ខេត្តមណ្ឌលគិរី៖ នាព្រឹកថ្ងៃសៅរ៍ ៦កើត ខែពិសាខ ឆ្នាំ ឆ្លូវ ត្រីស័ក ព.ស ២៥៦៤ ត្រូវនឹងថ្ងៃទី១៧ ខែមេសាឆ្នាំ២០២១ លោកស្វាយ សំអ៊ាង អភិបាលខេត្តមណ្ឌលគិរី អមដំណេីរដោយលោកឧត្តមសេនីយ៍ទោ ឡោ សុខា ស្នងការនគរបាលខេត្ត លោកឧត្តមសេនីយ៍ត្រី ហែម បូណារ៉ែល មេបញ្ជាការកងរាជអាវុធហត្ថខេត្ត និងកងកម្លាំងប្រដាប់អាវុធទាំងបី ព្រមទាំងអាជ្ញាធរស្រុក បាននាំយកអំណោយមួយចំនួន មកចែកជូនគ្រួសារសពជនរងគ្រោះឈ្មោះ ធាម ប៊ុនធឿន ភេទប្រុស អាយុ ៣០ឆ្នាំ ដដែលបានធ្វើអត្តឃាតនៅចំណុចអូរជុំ ផ្លូវក្រវ៉ាត់ព្រំដែន ស្ថិតក្នុងភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរី កាលពីថ្ងៃទី១៦ មេសា ២០២១។ អំណោយផ្តល់ជូនរួមមាន: អង្ករ ០២បេ, មី ០៤កេះ, ទឹកសុទ្ធ ០២កេះ, ត្រីខ ០២យួរ និងថវិកាចំនួន ៥០ម៉ឺនរៀល។
លោកអភិបាលខេត្ត ក៏បានអញ្ជើញទៅពិនិត្យ និងសួរសុខទុក្ខកងកម្លាំងវរសេនាតូចលេខ៦២១ ដែលកំពុងឈរជើងការពារព្រំដែន នៅប៉ុស្តិ៍នគរបាលការពារព្រំដែនគោកអូរជុំ និងទប់ស្កាត់ពលករ ប្រជាពលរដ្ឋមិនឲ្យឆ្លងកាត់ព្រំដែនកម្ពុជា-វៀតណាម ដេីម្បីបង្ការ និងទប់ស្កាត់ការឆ្លងរីករាលដាលនៃជម្ងឺកូវីដ-១៩ចូលក្នុងសហគមន៍។
នាឱកាសនោះដែរលោកអភិបាលខេត្ត បាននាំយកនូវគ្រឿងឧបភោគ បរិភោគផ្តល់ជូនដល់កងកម្លាំងដែលឈរជេីងនៅទីនោះរួមមាន: មី ០១កេះធំ, អង្ករចំនួន ២០០គីឡូក្រាម, ទឹកត្រី ទឹកសុីអុីវ និងថវិកាចំនួន ០១លានរៀល។ ដោយឡែកលោកឧត្តមសេនីយ៍ទោ ឡោ សុខា ស្នងការនគរបាលខេត្តក៏បានឧបត្ដម្ភថវិកាបន្ថែមចំនួន ៥០មុឺនរៀលផងដែរ។
ស្ថិតក្នុងឱកាសនោះផងដែរ ក្រុមគ្រួសារសពជនរងគ្រោះ ព្រមទាំងនាយ នាយរងប៉ុស្តិ៍នគរបាលការពារព្រំដែនគោកអូរជុំ បានសម្តែងនូវការដឹងគុណយ៉ាងជ្រាលជ្រៅបំផុតចំពោះ លោក ស្វាយ សំអ៊ាង អភិបាលខេត្ត ព្រមទាំងលោកឧត្តមសេនីយ៍ទោ ឡោ សុខា ស្នងការនគរបាលខេត្ត ដែលជានិច្ចកាលលោកតែងតែគិតគូរពីសុខទុក្ខប្រជាពលរដ្ឋ និងកងកម្លាំងនគរបាលការពារព្រំដែន ៕
ដោយ៖ សូរិយា
