ភ្នំពេញ៖ បើយោងតាមលោក ដួង តារា ជំនួយការសម្តេចតេជោ ហ៊ុន សែន នាយករដ្ឋមន្រ្តី និងជារដ្ឋលេខាធិការទីស្តីការគណៈរដ្ឋមន្រ្តី បានបង្ហោះនៅលេីបណ្ដាញសង្គមហ្វេសប៊ុកផ្លូវការរបស់ខ្លួន នៅរសៀលថ្ងៃសៅរ៍ទី១៩ ខែមិថុនា ឆ្នាំ២០២១នេះថា៖ សុខសប្បាយជាទេបងប្អូនទាំងអស់គ្នា? ក្នុង១សប្តាហ៍មកនេះ ខ្ញុំមិនបានផុសអ្វីទេ ព្រោះការងារខ្ញុំគ្មានអ្វីក្រៅពីការជួយដោះស្រាយបញ្ហាវិវាទដីធ្លី និងវិវាទផ្សេងៗមួយចំនួនទៀតជូនបងប្អូនប្រជាពលរដ្ឋ។
នៅក្នុងសំណេររបស់លោក ដួង តារា បានបញ្ជាក់បន្ថែមថា អ្នកដែលមានរឿងរ៉ាវស្មុគ្រស្មាញ គឺប្រៀបដូចជាស្រមោលអន្ទោលតាមប្រាណជាប់ជាប្រចាំនៅគ្រប់ទីកន្លែង។ បងប្អូនដែលកំពុងមានមានបញ្ហាវិវាទផ្ទាល់ខ្លួន ទើបដឹងថាលំបាកយ៉ាងណានោះ គឺងើបឡើងស្ពាយរឿងជាប់ខ្លួន ពេលចូលគេងវិញក៏គេងឱបរឿងទៅជាមួយ…។ បើធ្វើតាមនីតិវិធីតុលាការវិញ មិនដឹងថាតើត្រូវចំណាយសេវាមេធាវី និងពេលវេលាយូរប៉ុណ្ណា.. ហើយលទ្ធផលចុងក្រោយយ៉ាងណា? ដូច្នេះមានតែដំណោះស្រាយឈរលើគោលការណ៍ឈ្នះ-ឈ្នះសម្តេចតេជោ ទើបឆាប់ចប់ហើយគ្រប់គ្នាមានតែស្នាមញញឹម។
រដ្ឋលេខាធិការរូបនេះ បានបញ្ជាក់ទៀតថា ក្រោមការណែនាំនិងចង្អុលបង្ហាញដ៏ខ្ពង់ខ្ពស់របស់ សម្តេចតេជោនាយករដ្ឋមន្រ្តី ខ្ញុំនឹងព្យាយាមជួយដោះស្រាយជូនបងប្អូន ទោះបីក្នុងកម្រិតណាក៏ដោយ គឺមិនឱ្យបងប្អូនអស់សង្ឃឹមទេ។ ព្រោះសុខទុក្ខបងប្អូន គឺជាសុខទុក្ខសម្តេចទាំងទ្វេ ហើយក៏ជាសុខទុក្ខរបស់ខ្ញុំដែរ ដែលមានឱកាសបានប្រើការងារជូនប្រមុខដឹកនាំ។
ជាចុងក្រោយ លោក ដួង តារា យើងចូលរួមកសាងអំពើល្អ ចែករំលែកក្តីស្រឡាញ់និងស្នាមញញឹម នឹងសូមមានចិត្តអាណិតស្រឡាញ់ពលរដ្ឋយើងគ្រប់ទីកន្លែងដោយគ្មានការរើសអើង៕ដោយ៖សហការី
ប្រភពពី៖ហ្វេសប៊ុករបស់លោក ដួង តារា
