ខេត្តមណ្ឌលគីរី ៖ គោយន្តកន្ត្រៃយ៍កែច្នៃចំនួន២គ្រឿងដែលលួចចូលមកកាប់និងដឹកជញ្ជូនឈើប្រណិតល្មើសច្បាប់ត្រូវបានកម្លាំងអាវុធហត្ថស្រុកពេជ្រាដាខេត្តមណ្ឌលគិរីស្ទាក់ចាប់បាននៅជាប់ព្រំដែនចំណុចងាំប៉ាតឹងនិងអូរតាំកនស្ថិតក្នុងដែនជម្រកសត្វព្រៃណាំលៀកាលពីថ្ងៃ១៦ខែកក្កដា២០១៥នេះ។
លោក ព្រំ សាវ៉េន មេបញ្ជាការកងរាជអាវុធហត្ថ ស្រុកពេជ្រាដារ បានឲ្យដឹងថាកំលាំងល្បាតរបស់លោកចាប់បានគោយន្ដកន្ត្រៃយ៍កែឆ្នៃរប្រភេទពិសេសសំរាប់ដឹកឈើជារបស់ជនជាតិវៀតណាមចំនួន២គ្រឿងដែលចូលមកទឹកដីកម្ពុជាកាប់ឈើនៅចំណុច ដែនជម្រកសត្វព្រៃណាំលៀរកាលវេលាម៉ោង១រសៀលថ្ងៃទី១៦ខែកក្កដា។ លោកមេបញ្ជាការបានបន្តថា សកម្មភាពរបស់ជនជាតិវៀតណាមដែលចូលកាប់ឈើនៅតំបន់ដែនជម្រកសត្វព្រៃណាំលៀដែលគ្រប់គ្រងដោយមន្ត្រីបរិស្ថាននោះពុំមែនជាលើកទី១នោះទេគឺកើតមានតាំងពីរយូរមកហើយតែកំលាំងរបស់លោកដើរល្បាតពុំដែលបានជួបនោះទេទើបតែពេលនេះបង្រ្កាបបានតែបទល្មើសនិងមធ្យោបាយចំណែកម្ចាស់រត់បាត់។ លោកបន្តថារហូតមកដល់ពេលនេះសមត្ថកិច្ចអាវុធហត្ថមិនទាន់អូស គោយន្ដកន្ត្រៃយ៍កែឆ្នែចំនួន២គ្រឿងរួមនិងឈើចំនួន៨ដុំធំឡាំងជាជ្រុងមុខកាត់៥០សង់ទីមែត្រគុណ៦០សង់ទីមែត្រប្រវែង៤ទៅ៦មែត្រយកមកប្រគល់ឲ្យជំនាញចាត់ការតាមច្បាប់នៅឡើយទេព្រោះ មេឃភ្លៀងស្ថានភាពផ្លូវលំបាករអ៊ិល។ ពាក់ពន្ធ័ទៅនិងមានបទល្មើសព្រៃឈើនៅក្នុងដែនជម្រកសត្វព្រៃណាំលៀនេះអ្នកយកព័ត៍មានយើងមិនអាចទំនាក់ទំនងសុំបំភ្លឺបានទេពីលោក រត្ន័ សុវណ្ណ មេស្នាក់បរិស្ថានដែនជម្រកសត្វព្រៃណាំលៀនៅល្ងាចថ្ងៃទី១៨កក្កដានេះ៕
