ខេត្តសៀមរាប៖ រថយន្តយីឌុបខ្នាតយក្សមួយគ្រឿង ដែលលួចដឹកឈើល្មើសច្បាប់ ត្រូវកម្លាំងមន្រ្តីរដ្ឋបាលព្រៃឈើខេត្ត ធ្វើការបង្រ្កាបបានកាលពីរំលងអាធ្រាត្រឈានចូលថ្ងៃទី២៩ ខែមេសា ឆ្នាំ២០២១នេះ ត្រង់នៅចំណុចភូមិទ័ពសៀម ឃុំគោកធ្លកក្រោម ស្រុកជីក្រែង ខេត្តសៀមរាប។
បេីយោងតាមការលើកឡើងរបស់លោក ម៉ុង ប៊ុនលីម នាយខណ្ឌរដ្ឋបាលព្រៃឈើ ខេត្តសៀមរាប បានថ្លែងថា មន្ត្រីជំនាញរបស់រដ្ឋបាលព្រៃឈេី កាលពីយប់រំលងអាធ្រាត្រឈានចូលថ្ងៃទី២៩ ខែមេសានេះ បានឃាត់រថយន្តយីឌុប ១គ្រឿង ម៉ាកហ៊ីយ៉ាន់ដាយ ពាក់ស្លាកលេខ ភ្នំពេញ 3D-7657 ដែលបានដឹកឈើ ល្មើសច្បាប់ ជាប្រភេទឈើ (ឈ្លីច) ឈើលេខ១។ ក្នុងពេលស្ទាក់បង្ក្រាបអ្នកបើកបរ រថយន្ត បានចុះរត់គេចខ្លួនបាត់។
នាយខណ្ឌរដ្ឋបាលព្រៃឈើរូបនេះ បន្តថា រហូតមកដល់ម៉ោង១២ ថ្ងៃត្រង់ទី២៩ មេសានេះ កម្លាំងសមត្ថកិច្ចជំនាញ នៅមិនទាន់រាប់ចំនួនដឹងនៅឡើយនោះទេ។ ប៉ុន្តែបើតាមការសន្និដ្ឋានបឋមបាន ប្រហែលជាង ១០ម៉ែត្រគូប។
គួរបញ្ជាក់ថា ដោយឡែកបេីតាមការស្រាវជ្រាវជាក់ស្ដែងឈើទាំងនេះ គឺពួកគេអាចដឹកជញ្ជូនតាមរយៈរទះគោ ចេញពីក្នុងព្រៃ មកទុកក្នុងភូមិ ពេលមានឱកាស ទើបពួកគេលើកដាក់ឡាន ហើយដឹកចេញ ហើយបំរុងដឹកទៅទីរាជធានីភ្នំពេញ។
បច្ចុប្បន្នរថយន្ត ព្រមទាំងវត្ថុតាង ត្រូវបានយកទៅរក្សាទុកនៅផ្នែករដ្ឋបាល ព្រៃឈើ ជីក្រែង ដោយទុកពេល ៣០ ថ្ងៃ ដើម្បីឲ្យម្ចាស់ចូលខ្លួនមកដោះស្រាយ និងធ្វើការបង់ពិន័យ ជាអន្តរកាល តែបើ ៣០ ថ្ងៃ ម្ចាស់មិនចូលខ្លួន នោះនឹងបញ្ជូនទៅសាលាដំបូងខេត្ត ដេីម្បីបន្តនីតិវិធី៕ដោយ៖សហការី
