ខេត្តសៀមរាប៖ នៅព្រឹកថ្ងៃទី១៥ ខែមេសា ឆ្នាំ២០២១នេះ កម្លាំងកងរាជអាវុធហត្ថខេត្តសៀមរាប បានកសាងសំណុំរឿងបញ្ជូនជនសង្ស័យម្នាក់ បានសកម្មភាពចូលលួចប្រេងម៉ាស៊ូត នៅក្នុងការដ្ឋានព្រលានយន្តសៀមរាបថ្មី។
បេីតាមរបាយការណ៍របស់កម្លាំងមូលដ្ឋានកងរាជអាវុធហត្ថស្រុកសូត្រនិគម បានឲ្យដឹងនៅរសៀលថ្ងៃទី១៣ ខែមេសា ឆ្នាំ២០២១ថា យោងតាមពាក្យបណ្តឹងរបស់ជនរងគ្រោះ ឈ្មោះ អ៊ុយ ចយ ភេទប្រុស អាយុ៤៨ឆ្នាំ ជនជាតិខ្មែរ មានទីលំនៅបច្ចុប្បន្ន ភូមិដកពោធិ៍ សង្កាត់ស្លក្រាម ក្រុងសៀមរាប បានរាយការណ៍ថា មានករណីចោរចូលលួចប្រេងម៉ាស៊ូត នៅក្នុងការដ្ឋានព្រលានយន្តសៀមរាបថ្មី។ ភ្លាមនោះ កម្លាំងមូលដ្ឋានអាវុធហត្ថស្រុកសូត្រនិគមដឹកនាំដោយលោកវរសេនីយ៍ត្រី អ៊ឹម មុន្នី មេបញ្ជាការមូលដ្ឋានស្រុក និងដោយមានការសម្របសម្រួលពីលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាបបានចុះចាប់ខ្លួនជនសង្ស័យយកមកសួរនាំនៅមូលដ្ឋានអាវុធហត្ថស្រុក រួចរៀបចំសំណុំរឿងបញ្ជូនបន្តទៅការិយាល័យជំនាញនៃកងរាជអាវុធហត្ថខេត្ត ដើម្បីចាត់ការបន្តតាមនីតិវិធីច្បាប់ ។
ករណីឃាត់ខ្លួនជនសង្ស័យខាងលេីនេះ បានធ្វើឡើងនៅវេលាម៉ោង៣អធ្រាត្រឈានចូលថ្ងៃទី១២ ខែមេសា ឆ្នាំ២០២១ ស្ថិតនៅត្រង់ចំណុចក្នុងការដ្ឋានព្រលានយន្តហោះថ្មី ភូមិប្រវ៉ាល ឃុំតាយ៉ែក ស្រុកសូទ្រនិគម ខេត្តសៀមរាប ។
មន្រ្តីដដែលបន្តថា ជនសង្ស័យឈ្មោះ ស៊ត់ សើម អាយុ៣០ឆ្នាំ មានទីលំនៅបច្ចុប្បន្ន ភូមិប្រវ៉ាល ឃុំតាយ៉ែក ស្រុកសូទ្រនិគម ខេត្តសៀមរាប និងមានបក្ខពួកមួយចំនួនទៀត បានរត់គេចខ្លួនបាត់ ។
មន្រ្តីកងរាជអាវុធហត្ថ បន្ថែមទៀតថា បន្ទាប់ពីឃាត់ខ្លួននិងសាកសួរឈ្មោះ ស៊ត់ សើម បានឆ្លើយសារភាពថា ខ្លួន និងបក្ខពួកពិតជាបានចូលលួចប្រេងនៅចំណុចក្នុងការដ្ឋានខាងលើប្រាកដមែន។ ចំណែកវត្ថុតាងដកហូតរួមមាន ៖ ម៉ូតូចំនួន០៤គ្រឿង ប្រេងម៉ាស៊ូតចំនួន០៩កាន ស្មើនិង២៧០លីត្រ កានទទេចំនួន១១កាន ,ទូរស័ព្ទ០១គ្រឿង (ម៉ាកOPPO)។
បច្ចុប្បន្នជនសង្ស័យ និងវត្ថុតាងកម្លាំងការិយាល័យព្រហ្មទណ្ឌនៃកងរាជអាវុធហត្ថខេត្តសៀមរាប នៅថ្ងៃទី១៥ ខែមេសានេះ បានកសាងសំណុំរឿងបញ្ជូនទៅសាលាដំបូងខេត្តសៀមរាប ដើម្បីចាត់ការបន្តនីតិវិធី។ រីឯបក្ខពួក២នាក់ទៀត ដែលកំពុងរត់គេចខ្លួនសមត្ថកិច្ចកំពុងស្រាវជ្រាវរកចាប់ខ្លួនយកមកផ្តន្ទាទោសតាមច្បាប់ ៕ដោយ៖សហការី
