ភ្នំពេញ៖ នៅវេលាម៉ោង៨និង៣០នាទីថ្ងៃទី១៨ ខែមិនា ឆ្នាំ២០១៦ កម្លាំងនគរបាលខណ្ឌ៧មករា កំពុងល្បាតក្នុងមូលដ្ឋាន បានឃាត់ខ្លួនជនសង្ស័យ២នាក់ បន្ទាប់ពីធ្វើសកម្មភាពឆក់ការបូបដៃពីនារីម្នាក់ដែលកំពុងជិះ តាមបណ្ដោយផ្លូវលេខ២១៥ ក្នុងសង្កាត់វាលវង់ ខណ្ឌ៧មករា រាជធានីភ្នំពេញ។

ជនសង្ស័យទី១ មានឈ្មោះ លីម ពីដូ ភេទប្រុស អាយុ២០ឆ្នាំ ស្នាក់នៅផ្ទះលេខB19 សង្កាត់ទឹកល្អក់ទី៣ ខណ្ឌទួលគោក និងមុខរបរមិនពិតប្រាកដ។ ជនសង្ស័យទី២ ឈ្មោះ ខាំឡ ខាំម៉ារី ភេទប្រុស អាយុ២៥ឆ្នាំ ស្នាក់នៅផ្ទះលេខ8Z សង្កាត់ទឹកល្អក់ទី៣ ខណ្ឌទួលគោក និងមុខរបរមិនពិតប្រាកដ។ ចំណែកជនរងគ្រោះមានឈ្មោះ សាន សុជាតា ភេទស្រី អាយុ២៧ឆ្នាំ ស្នាក់នៅខេត្តកណ្ដោល។

តាមប្រភពព័ត៌មានបានអោយដឹងថា នៅមុនពេលកើតហេតុ ជនរងគ្រោះកំពុងតែជិះម៉ូតូ១គ្រឿងម៉ាកZommer.X ពណ៍ស ពាក់ស្លាក់លេខភ្នំពេញ1DC-2225 តែម្នាក់ឯងក្នុងទិសដៅពីត្បូងទៅជើង ស្រាប់តែមានជនសង្ស័យ២នាក់ជិះម៉ូតូ១គ្រឿងម៉ាកហុងដាឌ្រីម សេ125 ពណ៍ខ្មៅ ពាក់ស្លាក់លេខភ្នំពេញ1CC-1655 ជិះមកជិតធ្វើសកម្មភាពឆក់ការបូបពីជនរងគ្រោះ រួចបានសម្រេចព្យាយាមគេចខ្លួនហើយតែត្រូវនគរបាលខណ្ឌ៧មករា ឃាត់ខ្លួនបានទាំង២នាក់ភ្លាមៗតែម្តង។

បច្ចុប្បន្នជនសង្ស័យទាំង២នាក់រួចនឹងម៉ូតូត្រូវបាននគរបាលឃុំខ្លួនបណ្ដោះអាសន្ននៅអធិការដ្ឋាននគរបាលខណ្ឌ៧មករា ដើម្បីសួរនាំនិងចាត់ការតាមនីតិវិធី។ ចំណែកការបូបជនរងគ្រោះត្រូវសមត្ថកិច្ចប្រគល់អោយទៅជនរងគ្រោះវិញ៕

ដោយ៖ ស រស្មី