ខេត្តកំពង់ស្ពឺ៖ បុរសម្នាក់ បានស្លាប់យ៉ាងអាណោចអាធ័មនៅកន្លែងកើតហេតុ ខណៈដែលរថយន្តមួយគ្រឿង បេីកបរមិនប្រយ័ត្នជ្រុលទៅបុកម៉ូតូជនរងគ្រោះយ៉ាងពេញទំហឹង បង្កការភ្ញាក់ផ្អើលកាលពីយប់ថ្ងៃទី១២ ខែឧសភា ឆ្នាំ២០២១ ស្ថិតនៅតាមបណ្តោយផ្លូវជាតិលេខ១៣០ ត្រង់ចំណុចភូមិវាល ឃុំរលាំងចក ស្រុកសំរោង ទង ខេត្តកំពង់ស្ពឺ។
បេីតាមប្រភពព័ត៍មានពីមន្រ្តីនគរបាលស្រុកសំរោងទង បានឲ្យដឹងថា មុនពេលកេីតហេតុ មានម៉ូតូមួយគ្រឿងម៉ាកហុងដាឌ្រីម សេ១២៥ សេរី២០១៩ ពណ៌ខ្មៅ ពាក់ស្លាកលេខ កំពង់ស្ពឺ 1S9522 បើកបរដោយជនរងគ្រោះមានឈ្មោះ ចៅ គង់ភារុណ ភេទប្រុសអាយុ២៣ឆ្នាំ រស់នៅភូមិដក់ពរ សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ បើកបរពីលិចទៅកើត។ លុះមកដល់ចំណុចកើតហេតុខាងលើត្រូវរថយន្តមួយគ្រឿងមិនស្គាល់ម៉ាក និងអត្តសញ្ញាណអ្នកបើកបរ ពីលិចទៅកើត ទៅបុកពេញទំហឹងបណ្តាលឲ្យជនរងគ្រោះប៉ើងធ្លាក់ពីលើផ្លូវស្លាប់ភ្លាមៗនៅនឹងកន្លែង។
មន្រ្តីដដែលបន្តថា បន្ទាប់ពីហេតុអ្នកបើបររថយន្តបើករត់គេចខ្លួនបាត់ស្រមោល ចំណែកសពជនរងគ្រោះ ត្រូវបានសមត្ថកិច្ចជំនាញធ្វេីកោសល្យវិច័យរួច ក៏ប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី។
ក្រោយកេីតហេតុ សមត្ថកិច្ចជំនាញ បានយកម៉ូតូរក្សាទុកនៅប៉ុស្តិ៍នគរបាលរដ្ឋបាលរលាំងចក រីឯរថយន្តកំពុងស្រាវជ្រាវ កសាងសំណុំរឿងចាត់ការតាមនីតិវិធី៕ដោយ៖សហការី
