ភ្នំពេញ៖ លោក សាន្ត ប៊ុនធឿន ចាងហ្វាងកាសែតស្នេហាជាតិ និងជាប្រធានក្រុមផ្នែកយកព័ត៌មាន របស់គេហទំព័រខ្មែរ អាយញូវ ត្រូវបានកម្លាំងនគរបាលនៅគោលដៅ ត្រួតពិនិត្យចរាចរណ៍តាមផ្លូវជាតិលេខ៤ត្រង់ បញ្ជរបង់ប្រាក់កំបូល ខណ្ឌពោធិ៍សែនជ័យ ឃាត់ខ្លួននៅយប់ថ្ងៃទី៩ ខែមីនា ឆ្នាំ២០១៦បន្ទាប់ពីរូបលោកនិងមិត្តភក្តិម្នាក់ទៀត ជិះម៉ូតូម៉ាក PCX ឌុបគ្នាមិនពាក់មួកសុវត្ថិភាព ម៉ូតូអត់ស្លាកលេខ និងមានជាតិអាល់កុល ០,៦៤មីល្លីក្រាម ក្នុងមួយលីត្រខ្យល់ ព្រមទាំងប្រមាថថ្នាក់ដឹកនាំកំពូលៗនៃរាជរដ្ឋាភិបាលថែមទៀត ។
ក្នុងករណីនេះសមត្ថកិច្ចនគរបាលចរាចរណ៍រាជធានីភ្នំពេញ បានធ្វើសន្និសីទកាសែត នារសៀលថ្ងៃទី១០ ខែមីនា ឆ្នាំ២០១៦ ដើម្បីបង្ហាញ និងបញ្ជាក់ឲ្យដឹងពីកំហុសឆ្គងរបស់លោក សាន្ត ប៊ុនធឿន ក្នុងការមិនគោរពច្បាប់ចរាចរណ៍ ជិះម៉ូតូអត់ស្លាកលេខ មានជាតិស្រវឹង និង ប្រមាថថ្នាក់ដឹកនាំជាន់ខ្ពស់ រាជរដ្ឋាភិបាល ព្រមទាំងបានបញ្ជូនខ្លួនទៅសាលាដំបូងរាជធានីធ្វើការចោទប្រកាន់ផងដែរ ។
លោកវរសេនីយ៍ឯក ចេវ ហាក់ នាយការិយាល័យនគរបាលចរាចរណ៍ផ្លូវគោក រាជធានីភ្នំពេញ បានថ្លែងប្រាប់ក្រុមអ្នកយកព័ត៌មានក្នុងពេលធ្វើសន្និសីទថា «នៅយប់មិញនេះកម្លាំងរបស់យើង ដែលស្ថិតនៅតាមគោលដៅ ក្នុងរាជធានីភ្នំពេញ បានឃាត់ខ្លួនអ្នកបើកបរដែលមានជាតិអាល់កុល ត្រូវច្បាប់បានកំណត់នោះ មានចំនួន៩នាក់ ក្នុងនោះអ្នកបើករថយន្ត២នាក់ និងម៉ូតូ៧នាក់។ នៅយប់មិញនេះដែរក៏មានឈ្មោះ សាន្ត ប៊ុនធឿន បានជិះម៉ូតូដឹកគ្នា២នាក់ អត់ពាក់មួកសុវត្ថិភាព ម៉ូតូអត់ស្លាកលេខ និងមានជាតិអាល់កុល»ត្រូវបានឃាត់ខ្លួនផងដែរ គ្រាដែលពួកគាត់មិនត្រឹមតែបើកម៉ូតូ មិនគោរពច្បាប់ចរាចរណ៍នោះទេ គឺថែមទាំងបានប្រើពាក្យ ប្រមាថថ្នាក់ដឹកនាំកំពូលៗ យ៉ាងអសីលធម៌ទៀតផង ។ដូច្នេះហើយទើបសមត្ថកិច្ចសម្រេចឃាត់ខ្លួនចាត់ការតាមច្បាប់ ។
លោកចេវ ហាក់ បញ្ជាក់ទៀតថា យើងជាពលរដ្ឋត្រូវតែគោរពច្បាប់ចរាចរណ៍ទាំងអស់គ្នា បើធ្វើខុសត្រូវទទួលទោសតាមច្បាប់កំណត់ មិនត្រូវអាងខ្លួនជាអ្វីឬប្រមាថកាកទានថ្នាក់ដឹកនាំកំពូលរបស់រាជរដ្ឋាភិបាលដូចលោក សាន្ត ប៊ុនធឿនទេ ។ ដូច្នេះសមត្ថកិច្ចរបស់លោកត្រូវតែកសាងសំណុំរឿងនេះបញ្ជូនទៅតុលាការជាកំហិត ហើយបើតុលាការសម្រេចបែបណានោះជាសិទ្ធរបស់តុលាការ ៕
ដោយ៖ ប្រាថ្នា
