ភ្នំពេញ ៖ យុវជនម្នាក់ ដោយសារញៀនថ្នាំខ្លាំងពេក ហើយគ្មានលុយទិញថ្នាំជក់ បានយកម៉ូតូឪពុកម្តាយយកទៅបញ្ចាំ លុះពេលម្តាយតាមទាន់ ចាប់មកប្រគល់ឲ្យសមត្ថកិច្ចប៉ុស្តិ៍ភ្នំពេញថ្មី ជួយអន្តរាគមន៍ ។
ករណីនេះបានកើតឡើងកាលពីវេលាម៉ោង០១និង៣០នាទីរសៀល ថ្ងៃទី១៥ ខែមីនា ឆ្នាំ២០១៦ នៅចំណុចភូមិត្រពាំងឈូក សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
យុវជនខាងលើឈ្មោះ ស សីហា អាយុ២៥ឆ្នាំ មុខរបរមិនពិតប្រាកដ ស្នាក់នៅភូមិគោកឃ្លាង សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។
ចំណែកស្ត្រីជាម្តាយមានឈ្មោះ ជា ចំរ៉ុង អាយុ៤៧ឆ្នាំ មុខរបរលក់ដូរ ស្នាក់នៅភូមិគោកឃ្លាង សង្កាត់ភ្នំពេញថ្មី ខណ្ឌសែនសុខ ។
ចំណែកយុវជននោះបានឆ្លើយសារភាពថា រូបគេពិតជាបានយកម៉ូតូរបស់ម្តាយទៅបញ្ចាំបានលុយ៥០ដុល្លារពិតប្រាកដមែន ។
ក្រោយពីឃាត់ខ្លួនមកដល់ប៉ុស្តិ៍នគរបាលភ្នំពេញថ្មី ស្ត្រីជាម្តាយបានសំណូមពរឲ្យសមត្ថកិច្ចជួយបញ្ជួនទៅដាក់នៅមណ្ឌលកែប្រែឱកាសខ្ញុំ ៕ តុង សីហា
