រូវបានព្យាករថា នឹងមានកំណើនឡើងវិញ នៅឆ្នាំនេះ និងឆ្នាំក្រោយ។
ជាក់ស្តែងរបាយការណ៍បច្ចុប្បន្នភាពសេដ្ឋកិច្ចចុងក្រោយ របស់ធនាគារពិភព បានចេញផ្សាយនាពេលថ្មីៗនេះថា៖ ទូទាំងតំបន់អាស៊ីបូព៌ា និងប៉ាស៊ីហ្វិក សន្ទុះងើបឡើងវិញ នៃសេដ្ឋកិច្ច នៅតែមានភាពខុសគ្នាខ្លាំងនៅឡើយ ជាងមួយឆ្នាំ ក្រោយពីមានការរាតត្បាតនៃជំងឺកូវីដ-១៩។
ទាក់ទិននឹងបញ្ហានេះដែរ អនុប្រធានធនាគារពិភពលោក ប្រចាំតំបន់អាស៊ីបូព៌ា និងប៉ាស៊ីហ្វិក លោកស្រី វិកតូរីយ៉ា ក្វាក្វា បានលើកឡើងថា៖ វិបត្តិសេដ្ឋកិច្ច ដែលបណ្តាលមកពី ការរាតត្បាតវីរុសកូវីដ ១៩ នេះ បានបង្អាក់ការកាត់បន្ថយភាពក្រីក្រ ហើយបង្កើនវិសមភាពវិញ។ ក្នុងគ្រាដែលប្រទេសនានា ចាប់ផ្តើមងើបឡើងវិញ នៅឆ្នាំ២០២១នេះ គេចាំបាច់ត្រូវចាត់វិធានការបន្ទាន់ ដើម្បីការពារ ប្រជាជន ងាយរងគ្រោះ និងធានាឱ្យមានការងើបឡើងវិញ នៃសេដ្ឋកិច្ចដែលមានបរិយាប័ន្ន, មានភាពបៃតង និងភាពធន់។
ដោយឡែកអ្នកសេដ្ឋវិទូជាន់ខ្ពស់ នៃធនាគារពិភពលោក សម្រាប់តំបន់អាស៊ីបូព៌ា និងប៉ាស៊ីហ្វិក លោក អាឌីត្យា ម៉ាទូ ក៏បានលើកឡើងដែរថា៖ ជាងពេលណាៗទាំងអស់ យើងត្រូវការកិច្ចសហ ប្រតិបត្តិការ អន្តរជាតិ ដើម្បីទប់ទល់ជំងឺនេះ គាំទ្រសេដ្ឋកិច្ច និងស្តារសេដ្ឋកិច្ចឡើងវិញ ដោយភាពបៃតង។
គួរបញ្ជាក់ថា ប្រទេសចិន អាចដើរតួនាទីនេះ យ៉ាងសំខាន់ ដោយនាំចេញផលិតផល វេជ្ជសាស្ត្របន្ថែមទៀត បង្កើនការប្រើប្រាស់របស់ខ្លួន និងចាត់វិធានការ អាកាសធាតុឲ្យកាន់តែខ្លាំងក្លា។
លើសពីនេះ ប្រទេសចិន ក៏នឹងបានអត្ថប្រយោជន៍ ពីពិភពលោកមួយ ដែលកាន់តែមានសុវត្ថិភាព និងកំណើនប្រកបដោយតុល្យភាព ផងដែរ៕ដោយ៖សហការី
រូបភាព៖ឯកសារ អាគារខ្ពស់ៗនៅកម្ពុជា
