អ្នកចាំទីក្រុមហង្សក្រហម Liverpool កីឡាករ Alisson បានធ្វើឲ្យមានការភ្ញាក់ផ្អើលនៅចុងម៉ោងជាសញ្ញារំជើបរំជួលក្នុងអ្វីដែលលោក Jurgen Klopp បានពិពណ៌នាថាជា “ពេលវេលាពិសេស” ដែលអ្នកចាំទីរូបនេះរកបាន១គ្រាប់យកឈ្នះក្រុមម្ចាស់ផ្ទះ West Brom កាលពីរាត្រីម្សិលមិញ។
យោងតាមការចេញផ្សាយរបស់ BBC Sport បានឲ្យដឹងថា អ្នកចាំទីAlisson របស់ក្រុមហង្សក្រហមរូបនេះរកបាន១គ្រាប់នៅម៉ោងបន្ថែមនាទី៩០+៥ ។ តាមពិតទៅក្នុងប្រវត្តិសាស្រ្តរយៈពេល១២៩ឆ្នាំរបស់ហង្សក្រហម Liverpool មិនមានអ្នកចាំទីណាម្នាក់ដែលអាចរកគ្រាប់បាល់បាននៅក្នុងការប្រកួតប្រជែងសម្រាប់ក្លិបនោះទេ។
ដូច្នេះនៅពេលដែល Alisson រកបាន១គ្រាប់សម្រាប់ជ័យជម្នះក្រុមLiverpool ទល់នឹង West Brom ដើម្បីរក្សាក្តីសង្ឃឹមនៃការដណ្តើមកៅអីChampions League របស់គេនៅរដូវកាលក្រោយ។
ការប្រកួតរវាងក្រុមម្ចាស់ផ្ទះ West Brom នឹងក្រុមហង្សក្រហម Liverpool កាលពីម្សិលមិញ ក្រុមម្ចាស់ផ្ទះជាអ្នករកគ្រាប់បាល់នាំមុខនៅនាទីទី១៥ ដោយកីឡាករ Robson-Kanu ប៉ុន្តែនៅនាទីទី៣៣ ខ្សែប្រយុទ្ធសញ្ជាតិអេហ្ស៊ីប Mohamed Salah រកបាន១គ្រាប់សងវិញ។ ចប់ការប្រកួតក្នុងតង់ទី១ លទ្ធផលស្មើគ្នា១ទល់១។
ចូល់ដល់ការប្រកួតក្នុងតង់ទី២ ក្រុមហង្សក្រហមបានព្យាយាមសម្រុកយ៉ាងខ្លាំងទៅលើក្រុមម្ចាស់ផ្ទះ ប៉ុន្តែនៅតែមិនអាចធ្វើអ្វីក្រុមម្ចាស់ផ្ទះបានឡើយ។ រហូតដល់ចូលដល់ម៉ោងបន្ថែម ពេលដែលក្រុមហង្សក្រហមបានបាល់ជ្រុង ទាំងកីឡាករខ្សែការពារ និងអ្នកចាំទីផង បានទៅព្យាយាមតែត ដើម្បីដណ្តើមជ័យជម្នះ។ នៅនាទីទី៩០+៥ ពេលដែលបាល់ទាត់ចេញពីជ្រុង អ្នកចាំទីក្រុមហង្សក្រហម Alisson តែត១គ្រាប់បញ្ចូលទី ធ្វើឲ្យក្រុមហង្សក្រហមអបអរជ័យជម្នះនេះយ៉ាងខ្លាំង ធ្វើឲ្យចប់ការប្រកួត Liverpool ឈ្នះក្រុម West Brom ២ទល់១។
ក្រោយពីទទួលបានជ័យជម្នះអ្នកចាំទីសញ្ជាតិប្រេស៊ីលរូបនេះបាននិយាយថា”“ខ្ញុំសង្ឃឹមថា ឪពុកខ្ញុំនៅទីនេះដើម្បីមើលខ្ញុំ ហើយប្រាកដថាគាត់កំពុងធ្វើពិធីជាមួយព្រះនៅក្បែរគាត់” ដែលសម្តីនេះគឺរូបគាត់ចង់ឧទ្ធិសជូនដល់ឪពុករបស់គាត់”។
ឪពុករបស់ Alisson គឺលោក Jose Agostinho Becker បានទទួលមរណភាពក្នុងអាយុ៥៧ឆ្នាំនៅក្នុងប្រទេសប្រេស៊ីលកាលពីខែកុម្ភៈជាមួយប៉ូលីសក្នុងតំបន់បាននិយាយថា គាត់បានលង់ទឹកនៅទំនប់មួយក្បែរផ្ទះលំហែកាយរបស់គាត់នៅតំបន់ Lavras do Sul ។
Alisson បានក្លាយជាអ្នកចាំទីទី៦ ដែលអាចរកគ្រាប់បាល់បញ្ចូលទីក្នុងក្របខ័ណ្ឌ Premier League ហើយជាអ្នកដំបូងដែលបានជ័យឲ្យក្រុមឈ្នះគូប្រកួតនៅចុងម៉ោង។ ការជួយឲ្យហង្សក្រហមឈ្នះនេះ ធ្វើឲ្យក្រុមមួយនេះបានឡើងមកឈរចំណាត់ថ្នាក់លេខ៥ មាន៦៣ពិន្ទុ ដើម្បីកៀកនឹងដណ្តើមកៅអី Champions League នៅរដូវកាលក្រោយផងដែរ ខណៈដែលនៅសល់២ប្រកួតទៀតនឹងចប់រដូវកាលនេះ ៕ដោយ៖ ភារៈ
