ខេត្តកណ្តាល៖ បុរសវ័យចំណាស់ម្នាក់បានរងគ្រោះថ្នាក់ដោយសារមានក្រុមចោរមួយក្រុមបានយកខ្សែគោមកចងកាត់ទទឹងផ្លូវ ក្នុងបំណងប្លន់យកម៉ូតូ តែដោយម៉ូតូ ចាស់ពេក ក្រុមចោរទាំងនោះមិនយក ។
ហេតុការណ៍នេះកើតឡើងកាលពីវេលាម៉ោ៧យប់ ថ្ងៃទី១៦ ខែមីនា ឆ្នាំ២០១៦ នៅចំណុចផ្លូវលំចុះទៅវាលបឹង ឋិតនៅក្នុងភូមិថ្មី ឃុំស្វាយអំពា ស្រុកមុខកំពូល ខេត្តកណ្តាល ។
ជនរងគ្រោះឈ្មោះ សុះ សើរ អាយុ៥៨ឆ្នាំ ស្នាក់នៅ ក្នុងភូមិឈើទាល ឃុំព្រែអញ្ចាញ ស្រុកមុខកំពូលខេត្តកណ្តាល មុខរបរជាកម្មករឡឥដ្ឋិ ។ ជនរងគ្រោះបានប្រាប់អ្នកយកព័ត៌មានឲ្យដឹងថានៅវេលា កើតហេតុ រូបគាត់បានជិះម៉ូតូកញ្ចាស់មួយគ្រឿង ម៉ាកគុប គ្មានស្លាកលេខ មកពីកាប់ព្រៃ នៅវាលបឹងស៊ីឈ្នួលគេ លុះម៉ោងកើតហេតុ រូបគាត់ជិះម៉ូតូត្រឡប់មកវិញ ក្នុងបំណងទៅផ្ទះ ពេលមកដល់កន្លែងកើតហេតុ ខណៈមេឃងងិតហើយភ្លើងម៉ូតូ មិនសូវមានពន្លឺ គាត់ក៏ជិះទាក់ខ្សែគោដែលក្រុមចោរចងបម្រុងទុកតាំងពីពេលណាមកដួលច្រងាប់ច្រងិល សន្លប់មួយសន្ទុះ ទើបដឹងខ្លួនប៉ុន្តែសំណាងល្អពេលដឹងខ្លួនវិញ មិនបាត់ម៉ូតូ ។
ប្រភពបន្តថា បន្ទាប់មក លោកបាទៅលើកម៉ូតូស្ទើរពុំរួចហើយជិះត្រឡប់មកផ្ទះ តែមុននឹងមកផ្ទះ គាត់ក៏បានទៅរាយការណ៍ប្រាប់លោកមេភូមិវត្តថ្មីឲ្យបានជាដំណឹង តែរូបគាត់ពុំបានរាយការណ៍ទៅសមត្ថកិច្ចនគបាលប៉ុស្តិ៍ស្វាយអំពានោះ ។ បន្ទាប់មកបុរស វ័យចំណាស់សុះ សើរ បានជិះម៉ូតូទាំងអត់ភ្លើងបំភ្លឺផ្លូវមកផ្ទះទាំងឈឺទ្រមខ្លួន ។
គួរបញ្ជាក់ផងដែរថា ក្នុងសប្តាហ៍ពាក់កណ្តាលខែមីនា ឆ្នាំ២០១៦ ក្នុងទឹកដីស្រុកមុខកំពូល មានចោរកម្មកើតឡើងច្រើនករណី ប៉ុន្តែសមត្ថកិច្ចមិនទាន់បង្ក្រាបបានមួយករណីណាឡើយ ៕
ដោយ៖ ឡូ សំអាត
