ខេត្តបាត់ដំបង៖ កម្លាំងអាវុធហត្ថខេត្តបាត់ដំបងបង្ក្រាបឃាត់ខ្លួនបុរស៣នាក់ និងថ្នាំញៀនម៉ាទឹកកក១ថង់ស្មើទម្ងន់៥១,៥០ក្រាម ពេលកំពុងកាន់កាប់ដឹកជញ្ជូនតាមផ្លូវ  កាលពីម៉ោង៧ និង៣០នាទីព្រឹកថ្ងៃទី១៧ ខែមិនា ឆ្នាំ២០១៦ នៅចំណុចភូមិច្រាបវាល ឃុំអន្លង់វិល ស្រុកសង្កែ ខេត្តបាត់ដំបង។

លោក សរ សេដ្ឋានាយការិយាល័យប្រឆាំងគ្រឿងញៀនអាវុធហត្ថខេត្តបាត់ដំបងបានឲ្យដឹងថា បុរសសង្ស័យដែលសមត្ថកិច្ចឃាត់ខ្លួនមានទី១ឈ្មោះឈុំ ស៊ីថា អាយុ២៥ឆ្នាំ ទី២ឈ្មោះកុយ ពិសី អាយុ២៣ឆ្នាំ និងទី៣ឈ្មោះគង់ គឹមហ័ង អាយុ៣០ឆ្នាំ ទាំង៣នាក់់មានទីលំនៅភូមិច្រាបក្រសាំង សង្កាត់អូរម៉ាល់ ក្រុងបាត់ដំបង។

វត្ថុតាងដែលសមត្ថកិច្ចដកហូតបានមានគ្រឿងញៀនប្រភេទម្សៅក្រាមពណ៌សថ្លាចំនួន១ថង់ ស្មើទម្ងន់៥១,៥០ក្រាម(ថ្លឹងទាំងថង់), ម៉ូតូ២គ្រឿងម៉ាកDUKE១គ្រឿង និងESTEP១គ្រឿង, ទូរស័ព្ទចំនួន៣គ្រឿង។ ជនសង្ស័យទាំង៣នាក់បានសារភាពថាពួកខ្លួនបានជួញដូរថ្នាំញៀន៦ទៅ៧ដងដោយកម្ម៉ង់ថ្នាំញៀនពីភ្នំពេញ។

លោកសរ សេដ្ឋានាយការិយាល័យប្រឆាំងគ្រឿងញៀនអាវុធហត្ថខេត្តបាត់ដំបងបានបញ្ជាក់ថា ជនសង្ស័យទាំង៣នាក់និងវត្ថុតាងសមត្ថកិច្ចបានកសាងសំណុំរឿងបញ្ជូនទៅតុលាការនារសៀលថ្ងៃទី១៧ខែមិនាឆ្នាំ២០១៦ ដើម្បីចាត់ការតាមនីតិវិធី៕