កណ្តាល៖ សមត្ថកិច្ចនគរបាលស្រុកអង្គស្នួលស្រាវជ្រាវបង្រ្កាបឃាត់ខ្លួនជនសង្ស័យប្រុស-ស្រី៨នាក់ជាបន្តបន្ទាប់ ដកហូតបានថ្នាំញៀនប្រភេទមេតំហ្វេតាមីនហៅម៉ាទឹកកកចំនួន០១កញ្ចប់ អាវុធចំនួន០២ដើម និងវត្ថុតាងពាក់ព័ន្ធមួយចំនួនទៀត ដើម្បីកសាងសំណុំរឿងចាត់ការតាមច្បាប់ ។
ប្រតិបត្តិការបង្រ្កាបឃាត់ខ្លួនមុខសញ្ញាចែកចាយ និងប្រើប្រាស់គ្រឿងញៀននេះបានធ្វើឡើងកាលពីវេលាម៉ោង១០និង៣០នាទីព្រឹក ថ្ងៃទី១០ ខែមីនា ឆ្នាំ២០១៦ រហូតដល់វេលាល្ងាចដដែល នៅត្រង់ចំណុចពីរកន្លែងផ្សេងគ្នា ស្ថិតក្នុងភូមិសាស្ត្រស្រុកអង្គស្នួល ។
មន្ត្រីនគរបាលស្រុកអង្គស្នួលបានឲ្យដឹងថា ជនសង្ស័យដែលត្រូវបានចាប់ខ្លួននោះ ទី១-ឈ្មោះ ចាន់ សុជាតិ ភេទប្រុស អាយុ១៨ឆ្នាំ ជនជាតិខែ្មរ មុខរបរកម្មករសំណង់ មានទីលំនៅក្នុងភូមិត្រាចទោល ឃុំបែកចាន ស្រុកអង្គស្នួល (ជាអ្នកចែកចាយគ្រឿងញៀន-ផ្តល់ទីតាំងឲ្យប្រើប្រាស់ និងមានដីកាបង្គាបឲ្យនាំខ្លួនពីបទចែកចាយនិងផ្តល់ទីតាំងឲ្យប្រើប្រាស់សារធាតុញៀនដោយខុសច្បាប់) ទី២-ឈ្មោះ ឯក ផាន់ណារុំ ភេទប្រុស អាយុ២៨ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិត្នោតម្តើម ឃុំបែកចានស្រុកអង្គស្នួល (ជាអ្នកចែកចាយនិងប្រើប្រាស់) ទី៣-ឈ្មោះ សារ គឹមមករា ភេទស្រី អាយុ២៦ឆ្នាំ ជនជាតិខ្មែរ មានទីលំនៅភូមិត្នោតម្តើម ឃុំបែកចាន ស្រុកអង្គស្នួល (ជាអ្នកចែកចាយនិងប្រើប្រាស់) ។
ប្រភពដដែលបានបន្តថា ជនសង្ស័យទី៤-ឈ្មោះ ម៉ៅ ម៉េង ភេទប្រុស អាយុ២៣ឆ្នាំ មុខរបរចុងភៅ មានទីលំនៅភូមិថ្មី ឃុំបែកចាន ស្រុកអង្គស្នួល (ជាអ្នកប្រើប្រាស់) ទី៥-ឈ្មោះ ម៉ៅ វាសនា ភេទប្រុស អាយុ៣០ឆ្នាំមុខរបរមិនពិតប្រាកដ មានទីលំនៅភូមិព្រៃសំរោង ឃុំបែកចាន ស្រុកអង្គស្នួល (ជាអ្នកប្រើប្រាស់) ទី៦-ឈ្មោះ យ៉េង សំអឿន ភេទប្រុស អាយុ៣០ឆ្នាំ មុខរបរកម្មករសំណង់ មានទីលំនៅភូមិត្រពាំងទ្រា ឃុំបែកចាន ស្រុកអង្គស្នួល (ជាអ្នកប្រើប្រាស់) ទី៧-ឈ្មោះ មឿក ម៉ៃ ភេទប្រុសអាយុ២២ឆ្នាំ ជនជាតិខែ្មរ មុខរបរកម្មករសំណង់ មានទីលំនៅភូមិត្រពាំងទ្រា ឃុំបែកចាន ស្រុកអង្គស្នួល (ជាអ្នកប្រើប្រាស់) និងទី៨-ឈ្មោះ ផន សុភា ហៅភិន ភេទប្រុស អាយុ២៣ឆ្នាំកម្មកររោងចក្រ មានទីលំនៅឃុំបែកចាន ស្រុកអង្គស្នួល ។
ប្រភពដដែលបានបន្តទៀតថា នៅក្នុងប្រតិបត្តិការបង្រ្កាបឃាត់ខ្លួនជនសង្ស័យប្រុស-ស្រីទាំង៨នាក់ខាងលើនេះ សមត្ថកិច្ចបានរឹបអូសថ្នាំញៀនប្រភេទមេតំហ្វេតាមីន ហៅម៉ាទឹកកកចំនួន០១កញ្ចប់ ,កាំភ្លើងច្នៃ០១ដើម ,ដាវ០១ដើម ,ទូរស័ព្ទ០២គ្រឿង ,ឧបករណ៍សម្រាប់សេពគ្រឿងញៀន និងសម្ភារៈសម្រាប់វេចខ្ចប់គ្រឿងញៀនមួយចំនួនទៀត ។
អធិការនគរបាលស្រុកអង្គស្នួលលោកវរសេនីយ៍ទោ មាន សំណាង បានឲ្យដឹងថា ជនសង្ស័យខាងលើនេះជាមុខសញ្ញាចាស់ដែលត្រូវបាន សមត្ថកិច្ចនគរបាលជំនាញកំណត់និងតាមដាននាពេលកន្លងមក ។ នៅថ្ងៃទី១០ ខែមីនា ឆ្នាំ២០១៦ សមត្ថកិច្ចជំនាញបានទទួលព័ត៌មានថាជនសង្ស័យមួយក្រុមនេះកំពុងធ្វើសកម្មភាពចែកចាយ និង ប្រើប្រាស់គ្រឿងញៀននៅលើផ្ទះរបស់ជនសង្ស័យឈ្មោះ ចាន់ សុជាតិ នៅក្នុងភូមិត្រាចទោល ឃុំបែកចាន ស្រុកអង្គស្នួល ។
លោកវរសេនីយ៍ទោ មាន សំណាង បានបន្តថា បន្ទាប់ពីទទួលបានព័ត៌មានលោកបានដឹកនាំកម្លាំងនគរបាលយុត្តិធម៌សហការជាមួយនគរបាលប៉ុស្តិ៍រដ្ឋបាលពើក និងបែកចាន ចុះឡោមព័ទ្ធទីតាំងផ្ទះជនសង្ស័យខាងលើនេះ រហូតឈានដល់បង្រ្កាបឃាត់ខ្លួនជនសង្ស័យបានជាបន្តបន្ទាប់ចំនួន៨នាក់ និងដកហូតវត្ថុតាងជាក់ស្តែង ដើម្បីកសាងសំនុំរឿងចាត់ការតាមច្បាប់៕ស្អាងជ័យ
