ភ្នំពេញ៖ កម្លាំងជំនាញនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ( ក.ប.ប) នៅរសៀលថ្ងៃអង្គារ ទី១៨ ខែឧសភា ឆ្នាំ២០២១ បានបើកការស្រាវជ្រាវ និងស៊ើបអង្កេត រកឃើញទីតាំងលក់អាល់កុល តាម Online ដែលជាអាល់កុលក្លែងក្លាយមួយកន្លែង ស្ថិតនៅក្នុងភូមិប្រកា សង្កាត់ព្រៃស ខណ្ឌដង្កោ រាជធានីភ្នំពេញ។
ក្នុងប្រតិបត្តិការខាងលេីនេះ មន្រ្តីជំនាញ បានសហការជាមួយកម្លាំងអាជ្ញាធរ និងសមត្ថកិច្ចមូលដ្ឋាន ដោយមានឯកភាពពីស្ថាប័នអយ្យការអមសាលាដំបូងរាជធានីភ្នំពេញ ចុះបង្រ្កាបភ្លាមៗ ព្រមទាំងបាននាំយករថយន្តមន្ទីរពិសោធន៍ចល័តវិភាគនៅនឹងកន្លែង ដើម្បីដឹងលទ្ធផលភ្លាមៗ។ ជាក់ស្ដែងជាលទ្ធផលមន្រ្តីជំនាញ រកឃើញអាល់កុលក្លែងក្លាយ ឬសារធាតុមេតាណុល បានចំនួន ១៨៣កាន ស្មើនឹងចំណុះ ៥៤៩០លីត្រ រួចបានធ្វេីកំណត់ហេតុរឹបអូស យកទៅរក្សាទុកជាវត្ថុតាងដើម្បីកសាងសំណុំរឿង ចាត់ការតាមនីតិវិធីច្បាប់។
ចំពោះការអនុវត្តតាមការណែនាំជាប្រចាំរបស់រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ និងការបញ្ជាផ្ទាល់ពីលោក ផាន អូន ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយក នៃអគ្គនាយកដ្ឋាន ក.ប.ប. ពាក់ព័ន្ធនឹងការចរាចរអាល់កុលក្លែងក្លាយ ក្នុងបរិបទនៃការរីករាលដាលនៃជំងឺកូវីដ-១៩។
គួរជម្រាបថា មន្ត្រីជំនាញនៃអគ្គនាយកដ្ឋាន ក.ប.ប. ក្នុងនាមជាមន្ត្រីស៊ើបអង្កេត និងជានគរបាលយុត្តិធម៌ បានបើកការស្រាវជ្រាវ និងស៊ើបអង្កេត (Market Intelligence) តាមរយៈរូបភាពការបញ្ជាទិញអាល់កុល ដែលដាក់លក់លើបណ្តាញសង្គម Facebook យកមកធ្វើតេស្ត នៅមន្ទីរពិសោធន៍របស់អគ្គនាយកដ្ឋាន ក.ប.ប. វិភាគរកឃើញសាធាតុមេតាណុល ដែលក្លែងបន្លំជាអាល់កុល និងឈានដល់ការចុះបង្ក្រាបតែម្ដង។
ដោយឡែកបើតាមប្រភពព័ត៍មានពីមន្រ្តីអគ្គនាយកដ្ឋានក.ប.ប បានថ្លែងថា នៅក្នុងឡុងពេលនៃការរីករាលដាលជំងឺកូវីដ-១៩ “សហគមន៍២០កុម្ភៈ” អគ្គនាយកដ្ឋាន (ក.ប.ប) បានធ្វើការស្រាវជ្រាវរកឃើញ និងរឹបអូសបានជាបន្តបន្ទាប់នូវអាល់កុលក្លែងក្លាយ ចំនួន ៤០៦២៥លីត្រ ស្មើនឹងប្រមាណជាង ៤០តោន ពីតាមបណ្តារាជធានី ខេត្តមួយចំនួន។
បន្ថែមពីនេះជាថ្មីម្តងទៀត អគ្គនាយកដ្ឋាន ក.ប.ប. សូមអំពាវនាវដល់អាជីវករលក់ដុំ លក់រាយ ម្ចាស់ឱសថស្ថាន ម្ចាស់ផ្សារទំនើប និងអ្នកនាំចូលផលិតផលអាល់កុលទាំងអស់ សូមកុំយកសារធាតុមេតាណុល បន្លំជាអាល់កុលលក់ជូនប្រជាពលរដ្ឋ ព្រោះសកម្មភាពនេះ មិនត្រឹមតែមិនអាចទប់ស្កាត់ការចម្លងមេរោគ ឬបង្កផលប៉ះពាល់ដល់សុខភាពអ្នកប្រើប៉ុណ្ណោះទេ ថែមទាំងនាំដល់ការប្រឈមចំពោះច្បាប់ដល់ខ្លួនថែមទៀតផង៕ដោយ៖សហការី
