ភ្នំពេញ ៖ បុរសម្នាក់កំពុងតែជិះម៉ូតូ
សុខៗស្រាប់តែត្រូវរថយន្តហុីយ៉ាន់ដាយបើកបរក្នុងល្បឿនលឿនមកបុកពីក្រោយនិងកិនម៉ូតូអូសជាង១០ម៉ែត្រ ហើយអ្នកបើកបររថយន្តបានបើកទ្វារចុះរត់គេចខ្លួនបាត់ស្រមោល ។
ករណីគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង ៣និង ៣០នាទីរសៀលថ្ងៃទី២៤ ខែឧសភា ឆ្នាំ២០២១ ស្ថិតនៅត្រង់ចំណុចមុខសាលារៀនប៊ីគីវេ តាមបណ្ដោយផ្លូវលេខ២១៧ កែងនិងផ្លូវបេតុងបឹងតាម៉ាត ភូមិសំបួរ សង្កាត់ដង្កោ ខណ្ឌដង្កោ ។
ជនរងគ្រោះមានឈ្មោះ សេ្រង រិទ្ធ ភេទប្រុស អាយុ៥៧ឆ្នាំ មុខរបរលក់ដូរ ស្នាក់នៅភូមិថ្មី សង្កាត់ដង្កោ ខណ្ឌដង្កោ ។ ចំណែកអ្នកបើកបររថយន្តបង្កហេតុមិនស្គាល់អត្តសញ្ញាណទេព្រោះតែរត់ចោលរថយន្តបាត់ទៅ។
យោងតាមប្រភពព័ត៌មានពីប្រជាពលរដ្ឋបានប្រាប់ឱ្យដឹងថា មុនពេលកើតហេតុគេឃើញជនរងគ្រោះបានជិះម៉ូតូម៉ាកហុងដាគុបជ្រុង ពណ៌ទឹកប៊ិក ពាក់ស្លាកលេខភ្នំពេញ 1AI -2716 ជិះតាមផ្លូវលេខ២១៧ ក្នុងទិសដៅពីជើងទៅត្បូង ខណៈមកដល់ចំណុចកើតហេតុក៏មានរថយន្តម៉ាកហ៊ីយ៉ាន់ដាយ ពណ៌ក្រហម ពាក់ស្លាកលេខ ភ្នំពេញ 3A-6475 បើកបរដោយបុរសម្នាក់រួមនឹងព្រូពីរនាក់ធ្វើដំណើរមកពីក្រោយក្នុងល្បឿនលឿនជ្រុលទៅបុកម៉ូតូពីក្រោយបណ្ដាលឱ្យបុរសរងគ្រោះខ្ទាតចេញពីម៉ូតូរងរបួសស្រាល ចំណែករថយន្តបានអូសម៉ូតូប្រហែលជាង១០ម៉ែត្រទើបឈប់ រីឯអ្នកបើកបរបានបើកទ្វាររថយន្តចុះរត់គេចខ្លួនបាត់ស្រមោលបន្សល់តែរថយន្តនិងព្រូពីរនាក់នៅកន្លែងកើតហេតុ ។ ពេលនោះសមត្ថកិច្ចមូលដ្ឋានបានចុះដល់កន្លែងកើតហេតុនិងយកម៉ូតូរួមនិឹងរថយន្តដាក់អែបខាង រួចបានទំនាក់ទំនងទៅខាងថៅកែរថយន្តដើម្បីមកដោះស្រាយគ្នាជាមួយជនរងគ្រោះ ។
ក្រោយពេលកើតហេតុ ដោយសារភាគីទាំងសងខាងចរចាគ្នាមិនត្រូវគ្នា ទើបសមត្ថកិច្ចមូលដ្ឋានសហការជាមួយសមត្ថកិច្ចជំនាញចរាចរណ៍ខណ្ឌដង្កោធ្វើការវាស់វែងយករថយន្តបង្កនិងម៉ូតូទៅរក្សាទុកនៅអធិការដ្ឋាននគរបាលខណ្ឌដង្កោ ដេីម្បីដោះស្រាយគ្នានៅពេលក្រោយ៕
ដោយ ៖ ភារ៉ា ដង្កោ
