ខេត្តព្រះសីហនុ ៖ សំណង់រឹងមាំ ប្រភេទសណ្ឋាគារ និងខុនដូដ៏ធំ សង់លើដីឆ្នេរសមុទ្រសាធារណៈ ទាំងបំពាន និងមានការឃុបឃិត ជាមួយជំនាញ អាជ្ញាធរ រហូតក្លាយទៅជាសំណងស្របច្បាប់ មិនទាន់មានចំណាត់ការ វាយកម្ទេចចោលនៅឡើយទេ មកទល់នឹងថ្ងៃទី៤ ខែមីនា ឆ្នាំ២០១៦ សង្ស័យថា វិធានការ អាចជាការយោគយល់ ឬមានអាថ៌កំបាំងអ្វីកើតឡើង ទើបទាំងគណៈកម្មាធិការជាតិ គ្រប់គ្រងនិងអភិវឌ្ឍតំបន់ឆ្នេរសមុទ្រ ដែលមានលោកទេសរដ្ឋមន្រ្ដី អ៊ឹម ឈុនលឹម រដ្ឋមន្រ្ដីក្រសួងរៀបចំដែនដី នគរូបនីយកម្ម និងសំណង់ និងអាជ្ញាធរខេត្តព្រះសីហនុ មិនបានចាត់វិធានការតាមផ្លូវច្បាប់វាយកម្ទេចចោល។
លោកយន្ដ មីន អភិបាល នៃគណៈអភិបាលខេត្តព្រះសីហនុ កន្លងទៅថ្លែងនៅក្នុងសន្និសីទកាសែត មិនបានបញ្ជាក់ពីជំហរផ្លូវច្បាប់ កម្ទេចចោលឬយ៉ាងណានោះទេ លោកគ្រាន់តែ ប្រើភាសាកាទូតយ៉ាងដូច្នេះថា “ ចំពោះសំណង់ចំនួន២កន្លែង នៅលើដីឆ្នេរសមុទ្រ៧ជាន់ គណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រ ដឹកនាំដោយទេសរដ្ឋមន្រ្ដីអ៊ឹម ឈុនលឹម កំពុងតែប្រជុំពីភាក្សា ពិចារណានៅឡើយ ដោយយល់ឃើញថា សំណង់ទាំងនេះគេមានច្បាប់អនុញ្ញាតស្របច្បាប់ទៅហើយ។
គួររំលឹកផងដែរថា តាមច្បាប់ភូមិបាល ទន្លេ បឹង បួរ ផ្លូវសាធារណៈ ឬឆ្នេរសមុទ្រជាដើម ។ ល ។ មិនត្រូវបាន អនុញ្ញាតច្បាប់ឱ្យធ្វើជាម្ចាស់កម្មសិទ្ធិ ឬសំណង់នោះឡើយ។ ចុះហេតុអ្វីក៏សំណង់រឹងមាំទាំង២នេះ សង់នៅលើដីឆ្នេរសមុទ្រជាសាធារណៈរបស់រដ្ឋ បែរជាមានអ្នកចេញច្បាប់អនុញ្ញាត។
លោកស្បោង សារ៉ាត់ ម្ចាស់សំណង់នៃសណ្ឋាការដ៏ធំនេះ អតីតជាអិបាលខេត្តព្រះសីហនុ អាចនឹងជាប់ពាក់ព័ន្ធ ទៅនឹងការអនុញ្ញាតដោយខ្លួនឯង ក្នុងអំណាចពេញដៃ។ ដូច្នេះច្បាប់ អនុញ្ញាតនេះ គួរតែគណៈកម្មាធិការជាតិ គ្រប់គ្រង និងអភិវឌ្ឍតំបន់ឆ្នេរសមុទ្រ ពិនិត្យឡើងវិញផងដែរ មានតម្លាភាព ឬមានភាពមិនប្រក្រតី។ ក្នុងអាណត្តលោកស្បោង សារ៉ាត់ ជាអភិបាលខេត្តព្រះសីហនុ បញ្ហាវិវាទដីធ្លី ជាពិសេសសំណង់រឹងមាំ បានសង់នៅលើឆ្នេរសមុទ្រ រួមទាំង ខ្លួនឯងផងដែរ ជាពិសេសភរិយារបស់គាត់ មានរឿងរ៉ាវ បញ្ហាដីធ្លីដែលចេញមុខច្រើនជាងគេ។
ពាក់ព័ន្ធនឹងករណីនេះ សារព័ត៌មានយើងមិនអាចទាក់ទងបានទេ ពីលោកស្បោង សារ៉ាត់ ក៏ដូចជាលោកយន្ដ មីន អភិបាលនៃគណៈអភិបាលខេត្តព្រះសីហនុ នារសៀលថ្ងៃទី៤ ខែមីនា ឆ្នាំ២០១៦ ដោយគ្មានលេខទូរស័ព្ទ៕ដោយ៖ សុខ ខេមរា
