អន្តរជាតិ៖ បើតាមទីភ្នាក់ងារសារព័ត៌មាន AP នៅព្រឹកថ្ងៃពុធ ទី៣០ ខែមិថុនា ឆ្នាំ២០២១ បានដកស្រង់ចេញផ្សាយពីប៉ូលីសកាណាដា បានរាយការណ៍ឱ្យដឹងថា មនុស្សយ៉ាងហោចណាស់ ៦៩នាក់នៅតំបន់វែនខូវើ (Vancouver) នៃប្រទេសកាណាដា បានស្លាប់នៅក្នុងរលកកម្ដៅដ៏ខ្លាំងមួយ ដែលបានកើតឡើងនៅភាគខាងលិចនៃប្រទេស និងតំបន់ប៉ាស៊ីហ្វិកភាគពាយ័ព្យនៃសហរដ្ឋអាមេរិក បេីគិតត្រឹមថ្ងៃអង្គារទី២៩ ខែមិថុនាម្សិលមិញនេះ។
ជាក់ស្ដែងនៅក្នុងសេចក្ដីថ្លែងការណ៍មួយរបស់កងកម្លាំងប៉ូលីសកាណាដា (RCMP) បានគូសបញ្ជាក់ថា៖ អ្នកស្លាប់ភាគច្រើននៅជាយក្រុង Vancouver នៃតំបន់ ប៊ឺណាប៊ី (Burnaby) និង សួរ៉េយ (Surrey) ក្នុងរយៈពេល ២៤ម៉ោងកន្លងមកនេះ គឺជាមនុស្សចាស់ ឬមនុស្សដែលមានបញ្ហាសុខភាពស្រាប់។
RCMP បានគូសបញ្ជាក់ទៀតថា៖ «ទោះបីជាមូលហេតុនៃការស្លាប់នេះ កំពុងស្ថិតក្នុងការស៊ើបអង្កេតក៏ដោយ ក៏ការកើនឡើងនូវរលកកម្ដៅ ត្រូវបានគេជឿថា ជាកត្តាធំមួយដែលអាចរួមចំណែក បង្កឲ្យមានករណីស្លាប់ភាគច្រើនផងដែរ»។
គួរបញ្ជាក់ថា រលកកម្ដៅបានកើនឡើងដល់ ៤៧.៩អង្សាសេនៅតំបន់ លីតតុន (Lytton) នៃខេត្ត ប្រ៊ីតធីស ខូឡុំបៀ (British Columbia) ដែលមានចម្ងាយប្រហែល ២៥០គីឡូម៉ែត្រពីភាគខាងកើតទីក្រុង Vancouver ប្រទេសកាណាដា កាលពីថ្ងៃចន្ទសប្ដាហ៍នេះ។ ក្រុមអ្នកព្យាករណ៍រំពឹងថា វានឹងកើនឡើងម្តងទៀតនៅថ្ងៃអង្គារសប្ដាហ៍នេះដល់ ៤៩អង្សាសេនៅភាគខាងលិចនៃប្រទេស៕ដោយ៖សហការី
រូបភាព៖ឯកសារ
