អន្តរជាតិ៖ យោងតាមក្រសួងសុខាភិបាលប្រទេសអ៊ុយរ៉ាហ្គាយ បានឱ្យដឹងថា បន្ទាប់ពីលទ្ធផលសិក្សាថ្មីមួយទៀតទៅលើក្រុមហ៊ុន វ៉ាក់សាំងចិន Sinovac បានបង្ហាញថា អត្រាមរណៈបង្កឡើងដោយ COVID-19 ក្នុងចំណោមប្រជាជនអ៊ុយរ៉ាហ្គាយ អាយុចាប់ពី ១៨-៦៩ឆ្នាំ ដែលទទួលបានការការពារពីវ៉ាក់សាំងនេះ ត្រូវបានកាត់បន្ថយដល់ទៅជាង ៩៥ភាគរយ។
ជាក់ស្ដែងបើតាមទីភ្នាក់ងារព័ត៌មានស៉ីនហួរ នៅរសៀលថ្ងៃព្រហស្បតិ៍ ទី១០ ខែមិថុនា ឆ្នាំ២០២១នេះ បានចុះផ្សាយថា រយៈពេល២សប្តាហ៍ក្រោយ បន្ទាប់ពីការចាក់ដូសទីពីរនៃវ៉ាក់សាំងបង្ការជំងឺ COVID-19 ដែលអភិវឌ្ឍដោយក្រុមហ៊ុនចិន Sinovac អត្រាមរណៈ ក្នុងចំណោមប្រជាពលរដ្ឋអ៊ុយរ៉ាហ្គាយអាយុចាប់ពី ១៨-៤៩ឆ្នាំ ត្រូវបានកាត់បន្ថយ ៩៥.៣ភាគរយ និងក្នុងចំណោមអាយុចាប់ពី ៥០-៦៩ឆ្នាំ ត្រូវបានកាត់បន្ថយ ៩៥.២ភាគរយ។
បន្ថែមពីនេះ វ៉ាក់សាំង Sinovac បានកាត់បន្ថយលទ្ធភាពនៃការធ្លាក់ខ្លួនឈឺធ្ងន់ ៩៤.៤ភាគរយ ក្នុងចំណោមអ្នកមានអាយុក្រោម ៤៩ឆ្នាំ និង ៩២.២ភាគរយ ក្នុងចំណោមអ្នកមានអាយុ ៥០-៦៩ឆ្នាំ។ ក្រៅពីនេះសម្រាប់រយៈពេល ១៤ថ្ងៃ ក្រោយការចាក់វ៉ាក់សាំង Sinovac ដូសទីពីរ លទ្ធភាពនៃការឆ្លង COVID-19 ក្នុងចំណោមមនុស្សអាយុចាប់ពី ១៨-៤៩ឆ្នាំ ត្រូវបានកាត់បន្ថយរហូតដល់ ៦៤.៥ភាគរយ និង ៦១.៥ភាគរយ ក្នុងចំណោមមនុស្សអាយុចាប់ពី ៥០-៦៩ឆ្នាំ ។
បច្ចុប្បន្ន រហូតមកទល់ពេលនេះ ៣០ភាគរយ នៃប្រជាជនសរុបរបស់អ៊ុយរ៉ាហ្គាយប្រមាណ ៣.៤៦លាននាក់ ទទួលបានការចាក់គ្រប់ពីរដូស ហើយ ៥៦ភាគរយ ទទួលបានមួយដូសដំបូងនៃវ៉ាក់សាំង Sinovac, Pfizer និង AstraZeneca។
គួរបញ្ជាក់ថា ប្រទេសអ៊ុយរ៉ាហ្គាយ បានកត់ត្រាករណីឆ្លង COVID-19 សរុបនៅទូទាំងប្រទេសចំនួន ៣២២,៩៧៨នាក់ ក្នុងនោះស្លាប់ ៤,៧៤៩នាក់ផងដែរ៕ដោយ៖ស តារា
