ភ្នំពេញ៖ លោក ប៉ា សុជាតិវង្ស អភិបាលរាជធានីភ្នំពេញ អមដំណើរដោយមន្ត្រីជំនាញ ក្រោមឱវាទសាលារាជធានីភ្នំពេញបានចុះពិនិត្យការស្ថាបនាផ្លូវថ្មើជើង និងច្រាំងទន្លេ ចាប់ពីបញ្ជរព័ត៌មានទេសចរណ៍មុខព្រះបរមរាជវាំង ដល់ស្ពានភ្លោះកោះពេជ្រ ។
រដ្ឋបាលរាជធានីភ្នំពេញបាននឹងកំពុងជម្រុញសាងសង់គម្រោងផ្លូវថ្មើរជើង តាមច្រាំងទន្លេដោយតភ្ចាប់ ចាប់ពីបញ្ចរព័ត៌មានទេសចរណ៍មុខព្រះបរមរាជវាំង រហូតដល់ស្ពានព្រះមុនីវង្ស។ គម្រោងនេះ លាតសន្ធឹងតាមដងមាត់ច្រាំងទន្លេចតុមុខ ដែលមានប្រវែងសរុប ៤,១៥០ម៉ែត្រ នឹងចែកជា ២ដំណាក់កាលគឺ ៖
ដំណាក់កាលទី១-ពីបញ្ជរព័ត៌មានទេសចរណ៍មុខព្រះបរមរាវាំង រហូតដល់ស្ពានភ្លោះកោះពេជ្រ ដែលមានប្រវែងសរុបប្រហែល ៩៥០ម៉ែត្រ និងទទឹងចាប់ពី ៧ម៉ែត្រ ដល់ ១៥ម៉ែត្រ ។ រដ្ឋបាលរាជធានីភ្នំពេញរំពឹងថា គម្រោងស្ថាបនាផ្លូវថ្មើរជើងថ្មីនេះ នឹងចូលរួមលើកសោភ័ណភាពរាជធានីបន្ថែមទៀត និងសម្រួលដល់ការដើរកំសាន្ដ ព្រមទាំងផ្ដល់ជាទីធ្លាហាត់ប្រាណសាធារណៈ ដល់ភ្ញៀវទេសចរណ៍នានា នៅតាមដងទន្លេចតុមុខ ៕ សុខ ខេមរា
